ފަބިއޯ ކަވާލިއޯ ލިވަޕޫލަށް
23 މެއި 2022 | ހޯމަ 13:11ކަވާލިއޯ މި ސީޒަންގައި 10 ލަނޑު ޖަހައި، 8 ލަނޑު ޖެހުމަށް އެހީތެރިވެދިން
ފުލަމްއަށް ކުޅެމުން އަންނަ ފަބިއޯ ކަވާލިއޯ
މި ސީޒަންގައި ފުލަމްއަށް ކުޅުނު ފަބިއޯ ކަވާލިއޯ މިއަންނަ ސީޒަންގައި ލިވަޕޫލަށް ބަދަލުވާން ނިންމައިފިއެވެ.
މި ސީޒަންގައި ފުލަމް ޕްރިމިއަރ ލީގަށް ޕްރޮމޯޓް ކޮށްދިނުމުގައި އިސް ދައުރެއް އަދާކުރި ކަވާލިއޯ މި ސީޒަންގައި 10 ލަނޑު ޖަހައި، 8 ލަނޑު ޖެހުމަށް އެހީތެރިވެދިނެވެ. މި ސީޒަންގައި އޭނާ 38 މެޗު ފުލަމްއަށް ކުޅެދިނެވެ.
އުމުރުން 19 އަހަރުގެ ފޯވާޑް މިހާތަނަށް ޕްރިމިއަރ ލީގުގައި ހަތަރު މެޗު ކުޅެފައިވާއިރު، 2020/21 ސީޒަންގައި އޭނާގެ ފުރަތަމަ ލަނޑު ޖެހީ ސައުތެމްޕްޓަން ކޮޅަށެވެ. މިއަހަރުގެ މާޗް މަހުގައި އޭނާ ވަނީ ޕޯޗުގަލްގެ 21 އަހަރުން ދަށުގެ ޓީމަށް ފުރަތަމަ ފަހަރަށް ކުޅެފައެވެ.
ލިވަޕޫލާއެކު ކަވާލިއޯ ހެދީ ފަސް އަހަރުގެ އެއްބަސްވުމެކެވެ. މިއަންނަ ޖުލައި އެއްވަނަ ދުވަހު އޭނާ ލިވަޕޫލާ ގުޅޭނެއެވެ. ކަވާލިއޯ ހޯދުމަށްޓަކައި ލިވަޕޫލުން 5 މިލިއަން ޕައުންޑް ހޭދަކުރާނެއެވެ. އަދި އެޑް އޮންސްގެ ގޮތުގައި 2.7 މިލިއަން ޕައުންޑް ލިވަޕޫލުން ފުލަމްއަށް ދޭންޖެހޭނެއެވެ.
