ރޯޑް ސޭފްޓީ ފެއަރ އާއި ގުޅިގެން އެޗްޑީސީގެ ޚާއްސަ މަންސައެއް
މިއީ، އެޗްޑީސީ އާއި އެޗްޕީއޭ އާއި ގުޅިގެން ބާއްވާ ހަރަކާތެއް
ހުޅުމާލެ ޑިވެލޮޕްމަންޓް ކޯޕަރޭޝަން (އެޗްޑީސީ)
ރޯޑް ސޭފްޓީ ވީކްގެ ފެސްޓިވަލް އާއި ގުޅިގެން ހައުސިންގ ޑިވޮލޮޕްމަންޓް ކޯޕަރޭޝަން (އެޗްޑީސީ) ޚާއްސަ މަންސަ ޕްރޮގްރާމެއް ބޭއްވުމަށް ހަމަޖެހިއްޖެއެވެ.
މިއީ، އެޗްޑީސީ އާއި އެޗްޕީއޭ އާއި ގުޅިގެން ބާއްވާ ހަރަކާތެއްކަމަށް އެޗްޑީސީން މައުލޫމާތުދެއެވެ. އެގޮތުން މި ޕެނަލް ޑިސްކަޝަންގެ ޕެނަލިސްޓުންގެ ގޮތުގައި ބައިވެރިވަނީ އައިޖީއެމްއެޗްގެ އެސިސްޓެންޓް މެޑިކަލް ޑިރެކްޓަރ ޑރ. އިބްރާހިމް އިޔާޒް، ޗީފް އިންސްޕެކްޓަރ އޮފް ޕޮލިސް އަހުމަދު ފަސީހު، ޓްރާންސްޕޯޓް މިނިސްޓްރީގެ އެސިސްޓެންޓް ޑިރެކްޓަރ ރުޝޫނާ ރަޝާދު، އެމްއެންޔޫގެ ފެކަލްޓީ އޮފް ހެލްތް ސައިންސް އިން މުހައްމަދު ޒައިދު އަދި އެޗްޑީސީގެ ޓްރެފިކް އެންޑް ރޯޑް ސަރވިސް މެނޭޖަރ އަހުމަދު ސޮފްވާންއެވެ.
މަގުމަތީގެ ރައްކާތެރިކަމާއި، މިކަމަށް އާއްމުން ހޭލުންތެރިކުރުމަށް މަޢޫލޫމާތު ދިނުމަށް ހަމަޖެހިފައިވާއިރު، މި ހަރަކާތް އޮންނާނީ 17 ޖޫން 2022 ވާ ހުކުރު ދުވަހުގެ 16:00 – 18:00 އަށް ހުޅުމާލެ ރުއްގަނޑު 2 ސަރަހައްދުގައި ކުރިއަށްގެންދާ ރޯޑް ސޭފްޓީ ފެއަރގައިކަން އެޗްޑީސީން ފާހަގަކުރެއެވެ.
ރޯޑް ސޭފްޓީ ފެއަރ 2022 ގައި މަންސަގެ އިތުރުން އިންފޮމޭޝަން ސްޓޯލް، ކުޅިވަރު ހަރަކާތްތައް އަދި ލަކީ ޑްރޯ ހިމެނެއެވެ.
މަންސައަކީ ހައުސިންގ ޑިވެލޮޕްމަންޓް ކޯޕަރޭޝަނުން ކޮމިއުނިޓީ ޑިވެލޮޕްމަންޓް ޕްރޮޖެކްޓެއް ކަމުގައިވާ "ހޭޑިފޭޑި" ޕްރޮޖެކްޓްގެ ދަށުން 2019 ވަނަ އަހަރުގެ އޯގަސްޓް މަހުގައި ތައާރަފްކޮށްފައިވާ ޓޯކް ޝޯ ސީރީސްއެކެވެ. މަންސަ އަކީ ރައްޔިތުންގެ ހޭލުންތެރިކަން އިތުރުކުރުމަށާއި ރައްޔިތުންގެ ހުރި އެކި ކަންބޮޑުވުންތަކާއި ހިޔާލު ހޯދުމަށްޓަކައި އެޗްޑީސީގައި ތައާރަފުކޮށްފައިވާ ޕްލެޓްފޯމެކެވެ.
އަދި މިއީ އެހެން ޖަމިއްޔާތަކާއި ގުޅިގެން ރައްޔިތުންނާއެކު ރައްޔިތުންނަށް ދިމާވާ އެކި ގޮންޖެހުންތަކަށް ދެމެހެއްޓެނިވި ހައްލެއް ގެނައުމަށް "ހޭޑިފޭޑި" ޕްރޮގްރާމުގެ ދަށުން ތައާރަފުކުރެވުނު މަންސަ މަޝްރޫޢުގެ ބައެއްކަމަށް އެޗްޑީސީން ބުނެއެވެ.
މި ފާއިތުވެދިޔަ އަހަރުގެ ތެރޭގައި މަންސަގެ ގިނަ ޝޯތަކެއް އެކި ފަހަރުތަކެއްގެ މަތިން އެކޯޕަރޭޝަނުން ވަނީ ބާއްވާފައެވެ. އެގޮތުން މިއަދާއި ހަމަޔަށް 14 މަންސަ ޓޯކް ޝޯއެއް ބާއްވާފައިވެއެވެ.
