މިއަހަރުގެ ޔުއެފާ ޗެމްޕިއަންސް ލީގުގެ ފައިނަލްގެ ކުރިން ލިވަޕޫލާއި އެ ޓީމުގެ މުޙައްމަދު ޞަލާޙަށް ރެއާލް މެޑްރިޑްގެ ކެޕްޓަން ކަރީމް ބެންޒެމާ ރައްދެއް ދީފިއެވެ.
މީގެ ކުރިން ޞަލާޙު ބުނީ ފައިނަލްގައި އޭނާ ކުޅެން ބޭނުން ވަނީ ރެއާލާ ދެކޮޅަށް ކަމަށެވެ. އަދި 2018 ވަނަ އަހަރުގެ ފައިނަލްގައި ރެއާލް އަތުން ބަލިވި ބަލިވުމަކީ އެޓީމުގެ އެންމެންމަށް ވަރަށް ބޮޑު ހިތް ދަތިކަމެއް ލިބުނު ކަމެއް ކަމަށް ޞަލާޙު ބުންޏެވެ. އަދި އޭނާ ބުނީ މިއީ ބަދަލު ހިފުމުގެ ފަހަރަކަށް ވާނެ ކަމަށެވެ. މީގެ އިތުރުން އޭނާ ބުނީ ފައިނަލް ވާނީ ޓަފް މެޗަކަށް ކަމަށާއި، ރެއާލުން ވަރަށް ބޮޑެތި ޓީމުތައް ބަލިކޮށްފިކަމަށެވެ. އެހެންކަމުން އެމީހުންގެ ހުރިހާ ފޯކަސްއެއް ބަހައްޓަން ޖެހޭނީ މެޗަށް ކަމަށެވެ.
މީގެ އިތުރުން މިއަހަރުގެ ޕްރިމިއަރ ލީގުގެ ރަން ބޫޓު ހޯދުަމަށްފަހު ވެސް ޞަލާޙު ވަނީ ރައްދެއް ދީފައެވެ. ރަން ބޫޓާއެކު ނަގާފައިވާ ފޮޓޯއެއް އާންމުކޮށް އޭނާ ބުނީ "ވީ އާރ ނޮޓް ޑަން ޔެޓް" ކަމަށެވެ. މިއީ ވެސް ފައިނަލްގެ ކުރިން އޭނާ ރެއާލަށް އަމާޒުކޮށް ބުނި ބަހެކެވެ.
މިކަމާ ގުޅިގެން ބެންޒެމާ ބުނީ ޞަލާޙު އޯވާކޮންފިޑެންޓުވެ ހުރެ ވާހަކަ ދެއްކިޔަސް އެކަމުން އޭނާއަށް އެއްވެސް ވަރަކަށް އުނދަގޫ ނުވާކަމަށެވެ. ބެންޒީމާ ބުނީ ލިވަޕޫލަށް ބޮޑު ކޮންފިޑެންސެއް އޮތް ކަމަށެވެ. އަދި އޭނާ ބުނީ ފަހަރުގައި ލިވަޕޫލަށް ހީވާ ގޮތުގައި މިހާރު އެމީހުން ފައިނަލުން މޮޅުވެއްޖެ ކަމަށެވެ. އަދި އެމީހުންނަށް ހީވާ ގޮތުގައި މިއީ ކުރީގެ ރެއާލަށް ނުވެދާނެކަމަށެވެ. އެހެންވީމާ އެމީހުންނަކީ ފޭވަރައިޓުންގެ ގޮތުގައި ދެކެނީ ކަމަށެވެ. މީގެ އިތުރުން ޞަލާޙުއަށް އޭނާ ބުނަން ބޭނުންވާ ކޮންމެ ވާހަކެއް ވެސް ބުނެވިދާނެ ކަމަށް ބެންޒެމާ ބުންޏެވެ.
މި ދެޓީމު ވަނީ 2018 ވަނަ އަހަރުގެ ފައިނަލްގައި ވާދަކޮށްފައެވެ. އެފަހަރުގެ ފައިނަލްގައި ރެއާލް މޮޅުވީ 1-3 ންނެވެ. މިފަހަރު މި ދެޓީމު ވާދަކުރާ ފައިނަލް އޮތީ މި މަހުގެ 29 ގައެވެ.
