ކުޅިވަރު އިސްލާޙުގެ ބިލު މަޖިލީހުން ބޭރު ކޮށްލައިފި

ދިވެހިރާއްޖޭގެ ކުޅިވަރު ޤާނޫނަށް ހުށަހެޅި އިސްލާހުގެ ބިލު މަޖިލީހުން ބޭރުކޮށްލައިފިއެވެ.

ކުރީގެ ރައީސް އަބްދުﷲ ޔާމީންގެ ސަރުކާރުގެ މެޖޯރިޓީ އޮތް 2015 ވަނަ އަހަރުގެ މަޖިލީހުން ފާސްކުރި ގާނޫނަށް އިސްލާހު ހުށަހެޅުއްވީ ކުރީގެ ޔޫތު މިނިސްޓަރު އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފްއެވެ. އެ އިސްލާހުތައް އޭނާ މަޖިލީހަށް ހުށަހެޅުއްވީ 2020 ވަަނަ އަހަރުގެ އޮކްޓޫބަރު މަހުގެ ތެރޭގައެވެ.

މަޖިލީހުގެ އިޖުތިމާއީ ކޮމެޓީގައި މި އިސްލާހުތައް ދިރާސާ ކުރުމަށްފަހު، ރިޔާސަތަށް ފޮނުވީ، އެ ބިލު އިސްލާހުކުރަން ނުފެންނަ ކަމަށް ފާސްކޮށެވެ. އެގޮތަށް ނިންމީ އެ ކޮމެޓީ މެމްބަރުންގެ އިއްތިފާގުންނެވެ.

ބުދަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ރިޔާސަތުން ވަނީ އެ ބިލު ފާސްކުރުމަށް ވޯޓަށް އަހާފައެވެ. މަޖިލީހުގައި އެވަގުތު ތިއްބެވީ 60 މެމްބަރުންނެވެ. އޭގެ ތެރެއިން ބިލު ފާސްކުރުމަށް ވޯޓު ދެއްވީ 18 މެމްބަރުންނެވެ. އަދި ބިލު ފާސްކުރުމާ ދެކޮޅަށް 35 މެމްބަރަކު ވޯޓު ދެއްވާފައިވެއެވެ. ބިލު އަލުން އަނބުރާ ކޮމެޓީއަށް ފޮނުވަން ފެނޭތޯ ވެސް ވަނީ ވޯޓަށް އަހާފައެވެ. އަލުން ބިލު ކޮމެޓީއަށް ފޮނުވަން ބޭނުންވާ އަދަދަކީ 27 ވޯޓެވެ. އެ އަދަދަށް ވޯޓު ލިބިފައެއް ނުވެއެވެ. ބިލު އަލުން ކޮމެޓީއަށް ފޮނުވަން ފެންނަ ކަމަށް ވޯޓު ދެއްވީ 21 މެމްބަރުންނެވެ. އަދި ބިލު އަލުން ކޮމެޓީއަށް ފޮނުވަން ނުފެންނަކަމަށް 31 މެމްބަރަކު ވަނީ ވޯޓު ދެއްވާފައެވެ. އެއާއެކު މި ބިލު ވަނީ މަޖިލީހުން ބޭރުކޮށްލާފައެވެ.

މިކަމާ ގުޅިގެން އިޖުތިމާއީ ކޮމެޓީގެ މުގައްރިރު އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވީ ބިލު ފާސްނުކުރަން ނިންމެވީ ކޮމެޓީން ގިނަ ކަންކަމަށް ބެލުމަށްފަހުއެވެ. ޝިފާއު ފާހަގަކުރެއްވި ގޮތުގައި ގައުމީ ކުޅިވަރު އެސޯސިއޭޝަނެއްގެ ހުރިހާ ކަންކަން ކުރިއަށް ގެންދަންވާނީ ބައިނަލްއަގުވާމީ ކުޅިވަރު އިދާރާތަކުން ކަނޑައަޅާފައިވާ އުސޫލާއި ގަވާއިދުގެ ތެރެއިން ކަމަށެވެ. މީގެ އިތުރުން އިސްލާހުގައިވާ ގޮތުގެ މަތިން، ކުޅިވަރު އެސޯސިއޭޝަނެއްގެ އިންތިޚާބު އިލެކްޝަންސް ކޮމިޝަނުން ކަނޑައަޅައިފިނަމަ ބައިނަލްއަގުވާމީ އިދާރާތަކުން ރާއްޖެއަށް ފިޔަވަޅު އަޅާނެ ކަމަށެވެ.

މިކަމާ ގުޅިގެން މެމްބަރު ހަސަން ވިދާޅުވީ ބިލަށް އިސްލާހު ހުށަހެޅުއްވީ އެކަމަކީ އެމްޑީޕީގެ ރިޔާސީ ވައުދަތަކަށް ވާތީ ކަމަށެވެ. އަދި ހަސަން ވަނީ ކޮމެޓީގެ ނިންމުމަށް ތާއީދު ނުކުރައްވާކަން ވެސް ހާމަކުރައްވާފައެވެ. ހަސަން އިތުރަށް ވިދާޅުވީ ކޮމެޓީން ބިލު ދިރާސާ ކުރާއިރު، އެ ބިލެއް ހުށަހެޅި ފަރާތް ކޮމެޓީއަށް ހާޒިރުކުރާކަމަށެވެ. ނަމަވެސް އެ ބިލާ ގުޅިގެން އޭނާ ކޮމެޓީއަށް ހާޒިރުނުކުރާކަމަށެވެ. ހަސަން ވިދާޅުވީ ކޮމެޓީގެ މެމްބަރުން ބިލު ދިރާސާ ކުރީ ކަންކަން ކުރިއަށްދާ ގޮތުގެ އެންމެ ފުރިހަމަ މައުލޫމާތު ލިބިފައިނެތި ކަމަށެވެ.

ކުޅިވަރުގެ ގާނޫނަށް ހުށަހެޅި އިސްލާހުތަކާ މެދު ކަންބޮޑުވުން ފާޅުކޮށް 18 ކުޅިވަރު އެސޯސިއޭޝަނަކުން ސޮއިކޮށް 2020 ނޮވެމްބަރު 2 ވަނަ ދުވަހު ވަނީ ނޫސްބަޔާނެއްވެސް ނެރިފައެވެ.