އެމްއެންޔޫގެ އޮގަސްޓް އިންޓޭކްގެ ކޯސްތަކަށް ހުޅުވާލައިފި
ފޯމްތައް ބަލައިގަތުމަށް ހަމަޖެހިފައިވަނީ މެއި 29ން ޖުލައި 28ށް
ޤައުމީ ޔުނިވަރސިޓީ
ޤައުމީ ޔުނިވަރސިޓީގެ އޮގަސްޓް 2022 ގެ އިންޓޭކްގެ ކޯސްތަކަށް ހުޅުވާލައިފިއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ޔުނިވަރސިޓީގެ ޑެޕިއުޓީ ވައިސް ޗާންސެލަރ އައިޝަތު ޝާހީން ވިދާޅުވީ މިފަހަރު 89 ކޯހަކުން 5،615 ޖާގައަށް ހުޅުވާލާފައިވާ ކަމަށެވެ. އަދި ޕީއެޗްޑީ ނޫން ހުރިހާ ލެވަލެއްގެ ކޯސްތައް ހިމެނޭ ކަމަށް ވެސް ޝާހީން ވިދާޅުވިއެވެ.
ޕޯސްޓް ގްރެޖުއޭޓް ޑިޕްލޮމާ އިން ހަޔަރ އެޑިއުކޭޝަން ކޯސް މިފަހަރަށް އަލަށް ފަށާކަން ފާހަގަކުރައްވާ ޝާހީން ވިދާޅުވީ މި ކޯސް ޚާއްސަކޮށްފައިވަނީ އެމްއެންޔޫގެ ސްޓާފުންނަށް ކަމަށެވެ. އެހެންނަމަވެސް އާންމުންނަށް ވެސް މި ކޯހަށް ކުރިމަތިލެވޭނެ ކަމަށް ވިދާޅުވިއެވެ. އޮކިއުޕޭޝަނަލް ހެލްތް އެންޑް ސޭފްޓީ ކޯހުގެ ޑިގްރީ ޕްރޮގްރާމް ވެސް މިފަހަރުގެ އިންޓޭކްގައި އަލަށް ތައާރަފު ކުރުމަށް ޔުނިވަރސިޓީން ވަނީ ނިންމާފައެވެ.
މި ނޫސްވެރިންގެ ބައްދަލުވުމުގައި ވާހަކަދައްކަވަމުން ޔުނިވަރސިޓީގެ ރެޖިސްޓްރަރ މުހައްމަދު ލާމިރް ވިދާޅުވީ މާލެސިޓީގެ އިތުރުން އަތޮޅު ތެރޭގައި ކެމްޕަސްތަކުގައި ވެސް މި ކޯސްތައް ފަށާނެ ކަމަށެވެ. ފޯމްތައް ބަލައިގަތުމަށް ހަމަޖެހިފައިވަނީ މެއި 29ން ޖުލައި 28އާ ހަމައަށެވެ. އަދި ދެވަނަ ޓާމުގެ ކޯސްތައް ފެށުމަށް ނިންމާފައިވަނީ އޮގަސްޓް 14 ވަނަ ދުވަހުއެވެ.
އެހެން އަހަރުތަކާއި ޚިލާފަށް ބައެއް ކޯސްތަކަށް ނަގާނީ މެރިޓް އުސޫލުންކަން ފާހަގަކުރައްވާ ލާމިރް ވިދާޅުވީ ޚާއްސަކޮށް ނާސިންގގެ ކޯސްތައް ނަގަނީ މެރިޓް އުސޫލުން ކަމަށެވެ.
ޔުނިވަރސިޓީގެ އެޑްމިޝަން ޕޯޓަލް މެދުވެރިކޮށް ކޯސްތަކަށް އެޕްލައި ކުރެވޭއިރު ހާޑް ކޮޕީ އެޕްލިކޭޝަންތައް ވެސް ބަލައިގަތުމަށް ވަނީ ނިންމާފައެވެ.
ސެޓްފިކެޓް އެޓެސްޓް ނުކޮށްވެސް އެޕްލިކޭޝަން ބަލައިގަންނާނެކަމަށް ޔުނިވަރސިޓީން ބުނެއެވެ.
