ހައި ސްޕީޑް ފެރީ ނިޒާމު: ފުރަތަމަ 11 ދުވަސް ތެރޭގައިވެސް 3000 ދަތުރުވެރިން

ހައި ސްޕީޑް ފެރީ ނިޒާމަކުން ރާއްޖެ ގުޅާލުމުގެ ފުރަތަމަ ފިޔަވަހި ފަށާފައިވާއިރު، ފުރަތަމަ 11 ދުވަސް ތެރޭގައިވެސް 3000 ދަތުރުވެރިން ދަތުރުކޮށްފައިވާކަމަށް މިނިސްޓަރ އޮފް ނޭޝަނަލް ޕްލޭނިންގ، އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

އަންގާރަ ދުވަހު ރައްޔިތުންގެ މަޖިލީހަށް ވަޑައިގެން މެމްބަރުން ކުރެއްވި ސުވާލުތަކަށް ޖަވާބުދެއްވަމުން މިނިސްޓަރު ވިދާޅުވީ، ޖޫން މަސް ނިމެންވާއިރަށް ހއ ނިންމައި، ޖުލައި މަސް ނިމެންވާއިރަށް ހއ ހދ އަދި ށ ގައި ފެރީގެ ޚިދުމަތް ފެށޭނެކަމަށް އުއްމީދު ކުރައްވާ ކަމަށެވެ.

އެ މަސައްކަތް ނިމުމަށްފަހު ދެކުނުގައި އެ ޚިދުމަތް ފެށުމަށް ވިސްނަވާކަމަށްވެސް މިނިސްޓަރު ވިދާޅުވިއެވެ.

މިނިސްޓަރު ވަނީ އެ މަސައްކަތް އެންމެ އެކަށީގެންވާ ސްޕީޑުގައި ކުރިއަށް ނުދާކަން ފާހަގަކުރައްވާފައެވެ.

މީގެ އިތުރުން، ދަތުރުފަތުރާ ނުލައި ލާމަރުކަޒީވެސް ނުކުރެވޭނެ ކަމަށާއި، ޤައުމު އެއްކޮށް ތަރައްޤީ ނުކުރެވެނެކަަމަށްވެސް މިނިސްޓަރު ވިދާޅުވިއެވެ. އެގޮތުން ތަރައްޤީއަކީ ހަމައެކަނި ކަނޑުން ވެލި ނަގައިގެން ބިން ހިއްކުން ނޫންކަން ފާހަގަ ކުރައްވައި މިނިސްޓަރު ވަނީ އެއް ރަށް އަނެއްރަށާ ގުޅި ލާމެހެންޖެހޭކަމަށް ވިދާޅުވެފައެވެ. މިނިސްޓަރު ވިދާޅުވާ ގޮތުގައި އެކަން ކުރެވޭނެ ގޮތަކީ ދަތުރުފަތުރުގެ ނިޒާމު ރަނގަޅުކުރުމެވެ.

ހައިސްޕީޑް ފެރީ ނިޒާމަށް އަލިއަޅުވާލައްވާ މިނިސްޓަރު ވިދާޅުވީ، އެ ޕްރޮޖެކްޓުގެ ދަށުން ހދ އަތޮޅުގެ ރަށްތަކުގައި ފެރީ ތާވަލުކުރެވި، ދަތުރު ފެށިފައިވާ ކަމަށެވެ. އެގޮތުން ފުރަތަމަ 11 ދުވަސް ތެރޭގައިވެސް 3000 ދަތުރުވެރިން ދަތުރުކޮށްފައިވާކަމަށް މިނިސްޓަރު ވިދާޅުވިއެވެ. އޭގެ ތެރޭގައި އެންމެ ގިނައީ ބޭސްފަރުވާއަށް ދިއުމަށް ކޮށްފައިވާ ދަތުރުތައް ކަމަށް މިނިސްޓަރު ވިދާޅުވިއެވެ.

އޭގެ އިތުރުންވެސް ބާޒާރު ކުރުމާއި، ޗުއްޓީ ހޭދަކުރުމަށްވެސް އެކި ފަރާތްތަކުން ދަތުރުކުރާކަމަށް މިނިސްޓަރު ވިދާޅުވިއެވެ.

ދިވެހިރާއްޖެ ހައި-ސްޕީޑް ފެރީ ނިޒާމަކުން ގުޅާލުމަށް ފަރުމާކޮށްފައިވާ "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވޯރކް" މަޝްރޫޢުގެ ދަށުން ފޯރުކޮށްދިނުމަށް ހަމަޖެހިފައިވާ ރާއްޖެ ޓްރާންސްޕޯޓް ލިންކް (އާރް.ޓީ.އެލް) ގެ ދަށުން، މެއި މަހުގެ 2 ވަނަ ދުވަހުގެ މެންދުރުފަހުން ފެށިގެން ހދ އަތޮޅުގެ 13 ރަށް ހިމެނޭހެން 5 ރޫޓުގެ ދަތުރުތައް ވަނީ ފަށާފައެވެ.