މޯލްޑިވްސް ޖާނަލިސްޓް އެސޯސިއޭޝަންގެ އަހަރީ އާންމު ޖަލްސާ ބާއްވައިފި
ރައީސްގެ މަގާމަށް އިންތިހާބުވީ އަލީ ރިފްޝާން
މޯލްޑިވްސް ޖާނަލިސްޓް އެސޯސިއޭޝަންގެ އަހަރީ އާންމު ޖަލްސާގެ ތެރެއިން
މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)ގެ އަހަރީ އާންމު ޖަލްސާ ބާއްވައިފިއެވެ.
ސްޓެލްކޯގެ ޖަލްސާ ކުރާ މާލަމުގައި ބޭއްވި މި ޖަލްސާއަށް ހާޒިރުވީ 24 މެމްބަރުންނެވެ. ހުސްވެފައިވާ ރައީސްގެ މަގާމަށް ނައިބު ރައީސްގެ މަގާމުގައި ހުންނެވި އަލީ ރިފްޝާން ވަނީ ހުރިހާ މެމްބަރުންގެ އިއްތިފާގުން އިންތިހާބުކޮށްފައެވެ. އެ މަގާމަށް ކުރިމަތިލެއްވީ އޭނާ އެކަންޏެވެ.
ރިފްޝާން ރައީސް ކަމަށް އިންތިހާބުވުމާ ގުޅިގެން ނައިބު ރައީސްކަމުގެ މަގާމު ހުސްވުމުން އެ މަގާމަށް ކުރިމަތިލެއްވީ ދުވަސް ނޫހުގެ ފައުންޑަރު އަދި އެޑިޓަރު އަޒްމީ އަލީ ވަނީ 20 މެމްބަރުން ވޯޓުން އިންތިހާބުކޮށްފައެވެ.
އަހަރީ އާންމު ޖަލްސާގައި އަސާސީ ގަވާއިދަށް ބޮޑެތި ބަދަލުތަކެއް ގެންނަން އެޖެންޑާ ކުރި ނަމަވެސް ބޭނުންވާ އަދަދަށް މެމްބަރުން ހާޒިރުނުވުމުން އެޖެންޑާގެ އެބައި ކުރިއަށް ގެންގޮސްފައެއް ނުވެއެވެ.
ޖަލްސާގައި ވަނީ އެ ޖަމިއްޔާގެ 2019، 2020 އަދި 2021 ގެ އަހަރީ ރިޕޯޓުތައް ހުރިހާ މެމްބަރުންގެ އިއްތިފާގުން ފާސްކޮށްފައެވެ. ޖަލްސާއަށް ހާޒިރުވި އާންމު މެންބަރުން ވަނީ އެސޯސިއޭޝަންގެ ކަންކަމާމެދު ހިޔާލު ފާޅުކޮށްފައެވެ.
