މާލެ ސިޓީ ކައުންސިލުން "ވިއަވަތި ރާއްޖެ" ކޮންފަރެންސްގައި ބައިވެރިނުވީ އެއްވެސް ކައުންސިލަރަކު ޝައުގުވެރި ނުވާތީކަމަށް އެ ކައުންސިލުން އަންގާފައިވާކަމަށް ރައީސް އޮފީހުން ބުނެފިއެވެ.

ހޮނިހިރު ދުވަހު އއ. އުކުޅަހުގައި ފެށި ކޮންފަރެންސްގައި ބ. އަތޮޅުން ފެށިގެން ފ. އަތޮޅަށް ގިނަ އަދަދެއްގެ ކައުންސިލްގެ ރައީސުންނާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސުން ބައިވެރިވެފައިވާއިރު މާލެ ސިޓީ ކައުންސިލުން ބައިވެރިނުވެއެވެ. އެކަން ނޫސްތަކުގައި ރިޕޯޓް ކުރުމުން، ޖަލްސާ ބޯއިކޮޓްނުކުރާކަމަށާއި، ޖަލްސާއަށް ނުދެވުނީ ވަގުތު ކުޑަވެފައިވަނިކޮށް ދައުވަތު ލިބުމުން ކަމަށް ޑެޕިއުޓީ މޭޔަރު އަހުމަދު ނަރީޝް ވަނީ ވިދާޅުވެފައެވެ. އޭނާ ވިދާޅުވި ގޮތުގައި ދައުވަތު ފޮނުވާފައިވަނީ 26 މެއިގައެވެ.

ނަމަވެސް ރައީސް އޮފީހުން މައުލޫމާތު ދޭގޮތުގައި މާލެ ސިޓީ ކައުންސިލަށް 21 މެއި 2022 ވަނަ ދުވަހު ވަނީ ދައުވަތު ފޮނުވާފައެވެ. އަދި އެ ދައުވަތުގެ ޖަވާބު ސިޓީ ކައުންސިލުން 23 ވަނަ ދުވަހު ރައީސް އޮފީހަށް ފޮނުވާފައިވާކަމަށް ވެސް އެ އޮފީހުން ބުނެއެވެ.

މާލެ ސިޓީ ކައުންސިލުން ރައީސް އޮފީހަށް ފޮނުވި ސިޓީގައި ބުނެފައިވަނީ، ކޮންފަރެންސްގައި ބައިވެިވުމުގެ ޝައުގުވެރިކަން އެއްވެސް ކައުންސިލަރަކު ފާޅުކޮށްފައިނުވާތީ ބައިވެރިވެވެން ނެތް ކަމަށެވެ. ނަމަވެސް އަންހެނުންގެ ތަރައްގީއަށް މަސައްކަތްކުރާ ކޮމިޓީން ބައިވެރިވާނެ ކަމަށްވެސް ވަނީ އެ ސިޓީގައި ފާހަގަކޮށްފައެވެ.

ރައީސް އޮފީހުން ސިޓީ ކައުންސިލަށް 21 މެއިގައި ފޮނުވި ސިޓީގައި ބުނެފައިވާ ގޮތުގައި، މޭޔަރަށް ކޮންފަރެންސްގައި ބައިވެރިވެވަޑައިގެންނެވެން ނެތްނަމަ ކައުންސިލް މެމްބަރަކަށް ވެސް ބައިވެރިވެވޭނެކަމަށް ވަނީ ބުނެފައެވެ.

އުކުޅަހުގައި ކުރިއަށްގެންދާ ކޮންފަރެންސްގައި ކައުންސިލްތަކުގެ ރައީސުންނާއި އަންހެނުންގެ ކޮމިޓީތަކުގެ ރައީސުން ހިމެނޭހެން 125 ބޭފުޅުން ބައިވެރިވެވަޑައިގަންނަވައެވެ.