އެމްއާރުއެމް، އެމްޓީޑީ، ޑީއާރުޕީ އަދި އެމްއެލްއެސްޑީއަށް މީހުން ހަމަކުރަން ދިން ފުރުސަތު މިމަހު ހަމަވާނެ

4 ޕާޓީއެއްގައި މެމްބަރުން ހަމަނުވާތީ މެމްބަރުން ހަމަކުރަން އެ ޕާޓީތަކަށް ދިން މުއްދަތު މި މަހު ހަމަވާނެ ކަމަށާއި، ގިނަ ޕާޓީތަކަކުން މެމްބަރުން ހަމަކުރާނެކަމަށް ލަފާކުރެވޭކަމަށް އިލެކްޝަންސް ކޮމިޝަނުން ބުނެފިއެވެ.

އެ ކޮމިޝަނުގެ ރައީސް "ރާއްޖެ އެމްވީ"އަށް ވިދާޅުވީ، ޕާޓީތަކަށް މެމްބަރުން ހަމަކުރަން ނޯޓިސް ފޮނުވީ މާޗު މަހު ކަމަށެވެ. އަދި ތިން މަސް ދުވަހުގެ މުއްދަތެއް އެ ޕާޓީތަކަށް ދިންކަމަށާއި، މި މުއްދަތުގެ ތެރޭގައި 4 ޕާޓީންވެސް ގިނަ އަދަދެެއްގެ ފޯމު ހުށަހެޅިކަމަށެވެ.

ފުއާދު ވިދާޅުވީ ޕާޓީތަކުން ފޯމުތައް ހުށަހެޅިނަމަވެސް، އޭގެތެރެއިން އެޕްރޫވްވާނެ އަދަދެއް ވިދާޅުވަން ދަތި ކަމަށެވެ. ނަމަވެސް ގިނަ ޕާޓީތަކުން މެމްބަރުންގެ އަދަދު ހަމަކުރާނެކަމަށް ލަފާކުރެއްވޭކަމަށް އޭނާ ވިދާޅުވިއެވެ.

މުއްދަތު ދިން ޕާޓީތަކަށް މެމްބަރުން ހަމަނުކުރެވިއްޖެނަމަ އެ ޕާޓީތައް އުވާލާނެއެވެ. މިހާރު އީސީއަށް ހުށަހަޅާފައިވާ ހުރިހާ ފޯމެއް މުއްދަތުގެ ތެރޭގައި ޕްރޮސެސްކޮށް ނިންމާނެކަމަށްވެސް ފުއާދު ވިދާޅުވިއެވެ.

ގާނޫނުގައި ބުނެފައިވާގޮތުގައި، ސިޔާސީ ޕާޓީއެއްގައި މަދުވެގެން 3000 މެމްބަރުން ތިބެން ޖެހޭނެއެވެ. އެގޮތުން ކުރީގެ ރައީސް މައުމޫން އަބްދުލް ގައްޔޫމް އުފެއްދެވި އެމްއާރުއެމްއާއި ޑީއާރުޕީއާއި މޯލްޑިވްސް ލޭބަރ އެންޑް ސޯޝަލް ޑިމޮކްރެޓިކް ޕާޓީ (އެމްއެލްއެސްޑީ)އާއި މޯލްޑިވްސް ތަރޑްވޭ ޑެމޮކްރެޓިކްސް (އެމްޓީޑީ)ގައި 3000 މެމްބަރުން ހަމައެއްނުވެއެވެ.

ރާއްޖޭގައި ސިޔާސީ ޕާޓީތައް ގިނަނަމަވެސް، ގިނަ ޕާޓީތަކުގައި 10،000 މެމްބަރުންވެސް ހަމައެއް ނުވެއެވެ. ގާނޫނުގައި ބުނާގޮތުން ދައުލަތުން ބަޖެޓް ދޭނީ 10،000 މެމްބަރުން ހަމަވާ ޕާޓީތަކަށް އެކަންޏެވެ. މި އަދަދު ހަމަވާ ޕާޓީތަކުގެ ތެރޭގައި ހިމެނެނީ 4 ޕާޓީއެވެ. އެއީ އެމްޑީޕީއާއި ޕީޕީއެމްއާއި ޖުމްހޫރީ ޕާޓީއާއި އަދާލަތު ޕާޓީއެވެ.

މެމްބަރުން ހަމަކުރަން ބައެއް ޕާޓީތަކުން ސައްހަނޫން ފޯމުތައް ހުށަހަޅާ މައްސަލަވެސް ވަނީ ބޮޑުވެފައެވެ. މިކަމާގުޅިގެން އީސީން ވަނީ، ސައްހަނޫން ކޮންމެ ފޯމަކަށް، އެ ޕާޓީއެއް 10،000 ރުފިޔާއިން ޖޫރިމަނާކުރަން ނިންމާފައެވެ. އަދި ރަޖިސްޓްރާ ވެސް ފުރަތަމަ ފަހަރަށް 5،000 ރުފިޔާއިން، އަދި އެކަން ތަކުރާރުވެއްޖެނަމަ 10،000 ރުފިޔާއިން ޖޫރިމަނާކުރަން ވަނީ ނިންމާފައެވެ.

މީގެ އިތުރުން އޮކްޓޯބަރު މަހާ ހަމައަށް އެކަންކަން އިސްލާހުނުވެއްޖަނަމަ، ފޯމުގައި ސޮއިކުރާ ހެކިވެރިންވެސް ޖޫރިމަނާކުރަން އިލެކްޝަންސް ކޮމިޝަނުން ވަނީ ނިންމާފައެވެ.