ޓެކްސީތަކުން ބޭނުން އަގެއް ނަގަން އާއްމުން މިހާރު "އޯކޭ" ވީ؟

މާލެ ސަރަހައްދުގައި ދުއްވާ ޓެކްސީތަކަށް ދަތުރުތަކުން ނެގޭނެ އަގުތަކެއް ޓްރާންސްޕޯޓް މިނިސްޓްރީން ވަނީ ކަނޑައަޅައިފައެވެ. ޑްރައިވަރުންނަށް މިނިސްޓްރީން ކަނޑައަޅައިފައި އޮންނަ ވަރަށް ވުރެ އެންމެ ރުފިޔާއެއްވެސް އިތުރަށް ނުނެގޭނެއެވެ. ޓެކްސީތަކުން އަމިއްލަ އަގުތަކެއް ކަނޑައަޅައި އެ އަގުތައް ނަގާނަމަ އެ ކުރެވެނީ ގަވާއިދާ ޚިލާފު ކަމެކެވެ. މިގޮތަށް ގަވާއިދާ ޚިލާފުވާ އެތައް ޓެކްސީއެއް މިއަދު މާލެ މަގުމަތީގައި އެބަ ދުއްވައެވެ.

ހުޅުމާޅެ ދެވަނަ ފިޔަވަހީގައި މީހުން ދިރިއުޅެން ފެށި ފަހުން ޓެކްސީ އަގު ބޮޑު ވާހަކަ އަބަދުވެސް އިވެއެވެ. އޭރު ސަރުކާރުން ވަކި އަގެއް ކަނޑައަޅައިފައި ނެތުމުން ބައެއް ޓެކްސީތަކުން ދަތުރަކަށް 150 ރުފިޔާ ވެސް ނެގިއެވެ. މިކަންކަން ބޮޑުވެ ޓްރާންސްޕޯޓް މިނިސްޓްރީން ވަނީ މާލެއާއި ދެވަނަ ފިޔަވައްސާ ދެމެދު ދަތުރުތަކަށް ނެގޭނީ 90 ރުފިޔާ ކަމަށް ކަނޑައަޅައިފައެވެ. ނަމަވެސް އަދިވެސް ބައެއް ޓެކްސީތަކުން މި ނިންމުމަށް އަމަލެއް ނުކުރެއެވެ. ނަގާނެ ވަރު އެނގޭނީ ޓެކްސީތަކަށް ކަމަށްބުނެ ހިތަށް އެރި އަގެއް ދަނީ ނަގަމުންނެވެ.

މާލެއާއި އެއާޕޯޓާ ދެމެދު ޓްރާންސްޕޯޓް މިނިސްޓްރީން ކަނޑައަޅާފައިވާ އަގަކީ ދަތުރަކަށް 60 ރުފިޔާއެވެ. ނަމަވެސް މާލެ އާއި އެއާޕޯޓާ ދެމެދު ދަތުރު ކުރާ ގިނަ މީހުން ޓެކްސީ ދަތުރަށް 75 ރުފިޔާ އަދިވެސް ދައްކައެވެ.

ރާއްޖޭގައި ޓެކްސީ އެޕްތައް ވެސް ގިނައެވެ. އެ އެޕްތަކުން ޓެކްސީތައް ދަތުރު ކޮށްދޭނެ އަގުތައް ދަތުރަށް އެދޭއިރު ހާމަ ކުރެއެވެ. އެއީ ރައްކާތެރި ގޮތެއް ކަމަށް ބަލައި ގިނަ ބަޔަކު މިހާރު ޓެކްސީތައް ނަގަނީ މި އެޕްތައް މެދުވެރިކޮށެވެ. ނަމަވެސް އެޕްތަކުން ނަގާ ޓެކްސީތަކުން ވެސް ގިނަފަހަރު ނަގަނީ ބޮޑު އަގެވެ. އެޕްތަކުން ނަގާ ޓެކްސީތަކުން މިކަން ކުރަނީ އެ ޓެކްސީ ރަޖިސްޓްރީކޮށްފައި ހުންނަ ސެންޓަރަށް ވެސް އޮޅުވާލައިގެންނެވެ.

ޓެކްސީތަކުގެ އަގުތައް ބޮޑުވުމުގައި މިއަދު ހަމައެކަނި ޓެކްސީ ޑްރައިވަރުންވެސް ކުށްވެރި ނުކުރެވޭނެއެވެ. އެއީ އެ މީހުންނަށް އެ އަގުތަކުގައި ދަތުރު ކުރެވެނީ އާއްމުންގެ ތެރެއިންވެސް ގިނަ ބަޔަކު އެކަމަށް "އޯކޭ" ވާތީއެވެ. އެ ބުނާ އަގެއް އެ މީހުންނަށް ދޭތީއެވެ.

ބޮޑު އަގު ނަގާ ޓެކްސީތައް ރިޕޯޓް ކުރަން ޓްރާންސްޕޯޓް މިނިސްޓްރީ އާއި ޓެކްސީ ސެންޓަރުތަކުން ވެސް ވަނީ އަންގާފައެވެ. ނަމަވެސް އެކަން ކުރެވެނީ ވަރަށް މަދު ބަޔަކަށެވެ. ގިނަ މީހުން އެއީ މާބޮޑު ކަމެއް ކަމުގައި ނުދެކި ދޫކޮށްލަނީއެވެ. މީގެ ސަބަބުން ޓެކްސީތަކަށް އެ ލިބެނީ އަގުތައް ބޮޑު ކުރަން އިތުރު ބާރެކެވެ.

ޓެކްސީތަކަށް ބޮޑު އަގު ނެގެނީ އާއްމުން އެކަމަށް ފުރުސަތު ދޭތީއޭ ވެސް ބުނެވިދާނެއެވެ. އެއީ ރިޕޯޓް ކުރަން އުސޫލުތަކެއް ކަނޑައަޅައި އެ މައްސަލަތައް ބަލަން ކޮމިޓީތައް އެކުލަވާލައިފައިވާއިރު ގިނަ ބަޔަކު އެކަމަށް ހިތްވަރުދީ ޓެކްސީތަކުން ބޭނުން އަގެއް އެއްވެސް ޝަކުވާއެއް ނެތި ދޭތީއެވެ. ޓްރާންސްޕޯޓް މިނިސްޓަރު އައިޝަތު ނަހުލާ ރައްޔިތުންގެ މަޖިލީހުގައި ވިދާޅުވި ގޮތުގައި ބޮޑު އަގުގައި ޓެކްސީ ކުރާ ފަރާތްތަކުގެ ޝަކުވާ ހުށަހެޅުމަށް އޮންނަ އުސޫލުގެ ތެރެއިން މިހާތަނަށް އެ މިނިސްޓްރީއަށް ހުށަހަޅައިފައި ވަނީ އެންމެ 57 މައްސަލައެވެ. މިއީ އާއްމުންގެ ތެރޭގައި އެ ވާހަކަތައް ދެކެވޭ ވަރަށް ބަލައި ވަރަށް ކުޑަ އިންސައްތައެކެވެ.

ޓެކްސީތަކުން އެދޭ އަގުތައް ދިނުމަކީ ކުރިއަށް އޮތްތާންގައި އެ އަގުތައް އިތުރަށް ބޮޑުކުރަން ޑްރައިވަރުންނަށް ދެވޭ ހިތްވަރެކެވެ. އަތްނުފޯރާފަށަށް އަގު އެރުމުން އަނެއްކާވެސް ގޯސް ކުރާނީ ސަރުކާރާއި މިނިސްޓްރީއެވެ. ފަރުދީ ޒިންމާއެއް އޮތް ކަން ވެސް ހަނދާނުގައި ނުހުންނާނެއެވެ. ނަމަވެސް ކޮންމެ ފަރުދެއްގެވެސް މިކަމުގައި ޒިންމާއެއް އޮތްކަން ހަނދާން ކުރަން ޖެހޭނެއެވެ. މިއަދު ރިޕޯޓްކޮށް މައްސަލަތައް ހައްލު ނުކޮށްފިނަމަ ތިބެން ޖެހޭނީ މާދަމާ މިއަށްވުރެ ވެސް އަގުބޮޑުވާނެކަން ހަނދާނުގައި ބަހައްޓައިގެންނެވެ.