ޑިޒައިން އެންޑް ބިލްޑް އުސޫލުން ގއ.ވިލިނގިލީގައި 50 ހައުސިންގ ޔުނިޓް އެޅުމުގެ އެއްބަސްވުމެއްގައި މިނިސްޓްރީ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ އިން ސޮއިކޮށްފިއެވެ.

މި މަސައްކަތް ހަވާލު ކޮށްފައިވަނީ ދޮންބޭޒް ޕްރައިވެޓް ލިމިޓެޑާއެވެ. މި އެއްބަސްވުމުގައި ސޮއިކޮށްފައިވަނީ ބުރާސްފަތި ދުވަހު މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ ގައެވެ.

މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ހައުސިންގ ޑިޕާޓްމަންޓްގެ ޑިރެކްޓަރު ޖެނެރަލް އަހުމަދު ވިސާން ނަސީމެވެ. އަދި ދޮންބޭޒް ޕްރައިވެޓް ލިމިޓެޑްގެ ފަރާތުން ސޮއިކުރައްވާފައިވަނީ ކުންފުނީގެ ހެޑް އޮފް އޮޕަރޭޝަންސް އަލީ ހަމްދޫނެވެ.

މިނިސްޓްރީން މައުލޫމާތު ދޭ ގޮތުގައި މި މަސައްކަތުގެ އަގަކީ 48،164،794 (ސާޅިސް އަށް މިލިއަން އެއްލައްކަ ފަސްދޮޅަސް ހަތަރުހާސް ހަތްސަތޭކަ ނުވަދިހަ ހަތަރު) ރުފިޔާއެވެ. އަދި މަސައްކަތް ނިންމަން ދީފައިވާ މުއްދަތަކީ 270 ދުވަހެވެ.

އޭގެ އިތުރުން، މި މަޝްރޫއުގައި ހިމެނެނީ 50 ހައުސިންގ ޔުނިޓްކަމަށް މިނިސްޓްރީން ބުނެއެވެ. މި ޔުނިޓްތަށް ފަރުމާކުރެވިފައި ހުންނާނީ 2 ފަންގިފިލާގެ ރޯހައުސް ގޮތަށެވެ. ކޮންމެ ހައުސިންގ ޔުނިޓުގެ ބިލްޑްއަޕް އޭރިއާގައި 700 އަކަފޫޓް ހުންނާނެއެވެ.

ހަމައެއާއެކު، ޔުނިޓެއްގައި ހިމެނެނީ 3 ކޮޓަރި، 3 ފާޚާނާ، ސިޓިންގ ރޫމް، ބަދިގެ، ކާގެ، ބެލްކަނީ، ލޯންޑަރީ އަދި ސްޓޯރ ރޫމެވެ.

މީގެއިތުރުން ހައުސިންގ ޔުނިޓުތަކުގައި ދިރިއުޅޭ ފަރާތްތަކަށް ހިތްފަސޭހަ މާހައުލެއް ގާއިމުކުރުމަށްޓަކައި ޔުނިޓުތައް ވަށައިގެން އަލިކުރެވިގެން ދާނެކަމަށް މިނިސްޓްރީން ބުނެއެވެ. އަދި ޕާކެއްގެ އިތުރުން، ވެހިކަލް ޕާކް ކުރާނެ ސަރަހައްދެއް ގާއިމުކުރެވިގެންދާނެއެވެ.

މި މަޝްރޫއަށް ޚަރަދު ކުރަނީ ދިވެހި ސަރުކާރުން 2022 ވަނަ އަހަރުގެ ޕީއެސްއައިޕީ ބަޖެޓުންނެވެ.