އައްޑޫގައި ޒުވާނަކު މަރާލި މައްސަލައިގައި 4 މީހަކު ހައްޔަރުކޮށްފި
ފޭދޫގައި މާރާމާރީހިންގައި ޒުވާނަކު މަރާލީ މި މަހުގެ 1ވަނަ ދުވަހު
އައްޑޫ ސިޓީ، ފޭދޫ
އައްޑޫ ސިޓީ ފޭދޫގައި ހިންގި މާރާމާރީއެއްގައި ތޫނު އެއްޗަކުން ހަމަލާދީ މީހަކު މަރާލި މައްސަލައިގައި 4 މީހަކު ހައްޔަރުކޮށްފިއެވެ.
ޖޫން މަހުގެ 1ވަނަ ދުވަހުގެ ރޭ ހިންގި މި މާރާމާރީގައި މަރާލާފައިވަނީ އުމުރުން 21 އަހަރުގެ ދިވެހި ޒުވާނެކެވެ. މި މައްސަލައާ ގުޅިގެން އައްޑޫގެ އަމާންކަން ގެއްލިފައިވާތީ، ވީހާވެސް މައްސަލަ ބަލައި މާރާމާރީ ހިންގި މީހުން ހައްޔަރު ކުރުމަށް އައްޑޫ ސިޓީ ކައުންސިލުން ވެސް ވަނީ ގޮވާލާފައެވެ.
މި މާރާމާރީގައި މީގެ ކުރިން ކުޑަ ދެކުއްޖަކުވެސް ހައްޔަރުކުރިއެވެ. އެއީ 15 އަހަރާއި 16 އަހަރުގެ ދެ ކުދިންނެވެ.
ފުލުހުން ބުނި ގޮތުގައި ފަހުން ހައްޔަރު ކުރި 4 މީހުންގެ ތެރޭގައި ހިމެނެނީ 18 އަހަރުގެ ދެ މީހުންނާއި 22 އަހަރުގެ މީހަކާއި 24 އަހަރުގެ މީހެކެވެ. މި 4 މީހުން ހައްޔަރު ކޮށްފައިވަނީ މިދިޔަ ހޮނިހިރު ދުވަހު ކަމަށް ފުލުހުން ބުންޏެވެ.
މި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން 18 އަހަރުގެ މީހަކާއި 22 އަަހަރުގެ މީހާއަށް 15 ދުވަހުގެ ބަންދުގެ މުއްދަތެއް ދީފައިވާ ކަމަށާއި، 24 އަހަރުގެ މީހާ ޝަރީއަތް ނިމެންދެން ބަންދު ކޮށްފައިވާއިރު 18 އަހަރުގެ އެކަކު ދޫކޮށްލާފައިވާ ކަމަށްވެސް ފުލުހުން ބުންޏެވެ.
