އެހެނިހެން އަހަރުތަކާ އެއްގޮތަށް މިއަހަރު ވެސް ޙައްޖަށް ދިއުމަށް ޖާގަ ދޫކުރާނީ ކިޔޫގައި ތިބި ތަރުތީބުން ކަމަށް ޙައްޖު ކޯޕަރޭޝަނުން ބުނެފިއެވެ.

އެ ކޯޕަރޭޝަނުން ވަނީ މިއަހަރު ޙައްޖަށް ދާން ފުރުސަތު ދިނުމުގައި އަމަލު ކުރާނެ ގޮތުގެ އުސޫލު އަންގާރަ ދުވަހު ނެރެފައެވެ. އެ އުސޫލުގައި ބުނެފައިވާ ގޮތުގައި މިއަހަރު ޙައްޖަށް ދާން ޖާގަ ދޫކުރާނީ ލިސްޓުގައި ތިބި މީހުންގެ ތެރެއިން އުމުރުން 65 އަހަރުން ދަށުގެ މީހުންނަށް ލިސްޓުގެ ތަރުތީބުން ކަމަށެވެ.

ޙައްޖަށް މީހުން ފޮނުވަން ޖާގަ ދޭއިރު 65 އަހަރުން ދަށުގެ މީހުންނަށް ޖާގަ ދިނުމަކީ ސައުދީ އަރަބިއްޔާގެ ނިންމުމެކެވެ. އެއީ ކޮވިޑާ ގުޅިގެން ރައްކާތެރިކަމުގެ ފިޔަވަޅު އެޅުމުގެ ގޮތުން އެ ޤައުމުން ނިންމި ނިންމުމެކެވެ.

މީގެ އިތުރުން މިއަހަރު ޙައްޖަށް ދެވޭނީ ވެކްސިން ފުރިހަމަ ކޮށްފައިވާ ފަރާތްތަކަށް އެކަނި ކަމަށް ވެސް ވަނީ ނިންމާފައެވެ. އަދި ސައުދީއަށް ދިއުމުގެ 72 ގަޑިއިރު ކުރިން ހަދާފައިވާ ޕީސީއާރު ނެގެޓިވް ޓެސްޓެއް ވެސް ހުށަހަޅަން ޖެހޭނެއެވެ.

އެ ޤައުމުން މިއަހަރު ޙައްޖަށް ދާން އެއް މިލިއަން ކޯޓާ ދޫކޮށްފައިވާއިރު ރާއްޖެއަށް ދީފައިވަނ 453 ކޯޓާއެވެ. އެ ހުރިހާ ކޯޓާއެއް ވެސް ސަރުކާރުން ދީފައިވަނީ ހައްޖު ކޯޕަރޭޝަނަށެވެ.

އިސްލާމިކް މިނިސްޓްރީން ބުނި ގޮތުގައި ހުރިހާ ކޯޓާއެއް ޙައްޖު ކޯޕަރޭޝަނަށް ދޭން ނިންމީ އަމިއްލަ ޖަމާއަތްތަކަށް ހުޅުވާލައިގެން، ޕްރޮޕޯސަލް ހުށަހަޅައި އިވެލުއޭޓް ކުރަން އެކަށީގެންވާ މުއްދަތެއް ނެތުމުން ކަމަށެވެ. އެގޮތުން 453 ކޮޓާގެ ތެރެއިން 353 ކޯޓާ ދޫކުރާނީ މިހާރު ކިޔޫގައި ތިބި ފަރާތްތަކަށް ކަމަށާއި 100 ކޯޓާ އާއްމުނަށް އެ ކޯޕަރޭޝަނުން ހުޅުވާލާނެ ކަމަށް ވަނީ ބުނެފައެވެ. އާއްމުންނަށް ހުޅުވާލާ ކޯޓާއަށް މިހާރު ޙައްޖު ކޯޕަރޭޝަނުގެ ކިޔޫގައި ތިބި ފަރާތްތަކަށް ވެސް ކުރިމަތިލެވޭނެއެވެ.

ރާއްޖެއަށް މިއަހަރު އަދި އިތުރު ކޯޓާ ހޯދުމުގެ މަސައްކަތް ސަރުކާރުން ކުރަމުން އަންނަ ކަމަށް އިސްލާމިކް މިނިސްޓްރީން މައުލޫމާތު ދެއެވެ.