ބިދޭސީންތަކެއް ނިދާފައިތިބީ މީގެ 5 އަހަރު ކުރިން ބަންދުކޮށްފައިވާ މިސްކިތެއްގައި: ކައުންސިލް
މީގެ ކުރިންވެސް އެތަން މީހުން ބޭތިއްބުމަށް ކުއްޔަށް ދީފައިވޭ
ދަރަނބޫދޫގެ މިސްކިތެއްގައި ތިބި ބިދޭސީންތަކެއް
ފ. ދަރަނބޫދޫ މިސްކިތެއްގައި ބިދޭސީންތަކެއް ނިދާފައިތިބި މަންޒަރު ފެންނަ ވީޑިއޯއެއް އާންމުވެފައިވާއިރު، އެތަނުގައި ނިދާފައިތިބީ އެތަން ކުއްޔަށް ހިފައިގެން ތިބި ބައެއް ކަމަށް އެރަށު ކައުންސިލުން ބުނެފިއެވެ.
ދަރަނބޫދޫގެ މިސްކިތެއްގައި ބިދޭސީންތަކެއް ނިދާފައިތިބި މަންޒަރު ފެންނަގޮތަށް މާލެ ސިޓީ ކައުންސިލްގެ މޭޔަރ މުހައްމަދު މުއިއްޒު ސޯޝަލް މީޑިއާގައި ވަނީ ވީޑިއޯއެއް އާންމުކުރައްވާފައެވެ.
މިކަމާއި ގުޅިގެން "ރާއްޖެއެމްވީ"އިން ކުރި ސުވާލަކަށް ޖަވާބުދެއްވަމުން ދަރަނބޫދޫ ކައުންސިލްގެ ރައީސް އަބްދުލް ހަމީދު އާދަމް ވިދާޅުވީ އެ މިސްކިތަކީ ގަބުރުތަކެއް މަތީގައި އަޅާފައިވާ މިސްކިތަކަށް ވާތީ ރައްޔިތުން ޝަކުވާ ކޮށްގެން ސަރުކާރުން އައު މިސްކިތެއް އަޅާފައިވާކަމަށެވެ. އެ މިސްކިތުގައި ނަމާދުކުރަން ފެށި ހިސާބުން ވީޑިއޯއިން އެ ފެންނަ މިސްކިތަކީ ބޭނުންކުރާ މިސްކިތެއް ނޫން ކަމަށް ކައުންސިލް ރައީސް ވިދާޅުވިއެވެ.
މި މިސްކިތް ކައުންސިލާ ހަވާލުކުރި ފަހުން އެރަށުން ބޭރު ބަޔަކާ ހަވާލުކޮށްގެން އެތަނުގައި ގުރުއާން ކްލާހެއް ހިންގާފައިވާކަމަށެވެ. އެހެންނަމަވެސް ދުވަސްކޮޅަކުން އެ ކްލާސް ހުއްޓުނު ކަމަށާއި، އެއަށްފަހު އެތަން ބޭނުންކުރީ ރައްޔިތުންގެ ބައްދަލުވުންތައް ބޭއްވުމަށް ކަމަށެވެ. އެއަށްފަހު އެރަށު ބަނދަރު ހަދަން އެމްޓީސީސީން ގެނައި ޓީމު ނިދުމަށް ދެ އަހަރަށް އެތަން އެމްޓީސީސީއަށް ކުއްޔަށް ދީފައިވާކަމަށް ހަމީދު ވިދާޅުވިއެވެ.
އެތަނުގައި މިހާރު ތިބީ ފެނާއި ނަރުދަމާގެ މަސައްކަތަށް އެރަށަށް ގޮސްތިބި އިންޑިއާގެ ބިދޭސީންތަކެއްގެ ތެރެއިން 15 ވަރަކަށް ބިދޭސީން ކަމަށް އޭނާ ވިދާޅުވިއެވެ. އެކަމަކީ ކައުންސިލަށް އެނގިގެން ހިނގާ ކަމެއް ކަމަށް ހަމީދު ވިދާޅުވިއެވެ. އެތަނުގައި އެމީހުން ކުރަނީ ކޮން ކަމެއްތޯ ކައުންސިލުން ބަލާ ކަމަށާއި، އަދިވެސް އެތަނުގައި ގުރުއާން ކްލާސް ހިންގަން ބަޔަކު ބޭނުންވާނަމަ އެކަން ކުރުމުގެ ފުރުސަތު ދޭނެ ކަމަށް ހަމީދު ވިދާޅުވިއެވެ.
ސޯޝަލް މީޑިއާގައި ދައުރުވަމުންދާ ވީޑިއޯއަށް ރައްދުދީ އިސްލާމިކް މިނިސްޓްރީންވެސް ވަނީ އެ މިސްކިތަކީ މިހާޜު ބޭނުންކުރާ މިސްކިތެއް ނޫން ކަމަށް ބުނެފައެވެ. މިނިސްޓްރީން ބުނީ 2017 ވަނަ އަހަރު ދަރަނބޫދޫގައި އަލަށް އިމާރަތްކުރި މިސްކިތް ބޭނުންކުރަން ފެށުމާއެކު މިހާރު އާންމުވެފައިވާ ވީޑިއޯއިން ފެންނަ މިސްކިތް ބަންދުކޮށްފައިވާކަމަށެވެ. އަދި އެ މިސްކިތް ކައުންސިލާ ވަނީ ހަވާލުކޮށްފައެވެ. އޭގެ ފަހުން ކައުންސިލުން އެތަނުގައި ގުރުއާން ކްލާހެއް ހިންގިކަން އެނގިފައިވާކަމަށް މިނިސްޓްރީން ބުނެފައިވެއެވެ.
