ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އާއިލީ ގެކޮޅު ކަމަށްވާ، ގ. ކެނެރީގޭގެ ފާރުގައި "އިންޑިއާ އައުޓް" ލިޔުނު މީހާ ހައްޔަރުކޮށްފިއެވެ.
ފުލުހުންގެ މީޑިއާ އޮފިޝަލް ބުނި ގޮތުގައި، މި މައްސަލައިގައި ހައްޔަރުކޮށްފައިވަނީ 28 އަހަރުގެ ދިވެހި ފިރިހެނެކެވެ. އޭނާ ހައްޔަރުކޮށްފައިވަނީ ކޯޓު އަމުރުގެ ދަށުން ކަމަށް ފުލުހުން ބުންޏެވެ.
އެ ގޭގެ ފާރުގައި "އިންޑިއާ އައުޓް" ލިޔުނީ 30 މެއިގައެވެ. މި މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ބުންޏެވެ.
"އިންޑިއާ އައުޓް" ހަރަކާތަކީ އިދިކޮޅު ކޯލިޝަނުން އިންޑިއާއާ މެދު ރައްޔިތުންގެ މެދުގައި ނަފްރަތު އުފެއްދުމަށް ހިންގާ ހަރަކާތަކަށްވާތީ، އެއީ ގައުމީ ސަލަމާތަށް ހުރި ނުރައްކަލެއް ކަމަށް ނިންމައި ރައީސް ވަނީ ގަރާރެއްވެސް ނެރުއްވާފައެވެ. ނަމަވެސް އިދިކޮޅުން އެ ހަރަކާތް ހުއްޓައެއްނުލައެވެ. އެގޮތުން މާލޭގެ އެކި ތަންތަނުގައި "އިންޑިއާ އައުޓް" ޖެހުމާއި ބެނާތައް ނެގުމާއި ކަރުދާސް އެޅުން ފަދަ ކަންކަން އެ ފަރާތްތަކުން ދަނީ ކުރަމުންނެވެ.
މި ހަރަކާތް ހިންގުމުގައި އިސްކޮށް އުޅޭ މީހެއް ކަމަށް ޝައްކުކުރެވޭތީ ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް ދެ ފަހަރަކު ހައްޔަރުކުރިއެވެ. ނަމަވެސް އޭނާ މިހާރު ވަނީ ދޫކޮށްލާފައެވެ.
"އިންޑިއާ އައުޓް" ހަރަކާތަކީ 2023އާ 2024ގެ އިންތިޚާބަށް ކުރަމުން އަންނަ ކަމެއް ކަމަށް ޕީޕީއެމްގެ އިސް ސަފުގައި މަސައްކަތްކުރި ބައެއް ފަރާތްތަކުން ވެސް ވަނީ ބުނެފައެވެ. އަދި އެއީ އަމިއްލަ އެދުމުން ފުރިފައިވާ ބަޔަކު ހިންގާ ކަމެއް ކަމަށް ވެސް ވަނީ ބުނެފައެވެ.
