ކައުންސިލްތަކާއި އަންހެނުންގެ ތަރައްޤީއަށް މަސައްކަތް ކުރާ ކޮމެޓީތަކުގެ ދެމެދުގައި މައްސަލަތައް ގިނަ ކަމަށް ޖެންޑަރ މިނިސްޓްރީގެ ސްޓޭޓް މިނިސްޓަރ ޒިފްލީނާ ހަސަން ވިދާޅުވެއްޖެއެވެ.

އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބަށް ދިމާވާ ދަތިތަކާ ގުޅޭގޮތުންނާއި އެކޮމިޓީގެ މެންޑޭޓާ ގުޅޭގޮތުން، ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ކަމާބެހޭ މުއައްސަސާތަކާ ބައްދަލުކުރުމަށް ބޭއްވި ބައްދަލުވުމުގައި ހޯމަ ދުވަހު ވާހަކަ ދައްކަވަމުން ޒިފްލީނާ ވިދާޅުވީ ޑަބްލިޔުޑީސީ އާއި ކައުންސިލްތަކުގެ މެންޑޭޓް އެއްގޮތްވުމުން އޮޅުން އަރާ ގޮތްވާ ކަމަށް ޑަބްލިޔުޑީސީ އިން މައުލޫމާތު ދީފައިވާ ކަމަށެވެ.

މީގެ އިތުރުން ކައުންސިލްތަކުން ޑަބްލިޔުޑީސީތަކަށް އެއްބާރުލުން ނުދިނުމާއި ޑަބްލިޔުޑީސީގެ ބަޖެޓަކީ ކައުންސިލުން ދޭ އެއްޗެއް ކަމަށް ބުނެ، ކައުންސިލުން ބޭނުންވާ ގޮތަށް ކޮމެޓީ ހިންގަން ޖެހޭ ކަމަށް ކައުންސިލުން ދޭކަމަށް ބުނެ ޝަކުވާތައް ވެސް ލިބިފައިވާ ކަމަށެވެ.

ޑަބްލިޔުޑީސީގެ އަހަރީ ޕްލޭން ކައުންސިލަށް ހުށަހެޅި ނަމަވެސް ޑަބްލިޔުޑީސީގެ މަސައްކަތް ކައުންސިލަށް ނޭނގޭ ކަމަށް ބުނާ ކަމަށް ވެސް ޒިފްލީނާ ވިދާޅުވިއެވެ. ޑަބްލިޔުޑީސީ އިން ކުރާ ކޮންމެ ކަމަކަށް ކައުންސިލްގެ ހުއްދަ ހޯދަން ޖެހޭ ކަމަށް ކައުންސިލުން ބުނުމާއި ކޮންމެ ކަމެއްގައި ކައުންސިލްގެ ނަން ހިމަނަންޖެހޭ ކަމަށް ބުނާ ކަމަށް ވެސް ޒިފްލީނާ ވިދާޅުވިއެވެ.

ޒިފްލީނާ އިތުރަށް ވިދާޅުވީ ދިރާސާއެއް ހަދައިފިނަމަ މިއަށްވުރެ ގިނަކަންތައްތައް ފާހަގަވެގެންދާނެ ކަމަށާއި މިކަންތައްތައް ހައްލު ކުރަންޖެހޭ ކަމަށެވެ.

މި ކޮމިޓީގައި ވާހަކަ ދައްކަވަމުން ކޮމިޓީގެ މުގައްރިރު ރޮޒެއިނާ އާދަމް ވިދާޅުވީ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ރައީސް ވަކިކުރާނެ ހަރުދަނާ އުސޫލެއް އޮންނަންޖެހޭ ކަމަށެވެ.

ރޮޒެއިނާ ވިދާޅުވީ، ޑަބްލިޔުޑީސީގެ ރައީސް ވަކިކުރާނެ ގޮތް ގާނޫނުގައި ނެތްކަމަށެވެ. އަދި އެ މަގާމުން ވަކިވާއިރު 1 މަސް ދުވަހުގެ ނޯޓިސް ދޭންޖެހޭ ކަމަށާއި، އެގޮތަށް އޮންނަންޖެހޭކަމަށް ގަބޫލުނުކުރައްވާ ކަމަށްވެސް ވިދާޅުވިއެވެ.

ޑަބްލިޔުޑީސީއަކީ ކައުންސިލްތަކާ ގުޅިގެން މަސައްކަތްކުރަންޖެހޭ ބައެއް ކަމަށާއި، އެގޮތަށް ޕްރޮމޯޓް ކުރުން މުހިންމު ކަމަށްވެސް ރޮޒެއިނާ ވިދާޅުވިއެވެ.