ލަންކާއަށް ބޭނުންވާ އިންސާނީ އެހީތެރިކަން އިންޑިއާއިން ފޯރުކޮށްދީފި
24 ޖޫން 2022 | ހުކުރު 13:50އިންޑިއާއިން ވަނީ 3 ބިލިއަން ރުޕީސްގެ ތަކެތި ލަންކާއަށް ފޯރުކޮށްދީފައި
އިންޑިއާއިން ލަންކާއަށް އިންސާނީ އެހީ ފޯރުކޮށްދިނުން
ސްރީލަންކާގެ ރައްޔިތުންނަށް ބޭނުންވާ ކާޑާއި އަދި މީނޫންވެސް އަސާސީ ބައެއް ތަކެތި އިންޑިއާއިން ފޯރުކޮށްދީފިއެވެ.
އިންޑިއާއިން ވަނީ 3 ބިލިއަން ރުޕީސްގެ ތަކެތި ލަންކާއަށް ފޯރުކޮށްދީފައެވެ. އިންޑިއާއިން ލަންކާއަށް ފޮނުވާފައިވާ ތަކެތީގެ ތެރޭގައި 14،700 މެޓްރިކް ޓަނުގެ ހަނޑުލާއި، 250 މެޓްރިކް ޓަނުގެ ހިކި ކިރާއި، 38 މެޓްރިކް ޓަނުގެ ބޭސް ހިމެނެއެވެ.
މިއީ އިންޑިއާއިން ލަންކާއަށް ބޭނުންވާ އަސާސީ ތަކެތި ފޯރުކޮށްދޭ ދެވަނަ ފަހަރެވެ. މީގެ ކުރިން އިންޑިއާއިން ވަނީ 40،000 މެޓްރިކް ޓަނުގެ ހަނޑުލާއި، 500 މެޓްރިކް ޓަނުގެ ހިކި ކިރާއި، ބޭސް ފޯރުކޮށްދީފައެވެ.
އިންޑިއާއިން ލަންކާއަށް އެކި ގޮތްގޮތަށް އެހީތެރިކަން ފޯރުކޮށްދެމުންދާއިރު، މިއަހަރުގެ މިހާތަނަށް އިންޑިއާއިން ވަނީ 3.5 ބިލިއަން ޑޮލަރުގެ އެހީ ލަންކާއަށް ފޯރުކޮށްދީފައެވެ. މީގެ އިތުރުން 3 ފަހަރެއްގެ މަތިން ލަންކާއަށް ލޯނު ދޫކޮށްފައިވެއެވެ. މީގެ އިތުރުން 2 ބިލިއަން ޑޮލަރުގެ ބޭހާއި، އަދިވެސް ސިއްހީ ދާއިރާއަށް ބޭނުންވާ އެނޫންވެސް ތަކެތި އިންޑިއާއިން ވަނީ ފޯރުކޮށްދީފައެވެ.
