ޚިޔާލު ފާޅުކުރުމުގެ މިނިވަންކަމާއެކު، ގައުމުގައި އުޅޭ ބިދޭސީންގެ ހައްގު ގެއްލިގެން ނުވާނެ: އދ
"އިންޑިއާ އައުޓް"އާ ދެކޮޅަށް ނެރުނު ގަރާރުގައި ހައްގުތައް ހަނިކޮށްފައިވާނަމަ އެކަން ނިންމާނީ ކޯޓުތަކުންކަމަށް ވިދާޅުވި
އދ ގެ ސްޕެޝަލް ރެޕޮޓަރ، ފިނޫލާ ނީ އައޮލެއިން
ޚިޔާލު ފާޅުކުރުމާއި އެއްވެއުޅުމުގެ މިނިވަން ކަމާއެކު އެހެނިހެން ހައްގުތައް ގެއްލިގެން ނުވާނެކަމަށާއި، ހައްގުތައް ހަނިވާނަމަ އެކަމާ ގުޅޭގޮތުން ގޮތް ނިންމާނީ އެ ގައުމެއްގެ ކޯޓަކުން ކަމަށް އދ ން ބުނެފިއެވެ.
އދ ގެ ޓެރަރިޒަމާ ދެކޮޅަށް ކުރާ މަސައްކަތުގައި އިންސާނީ ހައްގުތަކާއި އަސާސީ ހައްގުތައް ހިމާޔަތްކޮށް ކުރިއެރުވުމަށް ކަނޑައަޅާފައިވާ ސްޕެޝަލް ރެޕޮޓަރ، ފިނޫލާ ނީ އައޮލެއިން އަންގާރަ ދުވަހު ދިވެހި ނޫސްވެރިންނާ ބައްދަލު ކުރައްވައި ވިދާޅުވީ، އެއްވެސް ހައްގެއް އެހެން ހައްގަކަށްވުރެ މަތި ނުވާނެކަމަށެވެ. ހައްގުތައް ކަށަވަރުކުރުމުގައި ހަމަހަމަކަން ގެންގުޅެން ޖެހޭނެ ކަމަށާއި، އެކަން ޔަގީންކުރުމަށް ބައެއް ފަހަރު ބައެއް ހައްގުތައް ހަނިކުރެވޭނެ ކަމަށްވެސް އޭނާ ވިދާޅުވިއެވެ.
ރާއްޖޭގައި މިހާރު ކުރިއަށްދާ "އިންޑިއާ އައުޓް" ހަރަކާތާ ގުޅިގެން ރައީސުލްޖުމްހޫރިއްްޔާ އިބްރާހީމް މުހައްމަދު ސޯލިހު ނެރުއްވާފައިވާ ގަރާރާ ގުޅޭގޮތުން ނޫސްވެރިއަކު ސުވާލު ދެންނެވުމުން ނީ އައޮލެއިން ވިދާޅުވީ، އެ ގަރާރުގެ ސަބަބުން ހައްގުތައް ހަނިވާނަމަ އެކަން ނިންމާނީ ކޯޓުން ކަމަށެވެ. އަދި ކޯޓުން އެފަދަ ނިންމުންތައް ނިންމާއިރު، ބައިނަލްއަގުވާމީ ގޮތުން ބަލާ މައިގަނޑު ކަންކަމަށް ބަލަންޖެހޭނެ ކަމަށްވެސް ވިދާޅުވިއެވެ.
ވަކި ގައުމެއް ހާމަނުކޮށް ނީ އައޮލެއިން ވިދާޅުވީ، ގައުމެއްގައި ޚިޔާލު ފާޅުކުރުމުގެ ހަރަކާތްތައް ކުރިއަށްގެންދާއިރު އެ ގައުމެއްގައި ދިރިއުޅޭ އެހެން ގައުމެއްގެ މީހުންނަށް އެއިން ނޭދެވޭ އަސަރު ކުރުމަކީވެސް ހައްގެއް އުނިވުން ކަމަށާއި، ހައްގުތައް ރައްކާތެރިކުރާއިރު ހަމަހަމަކަން ގެންގުޅެންޖެހޭނެ ކަމަށެވެ.
ނީ އައޮލެއިން މިހެން ވިދާޅުވެފައިވާއިރު، "އިންޑިއާ އައުޓް" ހަރަކާތާ ދެކޮޅަށް ރައީސް ނެރުއްވި ގަރާރަކީ، އެ ހަރަކާތަކީ ގައުމީ ސަލާމަތަށް ހުރި ނުރައްކަލެއްކަމަށް ގައުމީ ސަލާމަތާ ބެހޭ މަޖިލީހުން ކަނޑައަޅާފައިވާތީއެވެ. އެ ހަރަކާތާ ގުޅުވައިގެން، ރާއްޖޭގައި ދިރިއުޅޭ އިންޑިއާގެ ރައްޔިތުންނަށް ފުރައްސާރަތަކާއި އިންޒާރުތައް ލިބެމުންދާ ކަމަށްވެސް އެ ފަރާތްތަކުން ބުނެއެވެ.
އިންޑިއާ އައުޓް ހަރަކާތް ހުއްޓުވުމަށް ރައީސް ނެރުއްވި ގަރާރަކީ، އިންސާނީ ހައްގުތަކުގެ ތެރޭގައި ހިމެނޭ ޚުޔާލު ފާޅުކުރުމުގެ މިނިވަންކަން ހަނިކުރުމުގެ އަމަލެއްކަމަށް ބުނެ އިދިކޮޅު ކޯލިޝަނުން ވަނީ އެ މައްސަލަ ސިވިލް ކޯޓަށް ހުށަހަޅާފައެވެ. އަދި އެ ހަރަކާތްތައް ހުއްޓާނުލާނެކަމަށް ވެސް އިދިކޮޅު ފަރާތްތަކުން ދަނީ ބުނަމުންނެވެ.
