އެމްޑީޕީގައި ތިބި އެހެން ޕާޓީތަކުގެ މެމްބަރުން ވަކި ކުރަން ފާސްކޮށްފި
އެމްޑިޕީ ދަފްތަރުގައި 94000 މެމްބަރުން ތިބޭއިރު އީސީގައި އޮންނަ އެ ޕާޓިގެ ދަފްތަރުގައި ތިބެނީ 54599 މެމްބަރުން
އެމްޑީޕީ ޤައުމީ މަޖިލިސް ޖަލްސާ
މޯލްޑިވްސް ޑިމްޮކްރެޓިކް ޕާޓީ (އެމްޑީޕީ) ގައިތިބި މެމްބަރުންގެ ތެރެއިން އިލެކްޝަންސް ކޮމިޝަނުގެ ދަފްތަރުގައި ނެތް މެމްބަރުން ޕާޓީން ވަކިކުރަން ނިންމައިފިއެވެ.
މިގޮތަށް ނިންމާފައިވަނީ އާދީއްތަ ދުވަހުގެ ރޭ ބޭއްވި އެ ޕާޓީގެ ޤައުމީ މަޖިލިސްގެ ޖަލްސާގައެވެ. މިއީ އެމްޑީޕީގެ ޗެއާޕާސަންގެ މަގާމަށް އަލަށް އިންތިޚާބުވެވަޑައިގެންނެވި އިކޮނޮމިކް މިނިސްޓަރ، ފައްޔާޒު އިސްމާއިލް މަގާމާ ހަވާލުވެވަޑައިގެންނެވި ފަހުން ބޭއްވި ފުރަތަމަ ޖަލްސާއެވެ.
އެމްޑީޕީގެ މެމްބަޝިޕް ސާފު ކުރުމުގެ ޤަރާރު ޤައުމީ މަޖިލީހަށް ހުށަހެޅުއްވީ އެމްޑީޕީގެ މަތި އުތުރުގެ ޕްރޮވިންސްގެ ރައީސް އިބްރާހިމް ވަހީދު (އިބުރޭ) އެވެ. އެ ޤަރާރު ފާސްކޮށްފައިވަނީ ޤައުމީ މަޖިލީހުގައި ބައިވެރިވެވަޑައިގެންނެވި 90 މެމްބަރުންގެ ތެރެއިން 70 މެމްބަރުންގެ ވޯޓުންނެވެ.
މި ޤަރާރުގައި ބުނެފައިވާ ގޮތުގައި އެމްޑީޕީގެ މެމްބަރުންގެ ގޮތުގައި ބަލަމުން އަންނަ ޕާޓީގެ ދަފްތަރުގައި އެހެން ޕާޓިތަކުގެ މެމްބަރުން ތިބުމުގެ ސަބަބުން ޕާޓީގެ އިންތިޚާބުތަކާއި ޕްރައިމަރީތަކުގައި އެމްޑީޕީއާ ވާދަކުރާ ޕާޓީތަކުގެ މެމްބަރުންނަށް ވެސް ފަހިވާގޮތަށް ކެންޑިޑޭޓުން ހޮވުމުގެ ފުރުސަތު އެބައޮތް ކަމަށެވެ. އަދި ޕާޓިއަށް މާލީ އެއްވެސް މަންފާއެއް ނުކުރާ ގޮތަށް ހަމައެކަނި އިންތިޚާބުތަކުގައި ވޯޓުލާން އެތައް ހާސް ބަޔަކު ތިބި ކަމަށް ވެސް އެ ޤަރާރުގައި ވަނީ ފާހަގަކޮށްފައެވެ.
އެމްޑީޕީގެ ދަފްތަރުގައި 94،000 އަށްވުރެ ގިނަ މެމްބަރުން ތިބޭ ކަމަށް ދައްކާއިރު އިލެކްޝަންސް ކޮމިޝަނުގައި އޮންނަ އެ ޕާޓީގެ ދަފްތަރުގައި ތިބެނީ 54،599 މެމްބަރުންނެވެ. އީސީގެ ދަފްތަރުގައި ނެތް 39،911 މީހުން އެ ޕާޓީގެ އިންތިޚާބުތަކުގައި ވޯޓުލާ ކަމަށްވެއެވެ.
އިބުރޭ ހުށަހެޅި ޤަރާރުގައި ބުނެފައިވާ ގޮތުގައި އީސީގެ ދަފްތަރުގައި ނެތް 39،911 މީހުންނަށް ޕާޓިީގެ ދަފްތަރުގައި ޖެހުމަށް 3 މަސް ދުވަހުގެ މުއްދަތެއް ދެވޭނެއެވެ. އަދި އެމްޑީޕީގެ އެއްވެސް މަޤާމެއްގައި އެފަދަ މެމްބަރެއް ހުރި ނަމަ އީސީގެ ދަފްތަރުގައި ރަޖިސްޓްރީވާން އެއް މަސް ދުވަހުގެ މުއްދަތެއް ދޭން ވަނީ ނިންމާފައެވެ.
މީގެ އިތުރުން ކުރިއަށް އޮތް އެމްޑީޕީގެ ކޮންގްރެސްގައި ބައިވެރިވެވޭނީ 30 ޖޫން 2022 ގެ ނިޔަލަށް އީސީގެ އެމްޑީޕީ ދަފްތަރުގައި ހިމެނޭ މެމްބަރުންނަށް ކަމަށާއި މެމްބަރުން ހިމަނައިގެން އުފައްދާ ގޮފިތަކުގެ ރައީސުންވެސް ވާން ޖެހޭނީ އެ ދަފްތަރުގެ މެމްބަރުންނަށް ކަމަށް އެ ޤަރާރުގައި ވަނީ ބުނެފައެވެ.
