މިއަދަކީ މިއީ ރޯދަމަހުގެ ދެވަނަ ދުވަހަށް ވާއިރު މިއަދު ލޯކަލް މާރުކޭޓުގައި މޭވާއާއި ތަރުކާރީގެ އަގު ހުރީ އެއްވަރެއްގައި ހިފެހެއްޓިފައެވެ.

މިގޮތުން މިހާރު މާރުކޭޓުގައި އެންމެ ބޮޑަށް އަގު އުފުލިފައިވާ ލުނބޯ ކިލޯއެއްގެ އަގު ހުރީ 100 ރުފިޔާއާއި 120 ރުފިޔާއާ ދެމެދުގެ އަގެއްގައެވެ. ފޭރު ކިލޯއެއް 80 ރުފިޔާއާއި 120 ރުފިޔާއާ ދެމެދުގެ އަގެއްގައި ހުރިއިރު، ތައި އަނބު ކިލޯއެއް 250 ރުފިޔާއަށް، އެވަކާޑޯ ކިލޯއެއް 80 ރުފިޔާއަށް ހުރިއރު ކަރާ ކިލޯއެއް އުޅެނީ 25 ރުފިޔާއަށެވެ.

ތަރުކާރީގެ ތެރެއިން ކެބެޖު ކިލޯއެއް އުޅެނީ 40 ރުފިޔާއަށެވެ. ކިއުކަމްބާ ކިލޯއެއް 45 ރުފިޔާއަށް އުޅޭއިރު، ފާގަ ކިލޯއެއް 50 ރުފިޔާއަށް، ކޮޕީފަތް ބޮނޑިއެއް 10 ރުފިޔާ، ލެޓިއުސް 50 ރުފިޔާއަށް ހުރިއިރު، ބީންސް ކިލޯއެއް ހުރީ 65 ރުފިޔާއަށެވެ. އަދި ކެރެޓު ކިލޯއެއް 35 ރުފިޔާއަށް ހުރިއިރު ބެލް ޕެޕަރ ކިލޯއެއް ހުރީ 85 ރުފިޔާއަށެވެ.

މައިގަނޑު ގޮތެއްގައި ބާޒާރުގައި ހުރިހާ އެއްޗެއްގެ އަގުވެސް ހުރީ އެއްވަރެއްގައި ހިފެހެއްޓިފައެވެ. އެހެންނަމަވެސް ލިބުން ދަތި ބައެއް ތަކެތި ހުރިކަން ވިޔަފާރިވެރިން ފާހަގަކޮށްފައިވެއެވެ. އެގޮތުން ކުއްޅަފިލާފަތާއި، ރާއްޖެ މެލަން އަދި ލުނބޯީ ނުލިބޭކަމަށް އެމީހުން ފާހަގަކުރެއެވެ.

މީގެ އިތުރުން މާލޭ މަސްމާރުކޭޓުގައި ކަނޑުމަހުގެ އަގު މިއަދުވެސް ހުރީ 50 ރުފިޔާއާއި 55 ރުފިޔާއާ ދެމެދުގައި ހިފެހެއްޓިފައެވެ. ރަމަޟާން މަސް ފެށުނުއިރު ކަނޑުމަހުގެ އަގު ވަނީ ވަރަށް ބޮޑުވެފައެވެ. މީގެ ކުރިން ކަނޑުމަސް ކިލޯއެއް 25 ރުފިޔާއަށް ހުރިއިރު މިހާރު މި އަގު ބޮޑުވެފައިވަނީ މަސްބާނާ މިންވަރު ދަށްވުމުން ކަމަށް މަސްމާރުކޭޓުގެ ވިޔަފާރިވެރިން ބުނެއެވެ. 10 ވަރަކަށް ރޯދަ ފަހުން މަސްވެރިކަން ރަނގަޅުވެ މަހުގެ އަގުތައް ތިރިވާނެ ކަމަށް ބެލެވޭ ކަމަށް އެމީހުން ފާހަގަކުރެއެވެ.