އަދިވެސް ލޯކަލް މާރުކޭޓުގެ ގޮޅިތައް ދޫކޮށް ނުނިމޭކަމުގެ ޝަކުވާ
އަދިވެސް ގޮޅި ބަދަލުކުރުމުގެ މަސައްކަތް ކުރިއަށްދޭ
މާލޭގެ ލޯކަލް މާރުކޭޓު
އަދިވެސް މާލޭގެ ލޯކަލް މާރުކޭޓުން ގޮޅި ދޫކޮށް ނުނިމޭކަމުގެ ޝަކުވާ ވިޔަފާރިވެރިން ކޮށްފިއެވެ.
ރަމަޟާން މަސް ފެށުނުއިރުވެސް މާރުކޭޓުގެ ގޮޅިތައް ބަދަލުކުރުމުގެ މަސައްކަތުގައި ވިޔަފާރިވެރިން ހަރަކާތްތެރިވެއެވެ. އަދި މާރުކޭޓުގައި ގިނަ އަދަދެއްގެ ހުސް ގޮޅިތައް ހުރިކަންވެސް ފާހަގަކުރެއެވެ.
މިކަމާއި ގުޅޭގޮތުން ރާއްޖެއެމްވީއާއި ވާހަކަދެއްކި ވިޔަފާރިވެރިއަކު ބުނި ގޮތުގައި މާރުކޭޓުން އަދިވެސް ގޮޅި ދޫކޮށް ނިމިފައިނުވެއެވެ. އަދި ސިޓީ ކައުންސިލުން ބައެއް ގޮޅިތަކުގެ އެގްރީމެންޓު ނުހަދައި، އެގްރީމެންޓުގައި ސޮއިކޮށްފައިނުވެއެވެ. އެހެންކަމުން ބައެއް މީހުންނަށް ވިޔަފާރި ފަށައިނުގަނެވި ގިނަ ދުވަސްތަކެއް މަޑުކުރަން ޖެހިފައިވާކަން އޭނާ ވަނީ ފާހަގަކޮށްފައެވެ.
އަދި ރަމަޟާން މަހު ގޮޅިތައް ބަދަލުކުރަންޖެހުމަކީ މާރުކޭޓުގައި އުޅޭ ވިޔަފާރިވެރިންނަށްވެސް ވަރަށް ބޮޑު ދައްޗަކާއި ކުރިމަތިލާންޖެހޭ ކަމެއް ކަމަށްވެސް އޭނާ ބުނިއެވެ.
އޭނާ ބުނީ މި ހުރިހާ ކަމެއް މިހެން ދާތީ ސިޓީ ކައުންސިލަށް ރަމަޟާން މަހަށް ތައްޔާރު ނުވެވި އޮތް މިންވަރު ހާމަވާ ކަމަށެވެ. ދެތިންމަސް ކުރިން ގޮޅިތައް ދީ ނިންމާފައިހުރިނަމަ މި ދަތިތަކާއި ކުރިމަތިލާން ނުޖެހުނީސްކަމަށް ބުނެފައިވެއެވެ. އަދި އެގްރީމެންޓުތައް ހެދުމުގެ މަސައްކަތް ފެށީވެސް ރޯދަމަސް ފެށެން ދެތިން ދުވަހަށް ވެފައި ވަނިކޮށް ކަމަށްވެސް އޭނާ ބުނެފައިވެއެވެ.
