ރައީސް ޔާމީން ވެރިކަމަށް ވަޑައިގެން ފުރަތަމަ ދުވަސްކޮށް އިންޑިއާ ވަރެއް ނެތިގެން އުޅުއްވިއެވެ. އިންޑިއާއަށް ކުރެއްވި ކޮންމެ ދަތުރުފުޅެއްގައި، އިންޑިއާއަކީ އަތާއަތްމަހާލައި، ސަރާސަރު ގުޅުމުގެ މައްޗަށް ގުޅުން ބަދަހިކުރަންޖެހުނު ގައުމެއްގެ ގޮތުގައި ވިދާޅުވަމުން ގެންދެވިއެވެ.
މިހާރު މިއޮތް ހިސާބުން އަޅުގަނޑުމެން އިންޑިޔާއާ ޚާއްސަ ގުޅުމެއް އުފައްދަން އެބަޖެހޭކަމަށްވެސް ވިދާޅުވިއެވެ. ރައީސް މައުމޫންގެ ސަރުކާރުން އަދި އޭގެ ކުރިން ފެށިގެންވެސް މިއޮތީ ހަމަ އިންޑިޔާއާ އަޅުގަނޑުމެންނާ ދޭތެރޭގައި ވަރަށް ގާތް ގުޅުމެއްކަމަށާއި، އިންޑިޔާއަކީ އަޅުގަނޑުމެންނަށް ކަންބޮޑުވާ ކޮންމެ ވަގުތެއްގައި އަޅުގަނޑުމެންގެ އެހީތެރިކަމަށް މިހާތަނަށް އައިސްފައިވާ ގައުމުކަމަށާއި، އަދި ކުރިއަށް އޮތް މުސްތަގުބަލަށްވެސް އަޅުގަނޑުމެންނަށް ގަބޫލުކުރެވޭ، އިތުބާރުކުރެވޭ، އަޅުގަނޑުމެންނަށް ދިމާވާ ބޮޑު ކޮންމެކަމެއްގައި (އެއީ އުދުވާނެއް ކަމުގައިވީނަމަވެސް، ސުނާމީކަހަލަ ގުދުރަތީ ބޮޑު ކާރިސާއެއް ކަމުގައިވީނަމަވެސް) އެކަހަލަ ހާލަތަކަށް އިސްވެ އިޖާބަދޭ ގައުމަކީ އިންޑިޔާކަމަށެވެ. މިއީ އެމަނިކުފާނު އިންޑިއާއާ ދޭތެރޭގައި އެއިރު ގެންގުޅުއްވި ސިޔާސަތެވެ.
ވެރިކަމުގެ މެދެއްހާ ހިސާބުން ފޮނި ޝަބާބު ހުތަށްވެއްޖެއެވެ. އިންޑިއާ ވަރުގެ ނުބައި ގައުމެއް ނެތްކަމަށް ދައްކަވަން މަސައްކަތްކުރައްވަން ފެއްޓެވިއެވެ. މުސްލިމުންނަށް އެންމެ ދުއްތުރާކުރަމުން ގެންދާ އިންޑިއާގެ ވެރިކަން ކުރާ ބީޖޭޕީއަކީ އެއިރު އެމަނިކުފާނަށް ޖަވާހިރެކެވެ. ޔާގޫތެކެވެ. އެއިރު އެ ޕާޓީގެ އިސްވެރިންނަށް ރާއްޖެވަޑައިގަތުމަށް ވެސް ދައުވަތު ދެއްވިއެވެ. ނަމަވެސް ރައީސް ޔާމީން ވިދާޅުވާގޮތުންނަމަ، އެއީ އެމަނިކުފާނުގެ ވެރިކަން ފޭރިގަތް ގައުމެވެ. އެގައުމުގައި ވެރިކަންކުރާ ޕާޓީއަކީ ހަރުކަށި ފިކުރުގެ ޕާޓީއެކެވެ.
އެންމެ ފަހުން ވެރިކަން ދިން ބަޔަކު ވެރިކަން އަތުލައި އެހެން ބަޔަކަށް ދިނުމުން، އެކަން ކުރީވެސް އިންޑިއާއިން ކަމަށް ބުނެ ބޮޑާ ހޭއްކެވިއެވެ. އަދިވެސް އެ ބޮޑާ އެބަ ހާއްކަވައެވެ. މައިކެއް ލިބިވަޑައިގަންނަވާ ކޮންމެ ފަހަރަކު އިންޑިއާއެވެ. އިންޑިއާ އައުޓް ނޫން އެހެން އެއްވެސް އެއްޗެއް ވިދާޅެއްނުވެއެވެ. ހެދުންކޮޅު ތުރުކުރައްވާއިރު ވެސް މޭފުޅު ފުރެންދެން ޖައްސަވައިގެން ހުންނަވަނީ އިންޑިއާ އައުޓެވެ. ނަމަވެސް އެއީ އިންޑިއާ އައުޓެއް ނޫން ކަމަށާއި، އެއީ އިންޑިއާ މިލިޓަރީ އައުޓްކަމަށް ވިދާޅުވަމުން ގެންދަވައެވެ.
މިފަހަކާ ޖެހެންދެން ވެސް އެމަނިކުފާނު ގެންދެވީ އިންޑިއާ އައުޓްގެ ހަރަކާތްތައް އާ އުސްމިނަކަށް ގެންދަވަމުންނެވެ. ނަމަވެސް އޭގެ އަޑު މަޑުމަޑުން ފަނޑުވާން ފަށައިފިއެވެ. ދެކެވެނީ ވެރިކަމުގެ ވާހަކައެވެ. އެމަނިކުފާނު ނޫން ވެރިއަކު ވެރިކަމުގައި ހުންނަވަން ނުޖެހޭކަމުގެ ވާހަކައެވެ. އިންޑިއާ އައުޓްގެ އަޑު ހަމައެއްކޮށް ކެނޑުނީބާއޭ ވެސް ހިތަށް އަރާފަހަރު އާދެއެވެ.
އިހަށްދުވަހަކު އެމަނިކުފާނު އަނެއްކާވެސް އޮންލައިން ނޫހަކަށް އިންޓަރވިއުއެއް ދެއްވައިފިއެވެ. ވިދާޅުވެފައިވަނީ އިންޑިއާ އައުޓް ހަރަކާތަކީ އިންޑިއާ ގޯސްވެގެން ކުރިއަށް ގެންދަވާ ހަރަކާތެއް ނޫން ކަމަށެވެ. އިންޑިއާ ޓީޗަރުންނާއި ޑޮކްޓަރުންނާއި އެހެނިހެން ފަންނުވެރިންނާވެސް ދެކޮޅު ނޫންކަމަށެވެ. ނަމަވެސް މަނިކުފާނު ވެރިކަމަށް ކޮއްޓަވާ މަގުގައި، އެފަދަ އެތައް ބަޔަކު ބިރުން މި އަމާން ގައުމު ދޫކޮށް ހިނގައްޖެއެވެ. ހިތާމަ ހުއްޓެވެ.
ދެން ވިދާޅުވެފައިވަނީ އިންޑިއާއަކީ ރަނގަޅު އަވައްޓެރިއެއްކަމަށް ޚުދު އެމަނިކުފާނުވެސް ގަބޫލުކުރައްވާ ކަމަށާއި، ގަބޫލު ނުކުރެއްވެނީ އިންޑިއާ ސަރުކާރުގެ ހާރިޖީ ސިޔާސަތުތައް ކަމަށެވެ. އަދި އިންޑިއާ އައުޓް ހަރަކާތަކީ ވެސް އެކަމާދެކޮޅަށް ކުރައްވާ ކަމެއްކަމަށެވެ.
މިހާ ހިސާބުން ސުވާލު އުފެދެއެވެ. ސުވާލަކީ އިންޑިއާ އައުޓަކީ ސީދާ އިންޑިއާ ސިފައިން ރާއްޖޭގައި ތިބޭތީ އެމަނިކުފާނު އިސްވެ ހުންނަވައިގެން ކުރިއަށް ގެންދަވާ ސިޔާސީ ހަރަކާތެއްކަމަށް ވިދާޅުވަމުން އައިސް، ކުއްލިގޮތަކަށް ރާގު ބަދަލުވީ ކިހިނެއް ވެގެންތޯއެވެ. ހަދިޔާއެއް ލިބިވަޑައިގެންނަމަވެސް ރާގު ބަދަލުވީ ހާދަ އަވަހަކަށެވެ. ގިނަ ބަޔަކު ސުވާލު އުފައްދަން ފަށައިފިއެވެ.
ރާއްޖޭގެ ސިޔާސީ މަސްރަހު ހިނގަމުންދާ ގޮތަށްބަލާއިރު، ދެން އޮތީ އަނެއްކާ ވެސް ވެރިކަމާ ތޮޅޭނެ އަހަރެވެ. ރިޔާސީ އިންތިޚާބު ކާމިޔާބު ކުރުމަށް އެކި ސިޔާސީ ޕާޓީތަކުން މަސައްކަތް ފަށާނެ އަހަރެވެ. އިންޑިއާ އައުޓްގެ ފަހަތުގައި ރައީސް ޔާމީން ވެރިކަމަށް ވަޑައިގަތުމަށް ކުރައްވާ މަސައްކަތްޕުޅުގެ ކުލަވަރު ބަދަލުވެ އިންޑިއާވެސް ރަނގަޅުވާ ހިސާބަށް ކަންކަން އެބަ ދާކަމަށް ވާހަކަތައް ދެކެވެއެވެ.
ފެންނަން އޮތް ހަގީގަތަކީ، ރައީސް ޔާމީންގެ ރާގުފުޅު ބަދަލުވަމުން އަންނަ ކަމެވެ. އިންޑިއާ އަސްކަރިއްޔާގެ ވާހަކަވެސް ނުދައްކަވާ އިންޑިއާ ރަނގަޅު ވާހަކަ ދައްކަވައި ރާގުފުޅު ތަފާތުކޮށްލައްވާފައިވާތަނެވެ. މިއީ އެންމެ ސަބަބެއް ކަމުގައި ވެސް ވެދާނެއެވެ. އެއީ ވެރިކަމަށް ވަޑައިގަންނަވަން ކުރައްވާ ކަމެއްގެ ގޮތުގައި ސިފަވެގެންދެއެވެ.
