އިންޑިއާ އައުޓް ހަރަކާތާއި ގުޅިގެން ކުރީގެ މެމްބަރު މުހައްމަދު އިސްމާއިލް ހައްޔަރުކޮށްފި
އިންޑިއާ އައުޓް ހަރަކާތާއި ގުޅިގެން ދެ މީހުން ހައްޔަރު ކުރި
ކުރީގެ މެމްބަރު މުހައްމަދު އިސްމާއިލް
ރައީސުލްޖުމްހޫރިއްޔާގެ ގަރާރަށް ގޮންޖަހައި "އިންޑިއާ އައުޓް" ހަރަކާތް ހިންގާތީ ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުޙައްމަދު އިސްމާއިލް ހައްޔަރުކޮށްފިއެވެ.
އެ ހަރަކާތާ ގުޅިގެން ބުދަ ދުވަހު ދިވެހި ދެ ފިރިހެނަކު ހައްޔަރުކޮށްފައިވާ ކަމަށް ފުލުހުން މައުލޫމާތުދެއެވެ. އެ ދެމީހުން ހައްޔަރު ކުރީ "އިންޑިއާ އައުޓް" ނަމުގައި ކުރިއަށްގެންދާ އެއްވުންތަކާއި ރެލީތައް ބޭއްވުމުގައި އިސްކޮށް ހަރަކާތްތެރިވާތީ ކަމަށެވެ. އަދި އާންމުކޮށް ފެންނާނެހެން އިންޑިއާއާ ދެކޮޅުކަން ހާމަވާ ފަދަ ގޮތަށް އިންޑިއާގެ ގައުމީ ދިދައިގެ ކުލަތަކާއި ނިޝާން ބޭނުންކޮށްގެންނާއި އިންޑިއާ އައުޓް އަދި އިންޑިއާ އައުޓް ރަމްޒުވާނޭހެން ލިޔެގެން ބެެނާތަކާއި ކުރެހުންތައް ތަކުރާރުކޮށް މާލެ އާއި ރާއްޖޭގެ އެކި ސަރަހައްދުތަކަށް ފޯރުކޮށްދީފައިވާތީ ކަމަށް ވެސް ފުލުހުން ބުނެއެވެ.
މި މައްސަލައިގައި ދެ މީހަކު ހައްޔަރުކޮށްފައިވާކަމަށް ފުލުހުން ބުނެފައިވާއިރު އެއީ ކުރީގެ މެމްބަރު މުޙައްމަދު އިސްމާއިލް އާއި ޕީޕީއެމްގެ އެކްޓިިވިސްޓެއް ކަމަށްވާ އަލީ ނަސީމް ކަމަށް ޕީޕީއެމްް އިން ވަނީ ކަށަވަރުކޮށްދީފައެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
އިންޑިޔާއާ މެދު ނަފުރަތު އުފެއްދުމަށް ހިންގާ ހަރަކާތަކީ ޤައުމީ ސަލާމަތަށް ހުރި ނުރައްކަލެއް ކަމުގައި، ޤައުމީ ސަލާމަތާބެހޭ މަޖިލީހުގެ މިއަހަރުގެ 3 ވަނަ ބައްދަލުވުމުގައި ކަނޑައަޅާފައިވާކަން ބަޔާން ކުރައްވައި، ރައީސް އެ ޤަރާރު ނެރުއްވާފައިވަނީ 21 އޭޕްރީލް 2022 ގައެވެ.
ރައީސް އެގޮތަށް ޤަރާރު ނެރުއްވުމުންވެސް އިދިކޮޅު ޕްރޮގްރެސިވް ކޮންގްރެސް އިން ވަނީ އިންޑިޔާ އައުޓް ލިޔުމުގައި އަކުރުތައް ބަދަލުކޮށްގެން އެ ހަރަކާތް ހިންގާފައެވެ. އަދި އެ ޙަރަކާތް ނުހުއްޓުވޭނެކަމަށް ބުނެ ޕީޕީއެމްއިން ވަނީ ޓްވީޓުވެސް ކޮށްފައެވެ.
ނުސީދާ އިބާރާތްތަކާއި ކުރެހުންތައް ބޭނުންކޮށްގެން "އިންޑިއާ އައުޓް" ކެމްޕޭން ހިންގުމަށް ކުރަމުންދާ ކަންތައްތަކަކީ ކޯޓު އަމުރަށް ގޮން ޖެހުމުގެ އަމަލުތަކެއްކަމަށް ބެލެވޭނެކަމަށް ކްރިމިނަލް ކޯޓުން ވަނީ ބުނެފައެވެ.
