އިންޑޮނީޝިޔާއިން ހައްޖަށް ދިޔަ ފުރަތަމަ ފްލައިޓަށް ޚާއްސަ މަރުހަބާއެއް
ހައްޖާޖީންނަށް ވަނީ މަލުގެ ގުލްދަސްތާތަކުން މަރުހަބާ ކިޔާފަ
ހައްޖު 1443 - ހައްޖާޖީންނަށް މަރުހަބާ ކިޔަނީ
"މައްކާ ރޫޓް" އިނީޝިއޭޓިވްގެ ދަށުން އިންޑޮނީޝިޔާއިން ހައްޖަށް ދިޔަ ފުރަތަމަ ގްރޫޕް ބުރާސްފަތި ދުވަހު ސައޫދީއަރަބިއްޔާއަށް ދިއުމާއެކު ޕްރިންސް މުހަންމަދު ބިން އަބްދުލް އަޒީޒް އިންޓަރނޭޝަނަލް އެއާޕޯޓުން ވަރަށް ޚާއްސަ މަރުހަބާއެއް ކިޔައިފި އެވެ. މިއީ އިންޑޮނީޝިޔާއިން މި ޕްރޮގްރާމްގައި ބައިވެރިވި ފުރަތަމަ ފަހަރެވެ.
ސައޫދީ ސަރުކާރުން 2019 ވަނަ އަހަރު ފަށާފައިވާ "މައްކާ ރޫޓް" ނުވަތަ "މައްކާ ރޯޑް" ހުޅުވާލާފައިވަނީ އިސްލާމީ ފަސް ގައުމަކަށެވެ. މި 5 ގައުމަކީ ޕާކިސްތާން މެލޭޝިޔާ އިންޑޮނީޝިޔާ މޮރޯކޯ އަދި ބަންގްލަދޭޝްއެވެ. މައްކާ ރޫޓް އިނީޝިއޭޓިވްއަކީ ހައްޖަށްދާ ހައްޖާޖީންގެ ދަތުރުގެ ކަންތައް ފަސޭހަކޮށްދިނުމަށް ސައުދީ ސަރުކާރުން އެކުލަވާލާފައިވާ "ވިޝަން 2030" ގެ ދަށުން ކުރިއަށްގެންދާ ޚާއްސަ ޕްރޮގްރާމެކެވެ.
މި ޕްރޮގްރާމްގައި ބައިވެރިވާ ހައްޖާޖީންގެ ދަތުރުގެ ކަންތައް ފަސޭހަކޮށް ދިނުމަށް ސައޫދީ އަރަބިއްޔާއިން ޚާއްސަ ފިޔަވަޅުތަކެއް ވަނީ އަޅާފައެވެ. މިގޮތުން ފަސޭހައިން ވިސާ ހަމަޖައްސާ ދިނުމާއި، ސިއްހީ ޗެކްއަޕުތައް ފުރިހަމަ ކުރުވުމާ އަދި އެއާޕޯޓްގައި ގިނަ އިރު ތިބެން ނުޖެހި ވަގުތުން ބަސްތަކުގަ އެބަޔަކު ތިބެން ހަމަޖެހިފައިވާ ތަންތަނަށް ގެންގޮސްދިނުން ހިމެނެ އެވެ. އަދި ހައްޖާޖީން ދާންވާއިރަށް އެމީހުންގެ ފޮށިތަންމަތިވެސް ތިބޭތަނަށް ގެންގޮސްދޭނެއެވެ.
"މައްކާ ރޫޓް" ހަރަކާތް ކުރިޔަށް ގެންދަނީ ސައޫދީ އަރަބިއްޔާގެ ކަމާބެހޭ އޮފީސްތައް ކަމަށްވާ މިނިސްޓްރީ އޮފް ފޮރިން އެފެއަރޒް، މިނިސްޓްރީ އޮފް ހެލްތު، ހައްޖު އެންޑް އުމްރާ އޮފީސް، ސިވިލް އެވިއޭޝަން އޮފީސް، ޒަކާތު އޮފީސް، ކަސްޓަމްސް އޮތޯރިޓީ އަދި ސައޫދީ ޑޭޓާ އެންޑް އާޓިފިޝަލް އިންޓެލިޖަންސް އޮތޯރިޓީ ގުޅިގެންނެވެ. މި އިދާރާތައް ތަމްސީލް ކުރާ އޮފިޝަލުން ބުރާސްފަތި ދުވަހު ވަނީ އެއާޕޯޓުން ހައްޖާޖީންނަށް މަރުހަބާ ކިޔާފައެވެ.
