ކުޑަގިރި ޕިކްނިކް އައިލެންޑްގައި ކަރަންޓު ވިއުގަ އެޅުމުގެ މަސައްކަތް ފަށައިފި
ޖުމްލަ 3000 މީޓަރުގެ ކޭބަލް ވަޅުލުމަށް ހަމަޖެހިފައިވޭ
ކުޑަގިރި ޕިކްނިކް އައިލެންޑްގައި ކަރަންޓު ވިއުގަ އެޅުމުގެ މަސައްކަތް ކުރިޔަށްދަނީ
ގްރޭޓަރ މާލެ ސަރަހައްދުގައި ދިރިއުޅެމުންދާ ފަރާތްތައް ދަތުރުދިއުމަށް ޚާއްސަކޮށްފައިވާ ކުޑަގިރީގައި ކަރަންޓުގެ ވިއުގަ އެޅުމުގެ މަސައްކަތް ސްޓެލްކޯއިން ފަށައިފިއެވެ.
އެކަމާގުޅޭގޮތުން ސްޓެލްކޯއިން ބުނީ، ޖުމްލަ 3000 މީޓަރުގެ ކޭބަލް ވަޅުލުމަށް ހަމަޖެހިފައިވާކަމަށެވެ. ކަރަންޓު ވިއުގަ އެޅުމާއި މަގުބައްތި ޖެހުން ކުރިޔަށްދާއިރު، އަމާޒަަކީ މިމަސައްކަތްތައް 15 ދުވަހުގެ ތެރޭގައި ނިންމާލުންކަމަށް ސްޓެލްކޯއިން ބުނެއެވެ.
ކުޑަގިރިއަކީ މާލެ ސަރަހައްދުގައި ދިރިއުޅޭ ރައްޔިތުން ޕިކްނިކް ދިއުމަށް ރަށެއް ތަރައްގީކުރައްވާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވެވަޑައިގެންނެވި ވައުދުގެ ދަށުން ތަރައްގީކުރަމުން އަންނަ ރަށެކެވެ.
ޕިކްނިކް އައިލެންޑް ހެދުމުގެ މަސައްކަތް ކުރަމުން ދަނީ އެމްޓީސީސީންނެެވެ. ޕިކްނިކް އައިލެންޑް ހެދުމަށް އެމްޓީސީސީއާއި ޕްލޭނިންގ މިނިސްޓްރީއާއެކު ސޮއިކޮށްފައިވަނީ މިދިޔަ އަހަރުގެ ސެޕްޓެމްބަރ މަހުގެ 2 ވަނަ ދުވަހުއެވެ. 5 މަސް ދުވަހުގެ ތެރޭގައި ނިންމަން ޖެހޭ އެ ޕްރޮޖެކްޓްގެ އަގަކީ 41.49 މިލިއަން ރުފިޔާއެވެ.
ކުޑަގިރިއަކީ ތިލަފުށީ ކައިރީގައި އޮންނަ ފަޅެކެވެ. މި ފަޅު އޮންނަނީ ފެރީގައި ތިރީހަކަށް މިނެޓުން އަދި ލޯންޗުގައި ދިހަވަރަކަށް މިނެޓުން ދެވޭ ހިސާބުގައެވެ. ކުޑަގިރި ތަރައްގީކުރަން ފެށުމުގެ ކުރިން ސަރުކާރުން ފުރަތަމަ ނިންމީ ކ. އެނބޫދޫފަޅުގައި ހިއްކާފައިވާ ރަށެއް ޕިކްނިކް އައިލެންޑަކަށް ހެދުމަށެވެ. އެހެންނަމަވެސް ފަހުން ސަރުކާރުގެ ނިންމުން ބަދަލުކޮށް، ކުޑަގިރީގައި ޕިކްނިކް އައިލެންޑް ހަދާގޮތަށް ނިންމިއެވެ. މާލެ ސިޓީގެ ރައްޔިތުން ހަފުތާ ބަންދުގައި އާއިލާއާއެކު ދަތުރު ދިޔުމަށް މާލެއާ ކައިރިން ރަށެއް ޚާއްސަކުރުމަކީ މިސަރުކާރުގެ ވައުދެކެވެ.
