އެމްޓީސީސީގެ ހުނަވަރު ޕްރޮގްރާމް ނިންމި 52 ފަރާތަކަށް ސެޓްފިކެޓް ހަވާލުކޮށްފި
އިތުރު 32 ބައިވެރިން ދަނީ މިހާރުވެސް ޕްރޮގްރާމް ފުރިހަމަ ކުރަމުން
އެމްޓީސީސީ ހުނަވަރު ޕްރޮގްރާމް ނިންމި ބައިވެރިއަކަށް ސެޓްފިކެޓް ހަވާލު ކުރަނީ
މީހުން ތަމްރީން ކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހިންގާ ހުނަވަރު ޕްރޮގްރާމް ނިންމި ފަރާތްތަކަށް ސެޓްފިކެޓް ހަވާލު ކޮށްފިއެވެ.
ހޯމަ ދުވަހު ބޭއްވި ރަސްމިއްޔާތެއްގައި ބައިވެރިންނާ ސެޓްފިކެޓް ހަވާލު ކޮށްދެއްވީ އެ ކުންފުނީގެ ސީއީއޯ އާދަމް އާޒިމްއާއި ޗީފް އޮޕަރޭޓިންގ އޮފިސަރު ޝާހިދު ހުސައިން މޫސާއެވެ. މި ރަސްމިއްޔާތުގައި 52 ފަރާތަކަށް ވަނީ ޕްރޮގްރާމް ނިންމި ކަމުގެ ސެޓްފިކެޓް ހަވާލުކޮށްފައެވެ.
2018ވަނަ އަހަރު ތައާރަފު ކުރި އެމްޓީސީސީގެ ހުނަވަރު ޕްރޮގްރާމުގެ ދަށުން އެކި ދާއިރާތަކުން ޓެކްނިކަލް ވަޒީފާތަކަށް މީހުން ތަމްރީން ކުރެއެވެ. އަހަރުގެ ކޮންމެ ކުއަރޓާއެއްގައި ވެސް މި ހަރަކާތް އެމްޓީސީސީން ކުރިއަށްގެންދެއެވެ.
ހޯމަ ދުވަހު ބޭއްވި ރަސްމިއްޔާތުގައި ހުނަވަރު ލައިސެންސިންގ ޕްރޮގްރާމުގެ ދަށުން ބަސް ޑްރައިވަރުންގެ ގޮތުގައި 43 މީހުން ތަމްރީން ފުރިހަމަކޮށްފައިވާއިރު ހުނަވަރު ޓެކްނިކަލް ސްކިލް ޑިވެލޮޕްމަންޓް ޕްރޮގްރާމުގެ ދަށުން އެސިސްޓެންޓް ސައިޓް ސުޕަވައިޒަރުންގެ ގޮތުގައި 6 އަދި މެރިން މެކޭނިކުންގެ ގޮތުގައި 3 މީހުން ވަނީ ތަމްރީން ފުރިހަމަ ކޮށްފައެވެ.
އެމްޓީސީސީގެ ސީއީއޯ އާދަމް އާޒިމް ވިދާޅުވީ އެ ކުންފުނިން އެންމެ އިސްކަމެއް ދޭ އެއް ކަމަކީ މީހުން ތަމްރީން ކުރުމާއި އުނގަންނައިދިނުން ކަމަށެވެ. އަދި އެމްޓީސީސީ އިން ދިވެހިންނަށް ފަސޭހައިން ވަޒީފާގެ ފުރުސަތުތައް ލިބެން ހުންނަ ކަމަށާއި ނަމަވެސް ބައެއް ފަރާތްތަކުން އެ ފުރުސަތު ލިބި ވެސް ދޫކޮށްލާ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ އެމްޓީސީސީގެ ވަޒީފާތައް ގިނަ ފަހަރު ދޫކޮށްލަނީ އެ މަސައްކަތަކީ ކުރަން ހަޑި މަސައްކަތެއް ކަމުގައި ދެކިންގެން ކަމަށެެވެ. މިއި ބަދަލު ކުރަންވީ ވިސްނުމެއް ކަމަށް ވެސް އޭނާ ވިދާޅުވިއެވެ.
އެމްޓީސީސީ ހުނަވަރު ޕްރޮގްރާމްއަކީ ވަޒީފާގެ ބާޒާރަށް ތަޖުރިބާ ހުރި މަސައްކަތްތެރިން ބިނާ ކުރުމަށާއި ހެވީ ވެހިކަލް އޮޕަރޭޓަރުންނާއި ކޮންސްޓްރަކްޝަން ދާއިރާ ފަދަ ދާއިރާތަކުން ދިވެހިންނަށް ފުރުސަތުތައް ފަހި ކޮށްދިނުމަށް ހިންގާ ޕްރޮގްރާމްއެކެވެ. މި ޕްރޮގްރާމުގެ ދަށުން އަންހެނުންނަށް ވެސް އެމްޓީސީސީން ފުރުސަތު ދެއެވެ.
އެޕްރެންޓިސްޝިޕް ޕްރޮގްރާމެއްގެ ގޮތުގައި ކުރިއަށްގެންދާ މި ޕްރޮގްރާމުގައި ސައިޓުތަކުގައި 3 މަސް ދުވަހު އަމަލީ ތަޖުރިބާ ހޯދުމުގެ ފުރުސަތު ލިބެއެވެ. މި މުއްދަތުގައި ކޮންމެ ބައިވެރިއަކަށް އެލަވެންސްގެ ގޮތުގައި 5000 ރުފިޔާ ދޭއިރު 3 މަސް ތެރޭގައި ކާމިޔާބުކަމާއެކު ޕްރޮގްރާމް ނިންމާލައިފިނަމަ ވަޒީފާގެ ފުރުސަތު ވެސް އެމްޓީސީސީން ދެއެވެ.
ހޯމަ ދުވަހު މި ޕްރޮގްރާމް ނިންމި 52 މީހުންގެ އިތުރުން މިހާރު ވެސް 32 މީހުން ތަމްރީން ހޯދަމުން ދާ ކަމަށް އެމްޓީސީސީން މައުލޫމާތު ދީފައި ވެއެވެ.
