ހާއްސަ އެހީއަށް ބޭނުންވިއަސް، ހުނަރުގެ މުތެއް!

ފުރާވަރުގެ ދުވަސްތައް ގުނަމުން ދާ މައިކަލް ހަނޫޝްއަކީ ލޮލުގެ ފެނުމުން މަހްރޫމުވެފައި ވިއެއް ކަމަކު، ކުޅަދާނަ ފަންނުވެރިއެކެވެ. ސޫރިޔާއަށް ނިސްބަތްވާ ހަނޫޝްއަކީ، ބައިނަލްއަގުވާމީ ފެންވަރުގެ އޮޕޭރާ ލަވަކިއުންތެރިއަކަށް ވުމުގެ ފޮނި ހުވަފެންތައްވެސް ދެކެމުން އަންނަ، ހިތްވަރުގަދަ މިއުޒީޝަނެއްވެސްމެއެވެ.

އޭނާގެ އަޑު ތަމްރީނު ކުރުމުގެ އިތުރުން އޮޕޭރާ ލަވަކިއަން ދަސްކޮށްދޭ ކުލާސްތަކަށް ހަނޫޝް ދާން ފެށީ، އޭނާގެ އުމުރުން އެންމެ 4 އަހަރުގައެވެ. މިއުޒިކީ އިންސްޓްރުމަންޓެއް ކަމަށް ވާ ވައޮލިންވެސް ކުޅެމުން އަންނަ ހަނޫޝް ވަނީ، ސޫރިޔާގެ ވެރިރަށް ދިމިޝްކުގައި ބޭއްވި ގިނަ ކޮންސެޓް ތަކެއްގައިވެސް ބައިވެރިވެފައެވެ.

ކުލާހަށް ދިޔަނަމަވެސް އިންސްޓަރަކްޓަރުގެ ފަރާތުން އެއްޗެއް އުނގެނުމަކީ ހަނޫޝްއަށް ދަތި ކަމެކެވެ. ލޮލުގެ ފެނުމުން މަހްރޫމުވެފައި ހުރުމުން، ވައޮލިންގައި ހިފަހައްޓާލާނެ ގޮތްވެސް އޭނާއަށް ފެނިފައެއް ނުވެއެވެ. އިނގިލިތައް ހަރަކާތް ކުރާނެ އުކުޅުތަކެއްވެސް އެގޮތަކަށް ދަހެއް ނުވެއެވެ. ނަމަވެސް، އުމުރުން 15 އަހަރުގެ ހަނޫޝް އޭނާގެ މިއުޒިކީ ހުނަރު ފަރިތަ ކުރަނީ ގޭގައެވެ. އޭނާގެ ދެ އަޚަކާއެކުގައެވެ.

މިދިޔަ އަހަރު ހަނޫޝް ވަނީ އިންޓަނޭޝަނަލް ފެސްޓިވަލް އެންޑް ކޮމްޕެޓިޝަން އޮފް އިންކްލޫސިވް ކްރިއޭޓިވިޓީގައި، އޭނާގެ ވައޮލިން ކުޅުމުގެ ހުނަރުތައް ދައްކާލާފައެވެ. ދައްކާލީ އެކަންޏެއް ނޫނެވެ. 1 ވަނަވެސް ކަށަވަރު ކުރިއެވެ.

ހަނޫޝް އުފަންވިއިރުވެސް ލޮލުގައި މައްސަލަތަކެއް ހުއްޓެވެ. ސާޖަރީތައް ކާމިޔާބު ނުވެ، ލޯފާން ކުއްޖެއްގެ ގޮތުގައި ބޮޑުވުމަށް މަޖުބޫރުވީއެވެ. ނަމަވެސް، އެއީ އެނާގެ ހުވަފެންތައް ހަގީގަތަކަށް ހެދުމަށް އޮތް ހުރަހެއް ކަމުގައި އޭނާ ނުދެކެއެވެ. އާއިލާއަކުންވެސް ނުދެކެއެވެ. ހަނޫޝްގެ މަންމަ، ނަދީން އަސްވަދުވެސް ހުރީ، ދަރިފުޅުގެ ހުނަރުތައް ކުރިއެރުވުމަށް ކުރެވެން އޮތްހާ ކަމެއް ކޮށްދޭށެވެ.

މިއުޒިކްގެ އިތުރުން ހަނޫޝްއަކީ ފެތުމަށްވެސް ލޯބިކުރާ ކުއްޖެކެވެ. ލޮލުގެ ފެނުމުން މަހްރޫމުވެފައިވާ ހަނޫޝްގެ ސުވިމިންގް ކޯޗެއްގެ ގޮތުގައި ހުރި މަހްމޫދު ނައްޔީރު ބުނާ ގޮތުގައި، ހަނޫޝް ގޮވައިގެން މޫދަށް ގޮސް، ހެލިފެލިވާންވީ ގޮތް، އޭނާގެ އަތުގައި ހިފަހައްޓައިގެން ކުރަހާ ދެނީއެވެ. ފެތުމުގެ ތެރޭގައި ކުރިއަށާއި ފަހަތަށް އަތް ގެންދާނެ ގޮތް ކިޔައިދިނީވެސް، ހަނޫޝްއަށް ކިޔައިދީގެން އޭނާގެ ހިޔާލު ބޭނުން ކޮށްގެން ވަށްބޮޅާއި ފަޅި ބުރު ކުރަހައިގެންނެވެ. ކޯޗު ބުނީ، ޝުކުރު ހުރީ ހެއްދެވި ފަރާތަށް ކަމަށާ، ހަނޫޝްގެ ތޫނުފިލި ކަމާއެކު، ކޯޗުގެ މިޝަން ކިތަންމެހާވެސް ކާމިޔާބު ކަމަށެވެ.