ކޮންގްރެސް ބާއްވަން ތަނެން އެމްޑީޕީއަށް ދިނުމަށް ސަރުކާރަށް ލާޒިމްވާނެ: އަނަސް
އަންނަމަހުގެ 16 ގެ ކުރިން ގޮފިތައް ހަދަން ޖެހޭ
އެމްޑީޕީގެ ސެކެރެޓަރީ ޖެނެރަލް އަނަސް އަބްދުއްސައްތާރު
އެމްޑީޕީގެ ކޮންގްރެސް ބޭއްވުމަށް ތަނެން ދިނުމަށް ގާނޫނު އަސާސީން ސަރުކާރަށް ލާޒިމްވާނެ ކަމަށް އެމްޑީޕީގެ ސެކްރެޓަރީ ޖެނެރަލް އަނަސް އަބްދުއްސައްތާރު ވިދާޅުވެއްޖެއެވެ.
އާދީއްތަ ދުވަހުގެރޭ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން އަނަސް ވިދާޅުވީ ސިޔާސީ ޕާޓީތަކުގެ ގާނޫނުގައި ބުނެފައިވާގޮތުން ޕާޓީތަކުގެ އަހަރީ އާންމު ޖަލްސާ ނުވަތަ ކޮންގްރެސް ބާއްވާނެ ތަނެން ސަރުކާރުން ހަމަޖައްސަދޭން ޖެހޭނެ ކަމަށެވެ. ދިވެހި ރާއްޖޭގެ އެކި ކަންކޮޅުތަކުން އެމްޑީޕީގެ ގިނަ އަދަދެއްގެ މެމްބަރުން ބައިވެރިވާ ކޮންގްރެސް ބޭއްވުމަށް ތަނެން ނުލިބޭ މައްސަލަ ކޮންމެ ފަހަރަކު ވެސް ދިމާވާކަމަށް އަނަސް ވިދާޅުވިއެވެ. އެހެންނަމަވެސް މިއަހަރުގެ ސެޕްޓެމްބަރުމަހު 15 އިން 17 އަށް ބޭއްވުމަށް ހަމަޖެހިފައިވާ އެޕާޓީގެ 4 ވަނަ ކޮންގްރެސް ބާއްވާނެ ތަނެން ސަރުކާރުން ހަމަޖައްސައިދޭނެ ކަމަށް އުންމީދު ކުރައްވާ ކަމަށް އަނަސް ވިދާޅުވިއެވެ.
" މިހާރު ވެސް މި ދަނީ ކޮންގްރެސް ބޭއްވުމަށް ތަނެން ހޯދަމުން، ޕާޓީގެ ގިނަ އަދަދެއްގެ މެމްބަރުން ރާއްޖޭގެ އެކި ކަންކޮޅުތަކުން ކޮންގްރެސްގައި ބައިވެރިވާ އިރު، ކޮންމެ ފަހަރަކު ވެސް ދިމާވަނީ ތަނުގެ ދަތިކަން، ގާނޫނުން ސަރުކާރަށް ލާމިޒް ވާނެ، ކޮންގްރެސް ބާއްވާނެ ތަނެން ދިނުން" ފަލަސުރުޚީ ޕްރޮގްރާމްގައި ވާހަކަ ދައްކަވަމުން އަނަސް ވިދާޅުވިއެވެ.
ކުރިއަށް އޮތް ރިއާސީ އިންތިހާބުގެ ކުރިން ކޮންގްރެސް ބޭއްވުމަކީ އެމްޑީޕީއަށް މުހިންމުކަމެއްކަން ފާހަގަކުރައްވާ އަނަސް ވިދާޅުވީ ޕާޓީގެ އާންމު މެމްބަރުންގެ ޚިޔާލާއި އެކު ޕާޓީގެ ހަރަކާތަށް ބައްޓަން ކުރަންވީ ގޮތާއި، ކުރިއަށް އޮތް ތަނުގައި ރަނގަޅު ކުރަންވީ ކަންތަންތަކުގެ އިތުރުން މުހިންމު ނިންމުންތަކެއް ކޮންގްރެސް އިން ނިންމުގެ ބާރު އޮންނާނެ ކަމަށެވެ.
އެގޮތުން ކޮންގްރެސްގައި އެޕާޓީގެ ގައުމީ މަޖިލީހުގެ މެމްބަރުންނާއި، ޕާޓީގެ މަގާމްތަކުގައި ތިއްބެވި ލީޑަރޝިޕްގެ ބޭފުޅުންގެ އިތުރުން ގޮފިތަކުގެ ރައީސުންނާއި ނިމިގެން ދިޔަ ލޯކަލް ކައުންސިލް އިންތިހާބުގައި އެމްޑީޕީގެ ޓިކެޓްގައި ބައިވެރިވި ކައުންސިލަރުން ބައިވެރިވާނެ ކަމަށް އަނަސް ވިދާޅުވިއެވެ.
އެމްޑީޕީން ބުނީ 2017 ވަނަ އަހަރުގެ ސެޕްޓެމްބަރުމަހު 15 އިން 17 އަށް ބޭއްވުމަށް ހަމަޖެހިފައިވާ އެޕާޓީގެ 4 ވަނަ ކޮންގްރެސްގައި ބައިވެރިވުމުގެ ފުރުޞަތު ލިބިގެންވާ ޕާޓީގެ ގޮފިތަކުގެ ރައީސުން ކަނޑައެޅުމަށްޓަކައި މިހާރު ރަޖިސްޓްރީކުރެވިފައިވާ ގޮފިތައް ފުރިހަމަކުރުމަށާއި އަލަށް ގޮފި ހެދުމަށް އެދޭ ފަރާތްތަކަށް އެ ފުރުޞަތު އަންނަ މަހުގެ 16 އާ ހަމައަށް ހުޅުވާލެވިފައިވާކަމަށެވެ.
މިހާރު ވެސް އެމްޑީޕީގައި ގިނަ އަދަދެއްގެ ގޮފިތަށް ރަޖިސްޓްރީ ކޮށްފައިވާކަން ފާހަގަކުރައްވާ އަނަސް ވިދާޅުވީ ރަޖިސްޓްރީކޮށްފައިވާ ގޮފިތަކުގެ މެމްބަރޝިޕް ފުރިހަމަނުވެ ހުރެއްޖެނަމަ އެކަން ކުރަން ޖެހޭނެ ކަމަށެވެ. އެކަން މިހާރު އެޕާޓީން އާންމުކޮށް އަންގައި އިއުލާނު ކޮށްފައިވާ ކަމަށްވެސް އެނާ ވިދާޅުވިއެވެ.
މީގެ އިތުރުން އަލަށް ގޮފިތަށް އުފައްދަން ބޭނުންވާ މެމްބަރުންނަށް ގޮފިތަށް ރަޖިސްޓްރީ ކުރެވޭނީ 50 މެމްބަރުންގެ ސޮއިއާއި އެކު ހުށަހަޅައިގެންކަމަށް އަނަސް ވިދާޅުވިއެވެ. އަދި ކޮންގްރެސްގައި ބައިވެރިވެވޭނީ އަންނަމަހުގެ 16ގެ ކުރިން އުފައްދައި އަދި 31 ޖުލައި 2017 ގެ ކުރިން ހިންގާ ކޮމިޓީ އިންތިޚާބުކުރާ ގޮފިތަކުގެ ރައީސުންނަށް ކަމަށް އަނަސް ވިދާޅުވިއެވެ.
