ގއ. ދާންދޫގައި ދިރިއުޅޭ ބިދޭސީން މަސައްކަތް ކުރުމުގެ ދުވަހު އުޖޫރަ ކަނޑައެޅުމާގުޅޭ އުސޫލެއް އެ ރަށު ކައުންސިލުން ހަދައިފިއެވެ.

މިއީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން ހަދާފައިވާ އުސޫލެކެވެ. މި ގާނޫނުގެ ދަށުން ބިދޭސީންގެ އުޖޫރައާގުޅޭ އުސޫލެއް ހެދި މިއީ ފުރަތަމަފަހަރެވެ.

ދާންދޫ ކައުންސިލުން ބުނެފައިވާ ގޮތުގައި، މި އުސޫލު ފާސްކޮށްފައިވަނީ އެ ކައުންސިލްގެ 4 ވަނަ ދައުރުގެ 52 ވަނަ އާއްމު ޖަލްސާގައެވެ. މި އުސޫލުގައި ހިމެނެނީ ދާންދޫގައި ދިރިއުޅޭ ބިދޭސީން ކުރާ މަސައްކަތްތަކަށް ދުވަހު އުޖޫރަ ކަނޑައެޅުމުގައި، މަސައްކަތްކުރުވާ ފަރަތާތްތަކުންނާއި އަދި މަސައްކަތްކުރާ ފަރާތްތަކުން އަމަލުކުރަންވީ ގޮތުގެ ތަފްސީލު ކަމަށްވެސް އެ ކައުންސިލުން ބުނެއެވެ.

އުސޫލުގައި ބުނެގައިވާ ގޮތުގައި، އިމާރާތް ކުރުމުގެ ދާއިރާގައި މަސައްކަތް ކުރާ ބިދޭސީންނަށް ދުވަހުގެ އުޖޫރައިގެ ގޮތުގައި 250 ރުފިޔާއާ 300 ރުފިޔާއާ ދެމެދުގެ އަގެއް ދޭން ޖެހޭނެއެވެ. އަދި އުޖޫރަ ކަނޑައަޅާފައިވާ މަސައްކަތްތައް ވެސް ވަކިވަކިން އެ އުސޫލުގައި ވަނީ ބަޔާންކޮށްފައެވެ.

ރަށުގެ އާންމުންގެ ގޯތިގެދޮރުގައި ހުންނަ ރުއްގަސް ކަނޑައި ސާފުކުރުމާއި، ގޯތި ގެދޮރު ވިނަ ނޮޅައި ސާފުކުރުމުގެ މަސައްކަތުގެ ކެޓަގަރީގައި، ދުވަހުގެ އުޖޫރައިގެ ގޮތުގައި 20 ރުފިޔާއާ 150 ރުފިޔާއާ ދެމެދުގެ އަގުތަކެއް ކަަނޑައަޅާފައިވާއިރު، ނަރުދަމާ ޖަންގްޝަން ސާފުކުރުމާއި އެކިއެކި ބޭނުމަށް ކޯރު ކޮނުމުގެ މަސައްކަތަށް ދުވާލަކު 300 ރުފިޔާ، އަދި ކޯރު ކޮންނަނަމަ ކޮންމެ ކޮޑިމީޓަރަކަށް 10 ރުފިޔާގެ މަގުންނެވެ. އަދި ފައިބަރުގެ މަސައްކަތްކުރާ ބިދޭސީންނަށް ދުވާލަކު 300 ރުފިޔާގެ އުޖޫރައެއް ދޭން ޖެހޭނެކަމަށް އެ އުސޫލުގައި ވަނީ ބުނެފައެވެ.

މީގެ އިތުރުން ދާންދޫ ކައުންސިލްގެ އިޚްތިސާސްގައި ހިމެނޭ ފަޅުތެރެއިން ދޮންވެއްޔާއި ކަށިވެލި ނެގުމުގެ އުސޫލާ އެއްގޮތަށް މަސައްކަތުގެ އަގުތަކެއް ވެސް އެ ކައުންސިލުން ވަނީ ކަނޑައަޅާފައެވެ. އެގޮތުން، ދޮންވެލި ބަސްތާއެއް ވިއްކޭ އަގަކަށް 8 ރުފިޔާ ކަނޑައަޅާފައިވާއިރު، ކަށިވެލި ބަސްތާއެއް ވިއްކޭނީ 25 ރުފިޔާއަށެވެ. މިގޮތަށް ނަގާ ކޮންމެ ވެލި ބަސްތާއަކުން 1 ރުފިޔާ ކައުންސިލަށް ދޭންޖެހޭނެ ކަމަށްވެސް ކައުންސިލުން ވަނީ ބުނެފައެވެ.

ކައުންސިލުގެ އުސޫލުގެ ދަށުން ބިދޭސީން ލައްވައި ދާންދޫގައި މަސައްކަތް ކުރެވޭނީ ދުވާލަކު 1 ގަޑިއިރުގެ ބްރޭކަކާއެކު 8 ގަޑިއިރަށެވެ.

މި އުސޫލާ ޚިލާފުވާ މީހުން ފުރަތަމަ ފަހަރަށް 500 ރުފިޔާ، ދެވަނަ ފަހަރަށް 1500 ރުފިޔާ، ތިންވަނަ ފަހަރަށް 3000 ރުފިޔާ، އަދި ހަތަރުވަނަ ފަހަރަށް 5000 ރުފިޔާއިން ޖޫރިމަނާ ކުރާނެއެވެ. އަދި ގަވާއިދާ ޚިލާފަށް އުޅޭ ބިދޭސީއެއްކަމަށް ކަނޑައަޅައި ފުލުހުން މެދުވެރިކޮށް ފިޔަވަޅު އަޅާއިރު، އިކޮނޮމިކް މިނިސްޓްރީގެ ގަވާއިދާ އެއްގޮތަށްވެސް ފިޔަވަޅު އަޅާނެކަމަށް އެ ކައުންސިލުން ވަނީ ބުނެފައެވެ.