ކުޑަކުދިންގެ އަދުލުގެ ޤާނޫނުގެ މަޤްސަދު ހާސިލްކުރުމަށްޓަކައި ކުރަންވީ އެންމެ މުހިއްމު އެއްކަމަކީ ޑައިވާޝަންގެ ނިޒާމް ޤާއިމްކޮށް, އެނިޒާމް ފައްކާކުރުންކަމަށް ހޯމް މިނިސްޓަރު ޢިމްރާން ޢަބްދުﷲ ވިދާޅުވެއްޖެއެވެ.
މިނިސްޓަރު މިހެން ވިދާޅުވީ "އިމްޕްލިމެންޓޭޝަން އޮފް ޑައިވަރޝަން ފޮރ ޗިލްޑްރަން އިން ކޮންފްލިކްޓް ވިތް ދަ ލޯ" ގެ ނަމުގައި އަންގާރަ ދުވަހު ފެށި މަސައްކަތު ބައްދަލުވުމުގައި ވާހަކަފުޅު ދައްކަވަމުންނެވެ. މަސައްކަތު ބައްދަލުވުން ފައްޓަވައިދެއްވަމުން ދެއްކެވި ވާހަކަފުޅުގައި މިނިސްޓަރު އިމްރާން ވިދާޅުވީ މި މިޕްރޮގްރާމް ފެށިގެން ދަނީ އެމަޤްސަދަށްޓަކައި އެދިމާއަށް ކަމަށެވެ. މިއީ ދިވެހިރާއްޖޭގައި އަލަށް ފެށިގެންދާކަމަކަށްވާތީ މިކަމަށް އެންމެން ވަރަށް ބޮޑަށް އަހުލުވެރިވާން ޖެހޭނެކަންވެސް މިނިސްޓަރު ފާހަގަކުރެއްވިއެވެ. އެކަމަށް ވަރަށްބޮޑަށް ތައްޔާރުވާންޖެހޭނެކަން ފާހަގަކުރައްވާ މިނިސްޓަރު ވިދާޅުވީ މިކަން ކާމިޔާބުކުރަން ވަރަށް ގިނަ ހުނަރުތައް ދަސްކުރަން ޖެހޭކަމަށެވެ.
މީގެއިތުރުން މިކަން ކުރެވޭނީ އަޅުގަނޑުމެން އެންމެން ގުޅިގެން ކަމަށާއި, ކުޑަކުދިންގެ މުޅި އަދުލުގެ ނިޒާމް ފުރިހަމަކުރުމަށްޓަކައި ދައުލަތުގެ ހުރިހާ މުއައްސަސާތަކެއް އެކުގައި މަސައްކަތްކުރުމަކީ ވަރަށް މުހިއްމުކަމެއްކަމަށް މިނިސްޓަރު ވިދާޅުވިއެވެ. ނަތީޖާއަކާ ހަމައަށް ދެވޭނީ ގުޅުންހުރި ހުރިހާ މުއައްސަސާތައް އެކުގައި މަސައްކަތްކޮށްގެންކަން މިނިސްޓަރު ފާހަގަކުރެއްވިއެވެ.
މިމަސައްކަތް ކުރުމުގައި އަޅުގަނޑުމެންގެ ވިސްނުން ބަހައްޓަންޖެހެނީ އަޅުގަނޑުމެން މިއަދުގެ ހާލަތު އޮތްގޮތުން އެންމެ ކުއްޖަކު ރަނގަޅުކުރެވުނަމަވެސް އެއީ މިމުޅި މައްސަލައިން އަރައިގަތުމަށް ނެރެވޭ މުހިއްމު ނަތީޖާއެއްގޮތުގައި ފާހަގަކޮށްގެން. އަޅުގަނޑުމެންގެ ތެރޭން މިމަސައްކަތްކުރާ ބޭފުޅުންނަށް ހިތްވަރެއް ލިބޭނީވެސް އެވިސްނުމުގައި މަސައްކަތްކޮށްގެން. މުޅި މައްސަލައަށް އެއްދުވަހުން އެއްފަހަރާ ހައްލުހޯދިދާނެކަމަށް ޤަބޫލުކޮށްގެން މަސައްކަތް ކުރާނަމަ އަޅުގަނޑުމެންނަށް ވަރަށްބޮޑު ނާއުއްމީދަކާ މާޔޫސްކަމެއް އަންނާނެހޯމް މިނިސްޓަރު އިމްރާން އަބްދުﷲ
މިނިސްޓަރު ވިދާޅުވީ ވޭތުވެދިޔަ ބައިގަރުނެއްހާ ދުވަހުގެ ތެރޭގައި ރާއްޖޭގެ މުޅި އިޖުތިމާއީ ވެއްޓަށް އަންނަމުން ދިޔަ ބަދަލުތަކުގެ ތެރެއިން އެންމެ ބޮޑު އެއް ބަދަލެއް އައިސްފައިވަނީ އަޅުގަނޑުމެންގެ ޢާއްމު ބަހުރުވައިންނަމަ ކުޑަކޮށް ސިޔާސަވަމުންދާ ކުޑަކުދިންނަށް ރަނގަޅު ހައްލެއް ހޯދޭނެ މަގެއް އަޅުގަނޑުމެންނަށް ރަނގަޅަށް ހޯދިފައި ނެތުމުންކަމަށެވެ. މިމަސައްކަތް އެކިސަރުކާރުތަކުން އެމިންވަރަށް ކުރަމުންގޮސް މިސަރުކާރު އައުމާއެކު އެންމެ އިސްކަމެއްދިން އެއްކަމަކީ ކުޑަކުދިންގެ އަދުލުގެ ޤާނޫނު ވުޖޫދުކުރަންކަމަށް މިނިސްޓަރު ވިދާޅުވިއެވެ. މި ސަރުކާރުން ވުޖޫދުކުރި ޤާނޫނުގެ ތެރެއިން ކުޑަކުދިންގެ އަދުލުގެ ޤާނޫނު ހިމެނެނީ އެންމެ ކުރީކޮޅު ވުޖޫދުކުރި ޤާނޫނުގެ ތެރެއިންކަން މިނިސްޓަރު ފާހަގަކުރެއްވިއެވެ.
ކުޑަކުދިންގެ އަދުލުގެ ޤާނޫނު ތަންފީޒުކުރުމަށް ހުރި ގޮންޖެހުންތަކާއެކުވެސް އެމަސައްކަތް ކުރައްވަމުން ގެންދަވާކަން ފާހަގަކުރައްވާ މިނިސްޓަރު ވިދާޅުވީ ރެސިޑެންޓަލް ފެސިލިޓީޒް އަދި ހާފްވޭ ހައުސް ހެދުމުގެ މަސައްކަތަކީ އެކަމަށް ވަގުތުކޮޅެއް ނަގާނެ ކަންކަންކަމަށް ވިޔަސް އެމަސައް މިއަދު ފެށިފައިވާކަމަށެވެ. މިއަހަރު ނިމިގެންދާއިރު ނުވަތަ އަންނަ އަހަރުގެ ކުރީކޮޅު އެމަސައްކަތުގައި އަމަލީ ނަތީޖާ އަޅުގަނޑުމެންނަށް ފެނި ރަނގަޅަށް މިކަންކަން ފަށައިގަނެވޭނެކަމަށް އުއްމީދުކުރައްވާކަމަށް މިނިސްޓަރު ވިދާޅުވިއެވެ.
މިތަމްރީނުތައް ކުރިއަށްގެންދާއިރު މިމަސައްކަތުގައި ޔޫއެންގެ ތަފާތު އެޖެންސީތަކުން ޚާއްސަކޮށް ޔޫއެންއޯޑީސީގެ ފަރާތުން ދެއްވާ އެހީތެރިކަން ފާހަގަކުރައްވާ އެއެޖެންސީތަކަށް މިނިސްޓަރު ޝުކުރު އަދާކުރެއްވިއެވެ. ޔޫއެންއޯޑީސީގެ އެހީތެރިކަމާއެކު މިއަދު ފެށި މަސައްކަތު ބައްދަލުވުން މިމަހުގެ 30 ވަނަ ދުވަހުގެ ނިޔަލަށް ކުރިއަށްދާނެއެވެ. މިމަސައްކަތުބައްދަލުވުން އަމާޒުކޮށްފައިވަނީ ޑިޕާރޓްމަންޓް އޮފް ޖުވެނައިލް ޖަސްޓިސްއާއި, ޕީޖީއާއި, ދިވެހި ފުލުހުންގެ ޚިދުމަތާއި, ޖުވެނައިލް ކޯޓާއި, އެޑިއުކޭޝަން މިނިސްޓްރީއާއި, ޖެންޑަރ މިނިސްޓްރީގެ ބޭފުޅުންނަށެވެ.
