ބާސާ ބަލިކޮށް ލިޔޯން، އަންހެން ޗެމްޕިއަންސް ލީގު ކާމިޔާބުކޮށްފި
ބާސެލޯނާއަށް މިހާތަނަށް މި މުބާރާތް ކާމިޔާބުކުރެވުނީ އެންމެ ފަހަރަކު
ޔުއެފާ ވިމެންސް ޗެމްޕިއަންސް ލީގުގެ ޗެމްޕިއަން ލިޔޯން
ބާސެލޯނާ ބަލިކޮށް، ޗެމްޕިއަންސް ލީގު އަންހެން ޑިވިޝަންގެ ޗެމްޕިއަންކަން ލިޔޯންއިން ކާމިޔާބުކޮށްފިއެވެ.
ލިޔޯން މުބާރާތް ކާމިޔާބުކުރީ ފައިނަލް މެޗުގައި 3-1ން ބާސެލޯނާ ބަލިކޮށްގެންނެވެ. މިއީ ލިޔޯންއިން މި މުބާރާތް ކާމިޔާބުކުރި އަށްވަނަ ފަހަރެވެ.
މެޗުގެ ހުރިހާ ލަނޑެއްވެސް ފެނުނީ ފުރަތަމަ ހާފުގައެވެ. ފުރަތަމަ ހާފުގެ ފަސްވަނަ މިނެޓުގައި ލިޔޯންއަށް ލީޑު ނަގައިދިނީ އަމަންޑިން އޮންރީއެވެ. ލިޔޯންގެ ދެވަނަ ލަނޑު 23 ވަނަ މިނެޓުގައި ކާމިޔާބުކޮށްދިނީ އަޑާ ހެގޭބާގްއެވެ. އޭގެ 10 މިނެޓުފަހުން ލިޔޯންގެ ފަހު ލަނޑު ޖަހައިދިނީ ކަތެރީނާ މަކާރިއޯއެވެ.
ބާސެލޯނާގެ ހަމައެކަނި ލަނޑު 41 ވަނަ މިނެޓުގައި ކާމިޔާބުކޮށްދިނީ އަލެކްސިއާ ޕުޓޭޔާސްއެވެ. ބާސެލޯނާއަށް މިހާތަނަށް މި މުބާރާތް ކާމިޔާބުކުރެވުނީ އެންމެ ފަހަރަކުއެވެ.
