ސްޓެލްކޯގެ "އަވިކަތަ" ޕްރޮގްރާމް އިފްތިތާހު ކޮށްފި
ސޯލަރ ޕެނަލް ހަރުކުކޮށް މަރާމާތުގެ މަސައްކަތްކުރާކަށް ގޭގެ ވެރިފަރާތަކަށް ނުޖެހޭނެ
ރައީސުލްޖުމްހޫރިއްޔާގެ ނައިބު، ފައިސަލް ނަސީމް ްޓެލްކޯގެ އަވިކަތަ ޕްރޮގްރާމް ފައްޓަވައިދެއްވަނީ
ސްޓެލްކޯގެ، ސޯލަރ ޕެނަލް ހަރުކޮށްދިނުމުގެ ޕްރޮގްރާމް "އަވިކަތަ" އިފްތިތާހްކޮށްފިއެވެ.
ސްޓެލްކޯަށް 25 އަހަރު ފުރުން ފާހަގަ ކުރުމަށް އާދީއްތަ ދުވަހުގެ ރޭ ބޭއްވި ހާއްސަ ޖަލްސާގައި މި ޕްރޮގްރާމް ފައްޓަވައިދެއްވީ ޝަރަފްވެރި މެހްމާން ރައީސުލްޖުމްހޫރިއްޔާގެ ނައިބު، ފައިސަލް ނަސީމްއެވެ.
ސްޓެލްކޯގެ "އަވިކަތަ" ޕްރޮގްރާމްއާއެކު ސޯލަރ ޕެނަލް ހަރުކުރަން ގޭގެ ފުރާޅު ކުއްޔަށް ދީގެން ފަސޭހަކަމާއެކު އާމްދަނީ ހޯދޭނެ މަގު ވަނީ ހުޅުވާލާފައެވެ. މި ސްކީމްގައި ބައިވެރިވުމަށް ގޭގެ ވެރިފަރާތުގެ ހުއްދަ އޮތުމާއި ފުރާޅުގައި މަދުވެގެން 100 އަކަފޫޓް ހުންނަން ޖެހޭނެކަމަށް ސްޓެލްކޯއިން ބުނެއެވެ.
މި ޕްރޮގްރާމުގެ ދަށުން ކުއްޔަށް ދޭ ފުރާޅު ވާން ޖެހޭނީ ފަސޭހައިން އަވި ލިބުމާއި ފުރާޅުގައި 150 ކިލޯގެ ބަރުދަން އުފުލާނެ ވަރު ހުންނަ ފުރާޅަކަށެވެ. މި ޕްރޮގްރާމުގައި އަންނަ ޖުލައި މަހުގެ ފުރަތަމަ ދުވަހުން ފެށިގެން ބައިވެރިވެވޭނެ ކަމަށް ސްޓެލްކޯއިން މައުލޫމާތު ދެއެވެ.
"އަވިކަތަ" ޕްރޮގްރާމުގައި ބައިވެރިވާން ފޯމް ހުށައަޅާ މީހުންގެ ތެރެއިން ޝަރުތުހަމަވާ މީހުން ބެލުމަށްފަހު ލޮކޭޝަން ދިރާސާކޮށް އެކަމަށް ހުށައަޅާ ފަރާތާއި ސްޓެލްކޯއާ ދެމެދު އެއްބަސްވުމެއްގައި ސޮއިކުރާނެއެވެ. އެއަށްފަހު ސޯލަރ ޕެނަލް ހަރުކޮށްދިީ ކުލީގެ ފައިސާ ކޮންމެ މަހަކުވެސް ކަނޑައަޅާފައިވާ ބޭންކް އެކައުންޓަށް ސްޓެލްކޯއިން ޖަމާކުރާނެއެވެ.
ސްޓެލްކޯއިން މައުލޫމާތު ދޭ ގޮތުގައި މި ސްކީމްގައި ބައިވެރިވާ ފަރާތްތަކަށް ސޯލަރ ޕެނަލް ހަރުކޮށް މަރާމާތުކުރަން ޚަރަދުކުރާކަށް ނުޖެހޭނެއެވެ.
އިއާދަ ކުރަނިވި ހަކަތަ އުފައްދާ މިންވަރު އިތުރު ކުރުމަށް ސްޓެލްކޯއިން އަންނަނީ 2020 ވަނަ އަަހަރުން ފެށިގެން މަސައްކަތް ކުރަމުންނެވެ.
