ލިވަޕޫލް މޮޅުވެ، ފަހު މެޗަށްދާއިރުވެސް ލީގު ހޯދުމުގެ އުއްމީދު ދަމަހައްޓައިފި

އިނގިރޭސި ޕްރިމިއަރ ލީގުގެ ފަހު މެޗަށްދާއިރުވެސް ލީގު ހޯދުމުގެ އުއްމީދު ލިވަޕޫލުން ދަމަހައްޓައިފިއެވެ. ލިވަޕޫލުން އުއްމީދު ދެމެހެއްޓީ ފަހަތުން އަރާ 2-1 ން ސައުތްހެމްޓަން ބަލިކޮށްގެންނެވެ.

ފަހު މެޗަށްދާއިރު ލިވަޕޫލާއި, އެއްވަނާގައި އޮތް މެންޗެސްޓަރ ސިޓީއާ ދެމެދު އޮތީ ޕޮއިންޓެއްގެ ފަރަޤެކެވެ. އެހެންކަމުން ލިވަޕޫލަށް ލީގު ލިބޭނީ ފަހު މެޗުގައި ސިޓީ އެސްޓަންވިލާ އަތުން މޮޅުނުވެއްޖެ ނަމައެވެ. ލިވަޕޫލަށް ފަހުމެޗުގައި ބަލިކުރަން ޖެހޭނީ ވުލްވްސްއެވެ. ސައުތްހެމްޓަން އަތުން ލިވަޕޫލް އަންގާރަ ދުވަހުގެރޭ ކުރި ހޯދީ ރެޑްމަންޑްގެ ލަނޑުން 13 ވަނަ މިނިޓްގައި ސައުތްހެމްޓަން ކުރި ހޯދާފައިވަނިކޮށެވެ. ފުރަތަމަ ހާފްގައި ލިވަޕޫލަށް އެއްވަރުކޮށްދިނީ މިނަމީނޯއެވެ. ލިވަޕޫލް މޮޅުކޮށްދިނީ 67 ވަނަ މިނިޓްގައި މަޓިޕްއެވެ.

ސީޒަންގައި ލިވަޕޫލުން ވަނީ މިހާތަނަށް ދެ މުބާރާތް ކާމިޔާބުކޮށްފައެވެ. އެއީ ލީގުކަޕާއި, އެފްއެކަޕެވެ. ކުރިއަށް އޮތީ ޕްރިމިއަރ ލީގު ފަހު މެޗާއި, ޗެމްޕިއަންސްލީގު ފައިނަލް މެޗެވެ. އަދިވެސް ހަތަރު މުބާރާތް ކާމިޔާބުކުރުމުގެ ފުރުޞަތު ލިވަޕޫލަށް އެބައޮތެވެ. ސިޓީއަށް ސީޒަންގައި ކާމިޔާބުކުރެވެން އޮތް ހަމައެކަނި މުބާރާތަކީ ޕްރިމިއަރ ލީގެވެ.