ފެންފުއްޓަށް އުދަ އެރިވަގުތު ރާޅާ ދަމައިގަތް ދެ މީހުންގެ ތެރެއިން އެކަކު މަރުވެއްޖެއެވެ.
ފެންފުށީ ކައުންސިލްގެ ނައިބު ރައީސް ޝީޒާ ވަހީދު "ރާއްޖެ އެމްވީ" އަށް ވިދާޅުވީ އެ ދެމީހުން ރާޅާ ދަމައިގަތީ ހަވީރު ވަގުތު ފޮޓޯ ނަގަން ގޮނޑުދޮށަށް އެރި ތިއްބައި ކަމަށެވެ. އެއިރު އެ ދެ މީހުންނާއެކު އިތުރު ދެ މީހަކު ވެސް ތިބި ކަމަށާއި ނަމަވެސް ރާޅާއެކު ދަމައިގަތީ އެ ވަގުތު މޫދުގައި ތިބި ދެ މީހުން ކަމަށް ވެސް އޭނާ ވިދާޅުވިއެވެ.
ޝީޒާ ވިދާޅުވި ގޮތުގައި ރާޅާ ދަމައިގަތް ދެ މީހުންގެ ތެރެއިން މަރުވެފައިވަނީ އެ ރަށަށް ހުކުރު ދުވަހު ދިޔަ ކައިރި ރިސޯޓެއް ކަމަށްވާ، ސަން އައިލެންޑުގައި މަސައްކަތް ކުރާ ދިވެހި ޒުވާނެއް ކަމަަށެވެ. އޭނާއަކީ ތ. ދިޔަމިގިލީ އުމުރުން 23 އަހަރުގެ އީސާ ޖުނާހު ކަމަށް މައުލޫމާތު ލިބެއެވެ.
އޭނާ ނެގި އިރުވެސް ނޭވާ ނުލާ ކަމަށް ޑިންގީގައި ސަލާމަތް ކުރަން ދިޔަ މީހުން ބުނާ ކަމަށާއި ހޮސްޕިޓަލަށް ގެންދިއުމުން މަރުވެފައިވާ ކަމަށް ޑޮކްޓަރުން ވެސް ބުނެފައިވާ ކަމަށް ޝީޒާ މައުލޫމާތު ދެއްވިއެވެ.
އީސާ ޖުނާހުއާއެކު ގެއްލުނީ ފެންފުށީ ޒުވާނެކެވެ. އޭނާގެ ހާލު މިހާރު ރަނގަޅު ކަމަށް މައުލޫމާތު ލިބެއެވެ.
ފެންފުށީ ހޮސްޕިޓަލުން ވަނީ ދެ މީހުން ވެސް އެ އަތޮޅު މަހިބަދޫ ހޮސްޕިޓަލަށް ފޮނުވާފައެވެ.
