މިފްކޯއަށް މިހާރު މަސް ގަންނަނީ ހަމަ އަގުގައި ނޫން ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑޮކްޓަރު ޙުސައިން ރަޝީދު ޙަސަން ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، ތޮއްޑޫ ދާއިރާގެ މެންބަރު ޙަސަން ޝިޔާން ކުރެއްވި ސުވާލަަށް ޖަވާބު ދެއްވުމަށް މަޖިލީހުގެ ތަޅުމަށް ވަޑައިގެން އިތުރު މެމްބަރުން ކުރެއްވި ސުވާލުތަކުގެ ތެރެއިން ގައްދޫ ދާއިރާގެ މެމްބަރު އަހުމަދު ޒާހިރު ކުރެއްވި ސުވާލަށް ޖަވާބު ދެއްވަމުންނެވެ. މިނިސްޓަރު ވިދާޅުވީ، ހަމަ އަގަކީ ކޮބައިގަން އެނގެން ޖެހޭ ކަމަށެވެ. އެއަގަކީ އެ އުފައްދާ މީހުންނަށް ޚަރަދުތައް ކެނޑުމަށް އެކަށީގެންވާ އާމްދަނީއަކަށްވާން ޖެހޭ ކަމަށާއި، އެ އަަގަކީ، އެތަކެތި ގަނެ އޭގެން އިތުރު ޕްރޮޑަކްޓެއް އުފައްދައި އިތުރު މާކެޓުތަކަށް ވިއްކޭ އަގަކަށް ވާން ޖެހޭ ކަމަށެވެ. މިހާރު މިފްކޯއަށް މަސް ގަންނަނީ ހަމަ އަގުގައި ނޫން ކަމަށާއި، މިހާރުވެސް އެކްސްޕޯޓުކުރާ މަހުން އެވްރެޖްކޮށް 281 ޑޮލަރު މިފްކޯއަށް ގެއްލުންވާ ކަމަށް މިނިސްޓަރު ވިދާޅުވިއެވެ. އެހެންކަމުން ކޮސްޓް އޮފް ޕްރޮޑަކްޝަނަށްވުރެ މާކެޓް އަގު ދަށް ކަމަށް ވިދާޅުވިއެވެ.
މިދިޔަ މާޗު މަހުން ފެށިގެން މިފްކޯ އިން ވަނީ އެ ކުންފުނިން މަސް ގަންނަ އަގު 17 ރުފިޔާއާ ހަމަޔަށް ބޮޑު ކޮށްފައެވެ. މަސްވެރިންނަށް ހަމަ އަގު ހޯދައިދިނުމަކީ ރައީސް ސާލިހުގެ ރިޔާސީ ވައުދެކެވެ. މިކަމަށް މަސައްކަތްތަކެއް ކުރައްވާ ކަމަށް މި އަހަރުގެ ރިޔާސީ ބަޔާނުގައިވެސް ވަނީ ފާހަގަކުރައްވާފައެވެ.
ތޮއްޑޫ ދާއިރާގެ މެންބަރު ޙަސަން ޝިޔާން، ރަސްދޫ އައިސް ޕްލާންޓްގެ މަސައްކަތާ ގުޅޭ ގޮތުން ކުރެއްވި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، ރަސްދޫގައި ސައުދީ ފަންޑުގެ އެހީގައި 255 ޓަނުގެ އައިސް ޕްލާންޓެއް ގާއިމް ކުރުމަށް ޓެންޑަރ ކުރެވި މުއްދަތު ހަމަވި އިރު ބިޑް ހުށައަޅާފައިވަނީ އެންމެ ފަރާތަކުން ކަމަށެވެ. އެއީ އިންޓަރނޭޝަނަލް ކޮމްޕެޓިޓިވް ބިޑެއް ކަމުން ބިޑް ހުށައެޅުމުގެ ކުރިން ރަޖިސްޓްރީ ވާން ޖެހޭއިރު، ބިޑް ހުށައެޅި ފަރާތުން ކުރިން ރަޖިސްޓްރީ ވެފައި ނުވާތީ ބިޑް ޑިސްކޮލިފައި ވެފައިވާ ކަމަށް މިނިސްޓަރު ވިދާޅުވިއެވެ.
މީގެއިތުރުން މިނިސްޓަރު ވިދާޅުވީ ބިޑް ހުށައެޅުމަށް ދަތިތަކެއް ކުރިމަތިވާކަން ފާހަގަ ކުރެވިފައިވާ ކަމަށެވެ. ބޭރުން ތަކެތި ގެނަ އުމަށް ބުނެފައިވާތީ ދީފައިވާ 6 މަސް ދުވަހުގެ މުއްދަތުގައި އެކަން ނުކުރެވޭނެ ކަމަށް ޝައުގުވެރި ޕާޓީތަކުން ބުނެފައިވާކަމަށްވެސް މިނިސްޓަރު ވިދާޅުވިއެވެ. އަދި ފައިނޭޝިއަލް އެލިޖިބިލިޓީ ކްރައިޓީރީއާ މަތި ކަމަށްވެސް ފާހަގަކޮށްފައިވާ ކަމަށާއި އެހެންކަމުން ދެވަނަ ފަހަރަށް ބިޑަށް ހުޅުވާލުމުގެ ކުރިން ބީލަން ކަރުދާހަށް ބަދަލު ގެންނަން ޖެހޭ ކަމަށް ގަބޫލު ކުރެވި އެ ބަދަލުތައް ގެނެސް ސައުދީ ފަންޑަށް ހުށައެޅުނު ކަމަށް މިނިސްޓަރު ވިދާޅުވިއެވެ. އެބަދަލުތައް ގެނެސް އަލުން ބީލަމަށް ހުޅުވާލާފައި ކަމަށާއި، އެކަމަށް ކުރަން ޖެހޭ ކަންކަން ކުރަމުން އަންނަ ކަމަށް މިނިސްޓަރު ވިދާޅުވިއެވެ. ބިޑް ހުށައަޅަންޖެހޭ އެންމެ ފަހު ތާރީޚަކީ 8 ޖޫން އެެވެ.
މަސްވެރިންނަށް އައިސް ލިބޭނީ އައިސް ޕްލާންޓްތައް އެޅައި ނިމުމުންކަމަށްވެސް ފިޝަރީޒް މިނިސްޓަރު އިތުރަށް ފާހަގަކުރެއްވިއެވެ.
ކޫއްޑޫގެ މައްސަލަ ހައްލު ކުރުމަށް 23 މޭގެ ކުރިން ރައީސް އޮފީހަށް ފޮނުވުމަށް އަންގާފައިވާ ކަމަށާއި، އެކަމަށް ތައްޔާރުވަމުން އަންނަ ކަމަށްވެސް މިނިސްޓަރު ވިދާޅުވިއެވެ.
