ހިޔާ ފްލެޓުތަކުގެ ކުލި ނުދައްކާ ފަރާތްތައް ޖޫރިމަނާކޮށް، ފައިސާ ދައްކަން އަންގައިފި

ހުޅުމާލެ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓުތަކުގެ ކުލި ނުދައްކާ ފަރާތްތައް ޖޫރިމަނާކޮށް، ފައިސާ ދެއްކުމަށް ހައުސިން ޑެވެލޮޕްމަންޓް ކޯޕަރޭޝަން (އެޗްޑީސީ) އިން އަންގައިފިއެވެ.

އެޗްޑީސީގެ މީޑިއާ އޮފިޝަލު ރާއްޖެ އެމްވީއަށް ވިދާޅުވީ ހިޔާ ފްލެޓުތައް ދޫކުރި އިރު ފްލެޓުްތައް ލިބުނު ފަރާތްތަކާއެކު ވެވުނު އެއްބަސްވުމުގެ ދަށުން މަހުން މަހަށް ކުލި ނުދައްކާނަމަ ޖޫރިމަނާ އަރާނެ ކަމަށެވެ. އަދި ކުލި ނުދައްކާ ފަރާތްތަކަށް ޖޫރިމަނާާއެކު ފައިސާ ދެއްކުމަށް މިހާރު ނޯޓިސް ފޮނުވާފައިވާ ކަމަށް ވެސް އޭނާ ވިދާޅުވިއެވެ.

ހިޔާ ފްލެޓުތަކުގައި މިދިޔަ އަހަރުގެ ޖުލައި މަހުން ފެށިގެން މީހުން ދިރިއުޅެން ފަށާފައިވާއިރު އެ ފަރާތްތަކަށް ލުއި ކުރުމުގެ ގޮތުން ސަރުކާރުން ވަނީ ދެފަހަރަކު ކުލި ފަސްކޮށްދީފައެވެ. އެ ފްލެޓްތަކުން ކުލި ނަގަން ފަށާފައިވަނީ މިދިޔަ އޭޕްރިލް މަހުން ފެށިގެންނެވެ. ކުލި ނަގަން ފެށިތާ މި މަހަށް 3 މަސް ވެފައިވާއިރު މިހާތަނަށް އެއްވެސް މަހަކު ކުލި ނުދައްކާ ފަރާތްތައް ވެސް އެބަތިބި ކަމަށް މައުލޫމާތު ލިބެއެވެ.

ސަރުކާރުން ނިންމާފައިވާ ގޮތުގައި ހިޔާ ފްލެޓުތަކުން ކޮންމެ މަހަކު ދައްކަން ޖެހޭނީ 8،500 ރުފިޔާއެވެ. އެއީ ކުލީގެ 7،500 ރުފިޔާ އާއި ސާވިސް ފީގެ ގޮތުގައި ދައްކަން ޖެހޭ 1000 ރުފިޔާއެވެ. ނަމަވެސް މިއީ ބޮޑު އަގެއް ކަމަށް ބުނެ ބައެއް ފަރާތްތަކުން ވަނީ ކުލި ދައްކަން ދެކޮޅު ހަދާފައެވެ.

ހިޔާ ފްލެޓްތަކުގައި ދިރިއުޅޭ ބައެއް ފަރާތްތައް ގުޅިގެން ހަދާފައިވާ "ހިޔާ ޔޫނިއަން" އިން ވެސް ވަނީ ކުލި ނުދެއްކުމަށް އެތަނުގައި ދިރިއުޅޭ ފަރާތްތަކަށް ގޮވާލައިފައެވެ. އެ ޔޫނިއަން އިން ޑިމާންޑު ކުރަނީ ފްލެޓްތަކުގެ ކުލި 5،600 ރުފިޔާއަށް ކުޑަކުރުމަށެވެ. ނަމަވެސް އެ އަގަށް ކުލި ކުޑަކޮށްފިނަމަ ފްލެޓް ހެދުމަށް ނަގާފައިވާ ލޯނު ދައްކަން ޖެހޭ މުއްދަތައް ނުދެއްކޭނެ ކަމަށް ސަރުކާރުން ވަނީ ބުނެފައެވެ.

ކުލި ނުދައްކާ ފަރާތްތައް ޖޫރިމަނާ ދައްކަން ޖެހިފައިވާއިރު ޖޫރިމަނާ ފައިސާއާއެކު ކުލި ދައްކަން އެޗްޑީސީން ވަނީ ކުރިން އެއް މަސް ދުވަހުގެ މުއްދަތެއްވެސް ދީފައެވެ. ނަމަވެސް ކޮންމެ މަހެއްގެ 10 ވަނަ ދުވަހުގެ ކުރިން ކުލި ދައްކަން އެޗްޑީސީއިން އަންގާފައިވާއިރު، މިހާތަނަށް 3 މަސް ދުވަހުގެ ކުލި ނުދައްކާ ވާ ފަރާތްތަކުން ޖޫރިމަނާއާއެކު ކުލީގެ ގޮތުގައި 25,000 އަށްވުރެ ގިނަ ފައިސާ ދައްކަން ޖެހެއެވެ.