ހުޅުމާލޭ ބިމަށާއި އެއްމެދު އިމާރާތަށް ފައިސާދެއްކުމަށް ހުޅުވާފައިވާ ލޯނު އެކައުންޓްތައް ބަންދުކޮށްފި
އެގޮތަށް ނިންމީ ލޯން އެކައުންޓްތައް ބެލެހެއްޓުމުގައި ތަފާތު އެކި މައްސަލަތައް ދިމާވަމުންދާތީ
ހުޅުމާލެ
ހުޅުމާލޭ ބިމަށާއި އެއްމެދު އިމާރާތަށް ފައިސާ ދެއްކުމަށް ހުޅުވާފައިވާ ލޯނު އެކައުންޓްތައް ބަންދުކޮށްފިއެވެ.
ހައުސިންގ ޑިވެލޮޕްމަންޓް ކޯޕަރޭޝަނުން ނެރުނު އިއުލާނެއްގައި ބުނެފައިވަނީ، އެގޮތަށް ނިންމާފައިވަނީ އެ ކޯޕަރޭޝަނުން ވިއްކާފައިވާ ހުޅުމާލޭ ބިމަށް/އެއްމެދު އިމާރާތަށް ފައިސާ ދެއްކުމަށް ބޭންކް އޮފް މޯލްޑިވްސްގައި ހުޅުވާފައިވާ ލޯން އެކައުންޓްތައް ބެލެހެއްޓުމުގައި ތަފާތު އެކި މައްސަލަތައް ދިމާވަމުންދާތީ ކަމަށެވެ.
ލޯން އެކައުންޓްތައް ބަންދުކުރުމާއެކު، ކަސްޓަމަރުންގެ ބޭންކް އޮފް މޯލްޑިވްސް އެކައުންޓްތައް "އޮޓޮމެޓިކް ޑައިރެކްޓް ޑެބިޓް"ގެ އުސޫލު މެދުވެރިކޮށް ފައިސާ ކެނޑުން ހުއްޓޭނެކަމަށާއި، އެގޮތުން 30 ޖޫންއަކީ އޮޓޮމެޓިކް ޑިޑަކްޝަން މެދުވެރިކޮށް ކަސްޓަމަރުންގެ އެކައުންޓްތަކުން ފައިސާ ކެނޑޭނެ އެންމެ ފަހު ތާރީޚު ކަމަށެވެ.
ޖުލައި އެއްވަނަ ދުވަހުން ފެށިގެން ފައިސާ ދެއްކުމަށް ތައާރަފުކޮށްފައިވާ "މައި ހުޅުމާލެ" ވެބް ޕޯޓަލް މެދުވެރިކޮށް އޮންލައިންކޮށް، ނުވަތަ އެޗްޑީސީގެ މައި އޮފީހުގައި ފައިސާ ބަލައިގަތުމަށް ޚާއްސަ ކޮށްފައިވާ ކަންޓަރުތަކުން ފައިސާ ދެއްކޭނެކަމަށް ވެސް ވަނީ ބުނެފައެވެ.
އިތުރު މައުލޫމާތު ހޯދަން ބޭނުންވާނަމަ އެޗްޑީސީގެ ހޮޓްލައިން 1516ށް ގުޅައިގެން ނުވަތަ revenue@hdc.com.mvށް އީމެއިލް ކުރުމަށް ވަނީ އެދިފައެވެ.
