ޓީޗަރުންގެ މުސާރަ ދިނުމުގައި މައްސަލަތައް ހުރިކަން ބައެއް ފަރާތްތަކުން ފާހަގަކޮށްފައިވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ނޫސްވެރިންނާއި ބައްދަލު ކުރައްވާ ވާހަކަ ދައްކަވަމުން ރައީސް ވިދާޅުވީ މައްސަލަތައް ހުރިކަން ބައެއް ފަރާތްތަކުން ފާހަގަކޮށްފައިވާއިރު އެކަންތައްތައް ބައްލަވާނެ ކަމަށެވެ. އަދި ގެންނަންޖެހޭ ބަދަލެއް އޮތްތޯ ބަލައްވާނެ ކަމަށް ވެސް ވިދާޅުވިއެވެ.

މީގެއިތުރުން ދައުލަތުގެ އެހެން އިދާރާތަކުގެ މުވައްޒަފުންގެ މުސާރަ ވެސް ބޮޑު ކުރުމުގެ މަސައްކަތް ކުރައްވަމުން ގެންދަވާ ކަމަށް އެމަނިކުފާނު ވިދާޅުވިއެވެ.

ޓީޗަރުންގެ މުސާރައިގެ އައު އޮނިގަނޑު އިއުލާންކުރީ މެއި މަހުގެ 1ވަނަ ދުވަހުއެވެ. މިހާރު ވަޒީފާގައި ތިބި ޓީޗަރުން އައު އޮނިގަނޑަށް ހިޖުރަކުރުމުގައި ހާޞިލްކޮށްފައިވާ ސެޓްފިކެޓްތަކަށް ބަލާފައި ނުވާނެ ކަމަށް ވެސް ރައީސް އޮފީހުން ވަނީ ބުނެފައެވެ.

އައު އޮނިގަނޑާ ބެހޭ ގޮތުން ހުރި ކަންބޮޑުވުންތަކާ ބެހޭ ގޮތުން ރައީސް އޮފީހުން ބުނީ، އައު އޮނިގަނޑަށް ހިޖުރަކޮށްފައިވަނީ މުވައްޒަފު ހުރި މަޤާމުގެ ރޭންކަށް ބަލައިގެން ކަމަށެވެ. އައު އޮނިގަނޑުން އަލަށް ވަޒީފާ ހަމަޖައްސާއިރު، ވަޒީފާ ހަމަ ޖެހޭނީ އޮނިގަނޑުގައިވާ ޝަރުތު ހަމަވާނަމަ ކަމަށާއި، މިހާރު ހުރި ރޭންކުން އޭގެ މަތީ ރޭންކަށް ބަދަލުވާއިރު އޮނިގަނޑުގެ އެ ރޭންކުގައި ބުނާ ޝަރުތުތައް ފުރިހަމަވާން ވާނެ ކަމަށްވެސް ރައީސް އޮފީހުން ބެނެއެވެ.

ޓީޗަރުންގެ ޖޮބް މެޓްރިކްސްގެ ރޭންކް 2 އިން މަތީގެ ރޭންކްތަކުގެ ތަޢުލީމީ ފެންވަރުގެ ގޮތުގައި ދިވެހިރާއްޖޭގެ ޤައުމީ ސަނަދުގެ އޮނިގަނޑު ލެވެލް 7 ނުވަތަ 8 ގެ ބެޗްލާރސް ޑިގްރީއެއް ޙާސިލުކޮށްފައިވާންވާނެ ކަމަށް ބަޔާން ކޮށްފައިވެއެވެ.

އަލަށް އެކުލަވާލި އޮނިގަނޑަށް ހިޖްރަ ކޮށްފައިވަނީ، ޕްރިންސިޕަލުން، ޑެޕިއުޓީ ޕްރިންސިޕަލުން، މުދައްރިސުން، ކުރީގައި އީޑީއޯ އަދި އީއޯގެ މަޤާމުގައި ތިބި މުވައްޒަފުންނެވެ. ދެން ހުރި މަޤާމްތަކުގައި ތިބި މުވައްޒަފުން ތިބޭނީ، މިހާރުވެސް އަމަލުކުރެވެމުންދާ އޮނިގަނޑުތަކުގައެވެ.

އައު އޮނިގަނޑަށް ހިޖުރަ ކުރި ފަރާތްތަކަށް މުސާރަ ކަނޑައެޅިފައިވަނީ 3 ބަޔަކަށެވެ. އެއީ އަސާސީ މުސާރަ، ޖޮބް އެލަވަންސް، އެޓެންޑަންސް އެލަވަންސްއެވެ.

އައު އޮނިގަޑަށް ހިޖުރަ ކުރާ ފަރާތްތަކަށް އިތުރު ގަޑީގެ ފައިސާ ނުވަތަ އޯޓީ ލިބޭނީ ރަސްމީ ކޮންމެ ދުވަހެއްގައި 8 ގަޑިއިރަށް ވުރެ އިތުރަށް ކުރާ މަސައްކަތަށެވެ. ނަމަވެސް ރަސްމީ ވަގުތުގެ ފަހުން ކުރާ މަސައްކަތާއި އެ މަސައްކަތަށް ހޭދަވާ ވަގުތުގެ ރިކޯޑު ބަލަހައްޓަންވާނެއެވެ.

އައު އޮނިގަނޑަށް ހިޖްރަ ނުކުރާ ފަރާތްތަކަށް ލިބޭނީ ކުރީގައިވެސް ލިބެމުންދިޔަ މުސާރައެވެ. އޭގެ އިތުރުން އަސާސީ މުސާރައިގެ 35 އިންސައްތަ އެފަރާތްތަކަށް ލިބޭނެއެވެ.

އައު އޮނިގަނޑަށް ހިޖުރަ ނުކުރާ، އިދާރީ މުވައްޒަފުންގެ ތެރެއިން އެމް.އެސް ރޭންކާއި އޭގެ މަތީ ރޭންކުތަކަށް އިތުރުގަޑި ދެވޭނީ ހުކުރު، ހޮނިހިރު އަދި ރަސްމީ ބަންދު ދުވަސްތައް ފިޔަވާ 44 ގަޑިއިރަށް ވުރެ އިތުރަށް ކުރާ މަސައްކަތަށެވެ. އެސް.އެސް ރޭންކާއި ޖީ.އެސް ރޭންކުގެ މުވައްޒަފުންނަށް ކުރިންވެސް އިތުރުގަޑި ލިބުނުގޮތަށް ލިބޭނެއެވެ.

ޑިގުރީ ސަނަދެއް ޙާސިލުކޮށްފައިވާ ޓީޗަރަކު އައު އޮނިގަނޑަށް ހިޖުރަކުރުމަށްފަހު މާސްޓަރސް ސަނަދެއް ހުށަހަޅައިފިނަމަ އެމުވައްޒަފުގެ މަޤާމުގެ ރޭންކު ބަދަލުވާނީ އޮނިގަނޑުގެ ޝަރުތުތަކުގައި ބަޔާންކޮށްފައިވާ ކަންކަން ފުރިހަމަވުމުންނެވެ.

ލީޑިންގ ޓީޗަރުންގެ ޓެނުއަރޝިޕް އެލަވަންސް ދިނުމަށް އިތުރު ހުއްދައެއް ނަގާކަށްނުޖެހޭނެއެވެ. މިހާރުވެސް ޓެނުއަރޝިޕް ލިމެބުންދާ ލީޑިން ޓީޗަރުންނަށް ބޮޑުވި އަދަދާ އެއްގޮތަށް އެލަވަންސް ދިނުމުން ފުދޭނެއެވެ. އެހެންނަަމަވެސް އަލަށް ލީޑީންގ ޓީޗަރުކަން ހަމަޖެހޭ ފަރާތްތަކަށް މިނިސްޓްރީގެ އުޞޫލާ އެއްގޮތަށް ފޯމު ހުށަހަޅައި ހުއްދަ ހޯދަންވާނެ ކަމަށް ރައީސް އޮފީހުން ބުނެއެވެ. ލީޑިންގ ޓީޗަރުންނަށް ޓެނުއަރ އެލަވަންސް ގެ ގޮތުގައި ދޭނީ މަހަކަށް 2000 ރުފިޔާއެވެ.