އެޗްއާރުސީއެމަށް، އެކޮމިޝަނުގެ ކުރީގެ މެމްބަރު ޒާހިދު އައްޔަން ކުރުމަށް މަޖިލީހުން ފާސްކޮށްފި

ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގައި ހުސްވެފައިވާ މަގާމަށް އެކޮމިޝަންގެ ކުރީގެ މެމްބަރު މުހައްމަދު ޒާހިދު އައްޔަން ކުރުމަށް ރައްޔިތުންގެ މަޖިލީހުން ފާސްކޮށްފި އެވެ.

ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި އެޗްއާރުސީއެމްގެ މެމްބަރު ކަމަށް އައްޔަން ކުރުމަށްޓަކައި ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް މަޖިލީހަށް ފޮނުވާފައިވާ، ދަފްތަރު ނަމްބަރު 1548، މުހައްމަދު ޒާހިދުގެ ނަން ދިރަސަކުރުމަށް މިނިވަން މުއައްސަސަތަކަބެހޭ ކޮމެޓީއަށް ފޮނުވުމުން އެ ކޮމެޓީންވެސް ވަނީ ޒާހިދު އައްޔަން ކުރުމަށް ފެންނަ ކަމަށް ފާސްކޮށްފަ އެވެ.

އެޗްއާރުސީއެމްގެ މެމްބަރު ކަމުގެ މަގާމަށް ޒާހިދު އައްޔަން ކުރުމަށް ރައްޔިތުންގެ މަޖިލީހުން ފާސްކޮށްފައި ވަނި 57 މެމްބަރުންގެ އަޣްލަބިއްޔަތުންނެވެ. ނުފެންނަ ކަމަށް 05 މެމްބަރުން ވޯޓް ދެއްވިއިރު، ވަކިގޮތަކަށް ވޯޓް ދެއްވަން ބޭނުންނުވާ 05 މެމްބަރުން ތިއްބެވި އެވެ.

އެޗްއާރުސީއެމްގެ ކުރީގެ މެމްބަރު ޒާހިދު މިވަގުތު ވަޒީފާ އަދާ ކުރައްވަނީ ޖެންޑަރ މިނިސްޓްރީގަ އެވެ. ޒާހިދަކީ އެމިނިސްޓްރީގެ ޑެޕިއުޓީ މިނިސްޓަރެކެވެ.

ރައީސް އޮފީހުން ހިއުމަން ރައިޓްސް ކޮމިޝަނުގެ މެމްބަރުކަމަށް ކުރިމަތިލުމުގެ ފުރުސަތު ހުޅުވާލުމަށް ފަހު، އެމަގާމަށް ކުރިމަތިލެއްވި ފަރާތްތަކުގެ ތެރެއިން މަޖިލީހުން ރުހުން ހޯދުމަށް ޒާހިދުގެ ނަން ރައީސް އަބްދުﷲ ޔާމީން ފޮނުވާފައި މި ވަނީ އެކޮމިޝަނުގެ މެމްބަރު ޝިފާގު މުފީދު އިސްތިއުފާ ދެއްވުމާ ގުޅިގެންނެވެ. އެޗްއާރުސީއެމްގެ ނައިބު ރައީސްގެ މަގާމުގައި ހުންނެވި، ޝިފާގު އިސްތިއުފާ ދެއްވާފައިވަނީ މި މެއި މަހުގެ 11 ވީ ބުރާސްފަތި ދުވަހު ކަމަށްވެއެވެ. އަދި ޖެހިގެން އައި ދުވަހު ޝިފާގުއަށް ވަނީ ހޯމް މިނިސްޓްރީގެ ސްޓޭޓް މިނިސްޓަރުކަން ދެއްވާފަ އެވެ.

އޭގެ ފަހުން ޝިފާގު ގެންދަވަނީ ސަރުކާރު ކޯލިޝަން ޕީޕީއެމް އާއި އެމްޑީއޭއިން ހިންގާ ޖަގަހަ ޖަލްސާތަކުގައި ބައިވެރިވެވަޑައިގަންނަވަމުންނެވެ.