ރައީސް މުއިއްޒުގެ މޭޔަރު ކަމުގައި ވިލިމާލޭގައި މާރުކޭޓެއް އަޅައިދިން ކުންފުންޏަކަށް ފައިސާ ދިނުމަށް، ސިޓީ ކައުންސިލްގެ މައްޗަށް ހުކުމްކޮށްފި

ވިލިމާލޭގައި ވަގުތީ ލޯކަލް މާރުކޭޓެއް އެޅުމުގެ މަސައްކަތް ކުރި ކުންފުންޏަކަށް 150،000 ރުފިޔާއަށް ވުރެ ގިނަ ފައިސާ ދެއްކުމަށް މާލޭ ސިޓީ ކައުންސިލްގެ މައްޗަށް ސިވިލް ކޯޓުން ހުކުމްކޮށްފިއެވެ.

ރައީސް މުއިއްޒު މާލެ ސިޓީ ކައުންސިލްގެ މޭޔަރަކަށް ހުންނަވައިގެން މި މަސައްކަތް 2022 ވަނަ އަހަރު ހަވާލުކޮށްފައިވަނީ ގްލޯރިއަސް ޓްރޭޑިން އެންޑް ޝިޕިން ކޮމްޕެނީ ޕްރައިވެޓް ލިމިޓެޑް އާއެވެ. މި ކުންފުނިން ވަނީ ވަގުތީ މާރުކޭޓުގެ މަަސައްކަތް ނިންމާ ރައީސް މުއިއްޒު މޭޔަރަކަށް ހުންނަވަނިކޮށް ހަވާލު ކޮށްފައެވެ. ނަމަވެސް އޭގެ ފަހުން މަސައްކަތް ކުރި ކުންފުންޔަށް ދޭންޖެހޭ ފައިސާގެ މައްސަލަތަކެއް ވަނީ ފެންމަތިވެފައެވެ.

Advertisement

ކޯޓުގެ ހުކުމުގައި ވާގޮތުން، ގްލޯރިއަސް ޓްރޭޑިން އެންޑް ޝިޕިން ކޮމްޕެނީ ޕްރައިވެޓް ލިމިޓެޑްއާއި މާލޭ ސިޓީ ކައުންސިލާ ދެމެދު 2022 ވަނަ އަހަރު ވެވުނު އެއްބަސްވުމެއްގެ ދަށުން، އެ ކުންފުނިން ވަނީ މާރުކޭޓް އެޅުމުގެ މަސައްކަތް ފުރިހަމަކޮށް ހަވާލުކޮށްފައެވެ. ނަމަވެސް މަޝްރޫޢުގެ ޖުމްލަ އަގުގެ ތެރެއިން ރިޓެންޝަން ފައިސާގެ ގޮތުގައި ހިފެހެއްޓި ފަސް ޕަސެންޓަށްވާ 125،841.48 ރުފިޔާ ހޯދުމަށް ބިލު ހުށަހެޅުމުންވެސް، މާލޭ ސިޓީ ކައުންސިލުން އެ ފައިސާ ދޫކޮށްފައެއް ނުވެއެވެ.

މި މައްސަލައިގައި ޖަވާބުދާރީވުމަށް ކޯޓުން ފުރުސަތު ދިންނަމަވެސް، މާލޭ ސިޓީ ކައުންސިލުން އެއްވެސް ޖަވާބެއް ދީފައިނުވާތީ، ކައުންސިލްގެ ޣައިރު ހާޒިރުގައި ސިވިލް ކޯޓުން ވަނީ ރިޓެންޝަން ފައިސާގެ އިތުރުން ޝަރީޢަތުގެ ޚަރަދުގެ ގޮތުގައި 25،000 ރުފިޔާ ހިމަނައިގެން، ޖުމްލަ 150،841.48 ރުފިޔާ ގްލޯރިއަސް ޓްރޭޑިންގ އެންޑް ޝިޕިންގ އަށް ދެއްކުމަށް ސިޓީ ކައުންސިލްގެ މަށްޗަށް ހުކުމް ކޮށްފައެވެ.

ހުކުމުގައިވާ ގޮތުން، މާލޭ ސިޓީ ކައުންސިލުން މި ފައިސާ 30 ދުވަހުގެ ތެރޭގައި ސިވިލް ކޯޓަށް ދައްކަން ޖެހޭނެއެވެ. މިއީ ވިލިމާލޭގެ ވަގުތީ ލޯކަލް މާރުކޭޓުގެ މަސައްކަތާއި ގުޅިގެން ދިމާވެފައިވާ ފައިސާގެ މައްސަލައެއް ކަމަށްވާއިރު، މި މައްސަލައިގައި މާލޭ ސިޓީ ކައުންސިލުން އިތުރު އިސްތިއުނާފެއް ކޮށްފައިވާކަން ނުވަތަ ނޫންކަން އަދި ސާފުވެފައެއް ނުވެއެވެ.