މަންކީ ޕޮކްސްގެ ކޭސްތައް ފެނުނު ޤައުމުތަކުގެ ތެރޭގައި ދުބާއީވެސް

މަންކީ ޕޮކްސް ކިޔާ ބަލީގެ ކޭސްތައް ފެނުނު ޤައުމުތަކުގެ ތެރޭގައި ދުބާއީ ވެސް ހިމެނިއްޖެއެވެ.

ދުބާއީގެ ހެލްތު އޮތޯރިޓީން ނެރުނު ސަކިއުލަރއެއްގައި ބުނެފައިވަނީ މަންކީ ޕޮކްސްގެ ކޭސްތަކަށް ޚާއްސަ ސަމާލުކަމެއް ދީގެން ބަލަހައްޓަމުންދާ ކަމަށެވެ. އަދި އެމީހުންގެ ފުށުން އެހެން މީހުންނަށް ބަލި އެރުން ހުއްޓުވުމަށްޓަކައި ގިނަ މަސައްކަތްތައް ކުރަމުންދާ ކަމަށެވެ.

މަންކީ ޕޮކްސް އެންމެ ގިނައިން ފެނިފައިވަނީ މެދުތެރެއާ ހުޅަނގު އެފްރިކާގެ ސަރަހައްދުތަކުންނެވެ. މަންކީ ޕޮކްސް އަކީ އިންސާނުންގެ ހަށިގަނޑުން މީގެކުރިން ފެނިފައިވާ ސްމޯލް ޕޮކްސްއާ އެއްގޮތްކަމެއް ހުންނަ ވައިރަލް އިންފެކްޝަންއެކެވެ. އެންމެ ފުރަތަމަ މަންކީ ޕޮކްސްގެ ކޭހެއް ރިކޯޑްކުރެވިފައިވަނީ 1970ގެ އަހަރުތަކުގެ ތެރޭގައި ޑިމޮކްރަޓިކް ރިޕަބްލިކް އޮފް ކޮންގޯއިންނެވެ. ފާއިތުވި 10 އަހަރުތެރޭގައި ހުޅަނގު އެފްރިކާގެ ގައުމުތަކުން މަންކީ ޕޮކްސްގެ ކޭސްތައް ފެންނަ މިންވަރު ވަނީ އިތުރުވެފައެވެ.

މިވައިރަސްގެ އަލާމާތްތަކުގެ ތެރޭގައި ހިމެނެނީ ހުން އައުމާއި، ބޮލުގެ ރިއްސުމާއި ހަންގަނޑުން ބިހިތަކެއް ނެގުމެވެ. ބިހިތައް އެންމެ ފުރަތަމަ ނަގަން ފަށާނީ މޫނުގައެވެ. އެއަށްފަހު ހަށިގަނޑުގެ އެހެން ހިސާބުތަކަށް ފެތުރިގެންދެއެވެ.

އެންމެ ފަސޭހައިން އިންސާނެއްގެ ފުށުން އިންސާނަކަށް ބަލި އަރާނީ، ބަލީގެ ސަބަބުން ނަގާފައި ހުންނަ ފޮޅު އަދި ކުރަމަގާލި ލާފަހުންނަ ތަންތަނުގައި ޖެހުމުންނެވެ. އަދި ބަލި ޖެހިފައިވާ މީހަކު ކެއްސައި ކިނބިހި އެޅުމުގެ ތެރެއިންވެސް ފެތުރުމުގެ ފުރުސަތު އޮވެއެވެ. މީގެ އިތުރުން ބަލި ޖެހިފައިވާ މީހެއްގެ އަންނައުނު، ބެޑުޝީޓު، ރަޖާ، ތުވާލި ފަދަ އެއްޗެތިން ބަލި އެރުމުގެ ފުރުސަތު އޮންނަކަމަށްވެއެވެ.

ސިއްހީ މާހިރުން ވިދާޅުވާގޮތުގައި މަންކީ ޕޮކްސް ޖެހިފައިވާ ޖަނަވާރެއްގެ މަސް ރަނގަޅަށް ނުކައްކައި ކައިފިނަމަވެސް ބަލި ޖެހޭނެއެވެ. އަދި ބަލިޖެހިފައިވާ ޖަނަވާރެއްގެ ހަން ނުވަތަ ކެހެރިގަނޑުގައި އަތްލާ ހެދުމުންވެސް ބަލި އަރައެވެ.

މަންކީޕޮކްސް ގެ ކޭސްތައް މިހާތަނަށް 10 ގައުމަކުން ފެނިފައިވެއެވެ. މިގައުމު ތަކުގައި ބަލީގެ 107 ކޮންފަރމް ކޭސް އެބަތިއްބެވެ. ބަލި އުޅޭކަން ފާހަގަ ވެފައިވާ ގަމުތަކުގެތެރޭގައި އިގިރޭސި ވިލާތް 9 ކޭސް، ޕޯޗުގަލް 34ކޭސް، ސްޕެއިން 32ކޭސް ، ފްރާންސް 1 ކޭސް، ބެލްޖިއަމް 2 ކޭސް، ސްވީޑްން 1 ކޭސް. އިޓަލީ 3ކޭސް، ކެނެޑާ 22 ކޭސް، އެމެރިކާ2ކޭސް ، އަދި އޮސްޓްރޭލިޔާ 1 ކޭސް އެވެ. ނަމަވެސް ބަލިޖެހިފައިވާ މީހުންގެ އަދަދު ތައް އެކިފަރާތް ތަކުން ދޭލެއް ތަފާތެވެ.

ދުބާއީގަ މިބަލިޖެހިފައިވާ މީހުން ތިބި އަބަދެއް އަދި ސާފެއް ނުވެއެވެ.