ޕާޓީތަކުން ހުށަހަޅާ ސައްޙަ ނޫން ކޮންމެ ފޯމަކަށް 10،000 ރުފިޔާގެ ޖޫރިމަނާއެއް
1 ޖޫން 2022 | ބުދަ 11:10ސައްހަ ނޫން ކޮންމެ ފޯމަކަށް ޕާޓީ 10،000 ރުފިޔާއިން ޖޫރިމަނާ ކުރާނެ
އިލެކްޝަންސް ކޮމިޝަނަށް ހުށަހެޅި ފޯމުތަކެއް ބަލަނީ
ރާއްޖޭގެ ސިޔާސީ ޕާޓީތަކުން ރަޖިސްޓްރީ ކުރުމަށް ހުށަހަޅާ ފޯމުތަކުގެ ތެރެއިން ސައްޙަ ނޫން ކޮންމެ ފޯމަކަށް 10،000 ރުފިޔާ އިން ޖޫރިމަނާ ކުރަން އިލެކްޝަންސް ކޮމިޝަނުން ނިންމައިފިއެވެ.
އެ ކޮމިޝަނުން މިގޮތަށް ނިންމީ ބުދަ ދުވަހުއެވެ. އީސީގެ ނައިބު ރައީސް އިސްމާއިލް ހަބީބު ކުރެއްވި ޓްވީޓެއްގައި ވިދާޅުވީ މި ނިންމުމާ އެއްގޮތަށް އޭޕްރިލް މަހުގެ އެއްވަނަ ދުވަހުން ފެށިގެން ޕާޓީތަކުން ހުށަހަޅާފައިވާ ފޯމުތަކާ މެދު އަމަލު ކުރާނެ ކަމަށެވެ.
އޭނާ ވިދާޅުވިގޮތުގައި ސައްހަ ނޫން ކޮންމެ ފޯމަކަށް ޕާޓީ 10،000 ރުފިޔާ އިން ޖޫރިމަނާ ކުރާއިރު ފުރަތަމަ ފަހަރު ރަޖިސްޓްރާ 5،000 ރުފިޔާއިން ޖޫރިމަނާ ކުރާނެ ކަމަށެވެ. އަދި ދެފަހަރަށް ވުރެ ގިނައިން އެކަން ތަކުރާރު ކޮށްފިނަމަ ކޮންމެ ފަހަރަކު ރަޖިސްޓްރާ ވެސް 10،000 ރުފިޔާއިން ޖޫރިމަނާ ކުރަން ނިންމާފައިވާ ކަމަށް ވެސް ހަބީބު ވިދާޅުވިއެވެ.
ހަބީބު ވިދާޅުވި ގޮތުގައި ޖޫރިމަނާ ކުރަން އީސީން ނިންމީ ސައްޙަ ނޫން ފޯމު ހުށަހެޅުން ހުއްޓުވުމަށް ކަމަށެވެ. އަދި މި ބަދަލުން ވެސް އެކަށީގެންވާ ހައްލެއް ނުލިބޭނަމަ ފޯމުގައި ސޮއި ކުރާ ކޮންމެ ހެކިވެރިޔަކުވެސް 5،000 ރުފިޔާއިން ޖޫރިމަނާ ކުރަން ނިންމާފައިވާ ކަމަށް އޭނާ ވިދާޅުވިއެވެ. މިގޮތަށް އަމަލު ކުރަން ނިންމާފައިވަނީ މިއަހަރުގެ އޮކްޓޯބަރު މަހުން ފެށިގެންނެވެ.
އިލެކްޝަންސް ކޮމިޝަނަށް ސައްޙަ ނޫން ފޯމުތައް ހުށަހަޅާ ކަމުގެ ޝަކުވާތައް ވަނީ ވަރަށް ބޮޑަށް އިތުރުވެފައެވެ. އެގޮތުން، ބައެއް މީހުންނަށް ނޭނގި އެމީހުންގެ ފޯމުތައް އީސީއަށް ހުށަހަޅައި ޕާޓީތަކުގެ ދަފްތަރުގައި ޖައްސާ ކަމަށް ވެސް ގިނަ ފަރާތްތަކުން ދަނީ ބުނަމުންނެވެ. ގިނަ ފަހަރަށް މިގޮތަށް ސައްޙަ ނޫން ފޯމުތައް ހުށަހަޅަނީ ޕާޓީގައި 10،000 މެމްބަރުން ހަމަ ކުރުމަށެވެ. އެއީ ޤާނޫނުގައި ބުނާ ގޮތުގައި ދައުލަތުގެ ބަޖެޓުން ފައިސާ ދޭން ޖެހޭނީ އެ އަދަދު ހަމަވާ ޕާޓީތަކަށް ކަމަށް ވާތީއެވެ.
އީސީން މީގެ ކުރިން ވެސް ސައްޙަ ނޫން ފޯމުތައް ހުށަހެޅުމުން ޕާޓީތައް ޖޫރިމަނާ ކުރިއެވެ. އޭރު ސައްހަ ނޫން ފޯމު ހުށަހަޅާނަމަ ކޮންމެ ފޯމަކަށް 5000 ރުފިޔާގެ ޖޫރިމަނާއެއް ކުރިއެވެ، ނަމަވެސް ސިޔާސީ ޕާޓީތަކަށް އުފުލަން ޖެހޭ ބުރަ ކުޑަ ކުރުމަށް ޖޫރިމަނާ ނުކުރަން ނިންމިއެވެ.
