މަސްމާރުކޭޓާއި ލޯކަލް މާރުކޭޓު އަދި ދަތުރުވެރިންގެ މާރުކޭޓުގައި ހުރި މައްސަލަތައް ހައްލުކުރަނީ
މަސް މާރުކޭޓު ސަރަހައްދުގައި އައިސް ލިބޭނެ އިންތިޒާމު ހަމަޖައްސާނެ
ދަތުރުވެރިންގެ މާރުކޭޓް، މާރުކޭޓްގެ މައްސަލަތަކުގައި މިހާރު ވެސް ވިޔަފާރިވެރިންގެ ގިނަ ކަންބޮޑުވުންތަކެއް ހުރޭ
ކުރިއަށް އޮތް ފަސް އަހަރަށް ފާސްކޮށްފައިވާ "ރައްޔިތުން އެދޭ އަމާޒަށް" މާލޭ ސިޓީ ކައުންސިލްގެ ސްޓްރެޓެޖިކް އެކްޝަން ޕްލޭންގައިވާ ގޮތަށް، މަސްމާރުކޭޓާއި، ލޯކަލް މާރުކޭޓާއި، ދަތުރުވެރިންގެ މާރުކޭޓުގައި ހުރި މައްސަލަތައް ހައްލުކުރުމަށް ގިނަ މަސައްކަތްތަކެއް ކުރަން ނިންމައިފިއެވެ.
މާލެ ސިޓީ ކައުންސިލްގެ 4 ވަނަ ދައުރުގެ 3 ވަނަ ރަސްމީ އާއްމު ޖަލްސާގެ ނިންމުންތަކުގައި ބުނެފައިވަނީ މަސް މާރުކޭޓުގައި ހަދާފައިވާ އަށިތަކުގެމަތީގައި އައިސް އަޅާ އެ އައިސް މަތީގައި، މަސްވެރިންނަށާއި މަސް ގަނެވިއްކާ ފަރާތްތަކަށް ފުރުސަތު ލިބޭގޮތަށް ގުރުއަތުލައިގެން މަސް ވިއްކޭނެ ނިޒާމު ގާއިމުކުރާނެ ކަމަށާއި، މަސް މާރުކޭޓުގައި ފޮށިގަނޑުގައި ބަހައްޓައިގެން މަސް ވިއްކުން ނިމުމަކަށް ގެންނާނެ ކަމަށެވެ. އަދި ކުދިމަސް (މުށިމަސް، ރިންމަސް ފަދަ) ވިއްކަން ޚާއްސަ ކުރެވިފައިވާ ގޮޅިތަކުގައި ހުކުރު ދުވަހު މަސް ނުވިއްކޭގޮތަށް އޮތް އޮތުން ނިމުމަކަށް ގެނެސް ހުކުރު ދުވަހު މަސް ވިއްކޭ ގޮތަށް ބަދަލުކުރާނެ ކަމަށެވެ.
ކައުންސިލުން ބުނީ މަސް މާރުކޭޓު ސަރަހައްދުގައި އައިސް ލިބޭނެ އިންތިޒާމު ހަމަޖައްސާނެ ކަމަށާއި، މަސް މާރުކޭޓު ކޮންމެ ދުވަހެއްގެ މަސައްކަތް ނިންމައި، ރަނގަޅަށް ސާފުކޮށް ބަލަހައްޓާ ނިޒާމު ގާއިމުކުރާނެ ކަމަށެވެ. ކައުންސިލުން ބުނީ ލޯކަލް މާރުކޭޓު ސަރަހައްދުގައި މަސްވެރިންނަށް ހަދާފައި ހުރި ގޮޅިތައް އަލުން އިއުލާންކޮށް އަލުން ކުއްޔަށް ދޫކުރާނެ ކަމަށާއި، ފަޅުތެރޭގައި މަސް ގަނެވިއްކާ ފަރާތްތަކަށް ޚާއްސަ ހުއްދައެއްގެ ދަށުން، ކަމޭބެހޭ ހުރިހާ މިންގަނޑުތަކަކަށް ފެތޭގޮތަށް، ވަކި އަދަދަކަށް ދޯނި ފައްތިޔާ ދޭނެ ކަމަށެވެ. އެން ހިފައިގެން އައިސް މަޑުކޮށްލަން ހުރަސް ތޮށީގެ އިރުމަތިން، ކަނޑައެޅޭ އުސޫލަކުން ޖާގަ ދިނުމާއި ލޯކަލް މާރުކޭޓު ސަރަހައްދުގައި މަސްވެރިންނަށް ހަދާފައި ހުރި ގޮޅިތައް އަލުން އިއުލާންކޮށް ކުއްޔަށް ދޫކުރާނެ ކަމަށް ކައުންސިލުން ބުނެއެވެ. މަސް މާރުކޭޓާ ބެހޭ ގަވާއިދު ހަދައި ތަންފީޒުކުރުމާއި މަސް މާރުކޭޓުގެ ކަންކަން ބެލެހެއްޓުމަށް އިތުރު ސުޕަވައިޒަރުން ހަމަޖައްސާނެ ކަމަށް ކައުންސިލުން ބުނެއެވެ.
ކާނުތައް ސާފުކޮށް، ކާނުތައް އެއްކޮށް ބަދަލުކުރާނެކަން ފާހަގަކޮށް ކައުންސިލުން ބުނީ މަސް މާރުކޭޓުގައި މަސް ކަނޑަން ބޭނުންކުރާ ފެނަކީ ކަމާބެހޭ އިދާރާތަކުން ކަނޑައަޅާފައިވާ ރައްކާތެރިކަމުގެ މިންގަނޑުތަކާ އެއްގޮތް ފެނެއްކަން ކަށަވަރުކުރުމަށް ގަވާއިދުން ޓެސްޓުކުރާނެ ކަމަށާއި، ވިއްކާ މަހުގެ ކޮލިޓީ ކަށަވަރު ކުރުމަށް މަހުގެ ސާމްޕަލް ގަވާއިދުން ޓެސްޓުކުރާނެ ކަމަށެވެ.
ކައުންސިލުން ބުނީ ލޯކަލް މާރުކޭޓުގެ އެއްކޮޅުން އަނެއްކޮޅަށް މާރުކޭޓުގެ މެދުން، ދެކުނުން އުތުރަށް ޕާތްވޭ އެއް ހަދާނެ ކަމަށާއި، ލޯކަލް މާރުކޭޓުގެ ގޮޅިތަކުގައި ފްރިޖް ބެހެއްޓުމުގެ ހުއްދަ ދޭނެ ކަމަށެވެ. އެ ފްރިޖްގައި ވިއްކޭނޭ ތަކެތި ގަވާއިދުގައި ބަޔާންކުރާނެ ކަމަށާއި، ކަރަންޓް ބިލު އެފަރާތުން ދައްކާ ގޮތަށް، ނުވަތަ ވަކި އަދަދެއް އެއަށް ނަގާ ގޮތަށް ހަމަޖައްސާނެ ކަމަށް ކައުންސިލުން ބުނެއެވެ.
ކައުންސިލުން ބުނީ ލޯކަލް މާރުކޭޓާއި ދަތުރުވެރިންގެ މާރުކޭޓުގައި 2 ފާހާނާ ހަދައިދިނުމާއި، 2 މަސް ދުވަހުގެ މުހުލަތެއް ދީ، އިސްލާހު ނުކޮށްފިނަމަ، ބިދޭސީން ސޭޓުންގެ ގޮތުގައި ބައިތިއްބާ ގޮޅިތަކުގެ އެގްރީމެންޓް ބާތިލުކުރުމުގެ އިތުރުން ލޯކަލް މާރުކޭޓުގައި ގޮޅިއެއްގެ ކުލި، އަކަފޫޓަކަށް ޖެހޭވަރަށް ދަތުރުވެރިންގެ މާރުކޭޓުގައި ވެސް އެ ރޭޓަށް ގޮޅީގެ ކުލި ކުޑަކުރަން ނިންމާފައިވާ ކަމަށެވެ.
ލޯކަލް މާރުކޭޓުގައި ގޮޅި ކުއްޔަށް ނެގި ފަރާތުން އެހެން ފަރާތަކަށް ކުއްޔަށްދީފައި ހުންނަ ގޮޅިތައް ފާހަގަކޮށް، 2 މަސް ދުވަހުގެ މުހުލަތެއް ދީ، އެގްރީމެންޓާއި ޚިލާފުވެފައިވާ ފަރާތްތަކުގެ އެގްރީމެންޓް ބާތިލުކޮށް އެ ގޮޅިތައް އަލުން އިއުލާންކުރާނެ ކަމަށް ވެސް ކައުންސިލުން ބުނެއެވެ.
