ޖޫރިމަނާ ދެއްކުމުން ބިދޭސީން ތިބުމުން ބަންދުކުރި ގޮޅިތައް ހުޅުވަން ހުއްދަ ދީފި
ގޮޅިތަކުގައި ވެސް ބިދޭސީން ނުބޭތިއްބުމަށް ޝަރުތުކޮށްފައިވާނެ
ލޯކަލް މާރުކޭޓް ތެރެ
ޖޫރިމަނާ ދެއްކުމުން ބިދޭސީން ތިބުމުން ބަންދުކުރި ގޮޅިތައް ހުޅުވަން ހުއްދަ ދީފިއެވެ.
ގޮޅިތަކުގައި ބިދޭސީން ބޭތިއްބުން މަނާކޮށްފައި ވަނިކޮށް، އެކަން ކުރުމުން ދަތުރުވެރިންގެ މާރުކޭޓުގެ 46 ގޮޅިއެއް މާލެސިޓީ ކައުންސިލުން ބަންދުކުރުމަށްފަހު ޖޫރިމަނާ ދެއްކުމުން ފަސް ގޮޅި ފިޔަވައި އެހެން ގޮޅިތައް މިހާރު އަލުން ހުޅުވާފައިވާ ކަމަށް މާލޭ ސިޓީ ކައުންސިލްގެ މީޑިއާ އޮފިޝަލް މަރިޔަމް ޝިއުނާ ވިދާޅުވިއެވެ.
ޝިއުނާ ވިދާޅުވީ އަލުން ހުޅުވާފައިވާ ގޮޅިތަކުގައި ވެސް ބިދޭސީން ނުބޭތިއްބުމަށް ޝަރުތުކޮށްފައިވާނެ ކަމަށެވެ. މާލެ ސިޓީ ކައުންސިލުން ކޮންމެ ހަފްތާއަކު ވެސް އިންސްޕެކްޝަންތައް ކުރިއަށް ގެންދާނެ ކަމަށް ވެސް އޭނާ ވިދާޅުވިއެވެ.
ދަތުރުވެރިންގެ މާރުކޭޓުގައި ބިދޭސީންގެ އުޅޭތީ އެތަނުގައި ތިބޭ ދިވެހީން އަބަދުވެސް ކަންބޮޑުވުން ފާޅުކުރެއެވެ. ރާއްޖޭގައި ފައިސާ ލިބޭ ކޮންމެ ކަމެއްގައި ބިދޭސީންނަށް ހަރަކާތްތެރިވެވުމަކީ ނުހަނު ފަސޭހަކަމެކެވެ. އެއީ ކިތަންމެ ގިނަ ދިވެހިން ހަރަކާތްތެރިވާ ވިޔަފާރިއެއްނަމަވެސް އެފުރުސަތު އޮންނަނީ ފަހިވެފައެވެ. އޭގެ ފައިދާ ބިދޭސީން އަންނަނީ ނަގަމުންނެވެ. އެކަން މިއަންނަނީ ހުރިހާ ދާއިރާތަކެއްގައިވެސް ފެންނަމުންނެވެ.
ރާއްޖޭގައި ބިދޭސީންގެ މައްސަލަ ބޮޑުވެފައިވާއިރު ޤަވާއިދާ ޙިލާފަށް ވެސް ވަރަށް ގިނަ އަދަދެއްގެ ބިދޭސީން ދަނީ ދިރިއުޅެމުންނެވެ. ކުރިއަށް އޮތް އެއްމަސް ދުވަހުގެ ތެރޭގައި، ބިދޭސީންގެ މައްސަލަ ހައްލުކުރުމުގެ މަސައްކަތް އަލުން އިރާދަކުރެއްވިއްޔާ ފެށޭ ވަރަށް މަސައްކަތް ކުރިއަށް ގެންދެވޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙު ވަނީ ދާދި ފަހުން ވިދާޅުވެފައެވެ.
އިބްރާހިމް މުހައްމަދު ސާލިޙު ނޫސްވެރިންނާއެކު ބޭއްވެވި ބައްދަލުވުމުގައި ރާއްޖެއެމްވީން ދެންނެވި ސުވާލަކަށް ޖަވާބުދެއްވަމުން ރައީސް ވިދާޅުވީ ވެރިކަމާ ހަވާލުވެވަޑައިގެންނެވި އިރު ވެސް ބިދޭސީންގެ މައްސަލަ، ޚާއްޞަކޮށް ޤަވާއިދާ ޚިލާފަށް އުޅޭ ބިދޭސީންގެ މައްސަލައަކީ، ވަރަށް ބޮޑުވެފައި އޮތް މައްސަލައެއް ކަމަށެވެ. އެހެންކަމުން މިސަރުކާރުން ޚާއްސަ ސަމާލުކަމެއްދީގެން، އެ މަސައްކަތަށް ހައްލެއް ހޯދުން ކުރިއަށް ގެންދިޔަ ކަމަށާއި، ކޮވިޑާ އެކީގައިވެސް އެކަން ކުރިއަށްދިޔަ ކަމަށް ރައީސް ވިދާޅުވިއެވެ.
އަދި ހުއްދަނެތި ރާއްޖޭގައި އުޅޭ މީހުންގެ ތެރެއިން ވޮލަންޓިއަރ ކޮށްގެން، ގާތްގަނޑަކަށް 14000 މީހުން ފުރުވާލެވުނު ކަމަށެވެ. އަދި މަގުމަތިން، ގަވާއިދާ ޚިލާފަށް އުޅެގެން 8000 މީހުންނާއެކު، މުޅިއެކު 24000 މީހުން އެބުރުގައި ފޮނުވާލެވުނު ކަމަށް ރައީސް ވިދާޅުވިއެވެ.
މީގެއިތުރުން ރައީސް ވިދާޅުވީ ހުއްދަ ނެތި އުޅޭ ބިދޭސީން ނިސްބަތްވާ ޤައުމުތަކުގެ އެމްބަސީތަކާ ސަރުކާރުން އަލުން މަޝްވަރާތައް ކުރިއަށް ގެންދާނެކަމަށެވެ. އަދި ޕާސްޕޯޓް ނެތް މީހުންވެސް އުޅޭތީ، އެމީހުންގެ ޕާސްޕޯޓުތައް ހައްދައި، އެމީހުން ފުރުވާލުމުގެ ކަންތައްތައް ކުރިއަށްދާނެ ކަމަށް ރައީސް ވިދާޅުވިއެވެ.
