ފެލިދޫގެ ރަށް ގިރުމުގެ މައްސަލަ: އީއައިއޭއާއި ޓެންޑަރިންގ ކުރިއަށް ގެންދެވޭނީ ކައުންސިލުން ޖަވާބެއް ދިނުމުން
މިނިސްޓަރ ހާޒިރު ކުރައްވާފައިވަނީ ވެލިދޫ ދާއިރާގެ މެންބަރު ކުރައްވާ ސުވާލަކާއި ގުޅިގެން
މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމްއާ ސުވާލުކުރެއްވުން
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން ކުރިއަށްގެންދާ މަޝްރޫއުތަކާއި ގުޅޭގޮތުން މިނިސްޓަރު މުޙައްމަދު އަސްލަމް މަޖިލީހަށް ވަޑައިގެން މައުލޫމާތު ފޯރުކޮށްދެއްވައިފިއެވެ.
2022 ވަނަ އަހަރުގެ ދެވަނަ ދައުރުގެ ދެވަނަ ޖަލްސާއަށް އަންގާރަ ދުވަހު މިނިސްޓަރު ހާޒިރު ކުރައްވާފައިވަނީ ވެލިދޫ ދާއިރާގެ މެންބަރު އިބްރާހީމް ފަޒުލް ރަޝީދު ކުރައްވާ ސުވާލަކާއި ގުޅިގެންނެވެ.
މެމްބަރު ފަޒުލް ވަނީ ވ.ފެލިދޫ ގިރާ ސަރަޙައްދު ޙިމާޔަތް ކުރުމަށް ޕީ.އެސް.އައި.ޕީގައި ހިމެނިފައިވާއިރު، މަސައްކަތް ނުފެށި ލަސްވާ ސަބަބުތަކާއި ގުޅޭގޮތުން ސުވާލު ކުރައްވާފައެވެ.
މިނިސްޓަރު ވިދާޅުވީ، ފެލިދޫގެ ރަށް ގިރުމުގެ މައްސަލަ ޙައްލު ކުރުމަށް ކޮންސެޕްޓެއް ތައްޔާރުކޮށް 20 އޭޕްރީލް 2022 ގައި ރަށު ކައުންސިލަށް ފޮނުވާފައިވާ ކަމަށެވެ. އެ މަސައްކަތުގެ ދަށުން އީއައިއޭ މަރުޙަލާއާއި ޓެންޑަރިންގ މަރުޙަލާ ކުރިއަށް ގެންދެވޭނީ ރަށު ކައުންސިލުން ޖަވާބެއް ދިނުމުން ކަމަށް މިނިސްޓަރު ވިދާޅުވިއެވެ.
އާންމު ގޮތެއްގައި އީއައިއޭ އަދި ޓެންޑަރިންގ މަރުޙަލާއަށް 3 މަސް ދުވަސްވަރު ހޭދަވާކަމަށް މިނިސްޓަރު ވިދާޅުވިއެވެ.
މީގެއިތުރުން، އައްޑޫ ބިން ހިއްކުމުގެ މަޝްރޫއާ ގުޅޭގޮތުން މަރަދޫ ދާއިރާގެ މެމްބަރު ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު ވިދާޅުވީ، ޕްރޮޖެކްޓް މޮބިލައިޒް ކުރުމުގެ ކުރިން ކުރަންޖެހޭ ކަންކަން މިހާރު ކުރިއަށްދާ ކަމަށެވެ.
ޖުލައި މަސް ތެރޭގައި އެ މަސައްކަތް މޮބިލައިޒް ކުރާނެކަން ފާހަގަ ކުރައްވައި މިނިސްޓަރު ވަނީ މިވަގުތު އެކަމާ ގުޅޭ މަސައްކަތްތައް ކުރިއަށްދަނީ އެކަށީގެންވާ ސްޕީޑުގައިކަމަށް ވިދާޅުވެފައެވެ.
މިލަންދޫ ދާއިރާގެ މެމްބަރު އަލީ ރިޒާވެސް ވަނީ އެ ދާއިރާގެ މަޝްރޫއުތަކާއި ގުޅިގެން މިނިސްޓަރާއި ސުވާލު ކުރައްވާފައެވެ. އެކަމާއި ގުޅިގެން މިނިސްޓަރު ވިދާޅުވީ، މިލަންދޫ ބަނދަރުގެ މަސައްކަތް މިއަހަރުގެ ތެރޭގައި ހިނގާނެ ކަމަށެވެ. އެއީ ބަޖެޓުގައިވެސް ހިމެނިފައިވާ މަސައްކަތެއްކަން މިނިސްޓަރު ފާހަގަކުރެއްވިއެވެ.
ރ. އިންނަމާދޫ ނަރުދަމާގެ މަސައްކަތާއި ގުޅޭގޮތުން މިނިސްޓަރު ވިދާޅުވީ، އެ މަސައްކަތުގެ 80 އިންސައްތަ މިހާރު ނިމިފައިވާ ކަމަށެވެ. އެހެންނަމަވެސް، އެ މަސައްކަތް އެންމެ އެކަށީގެންވާ ސްޕީޑުގައި ކުރިއަށް ނުދާކަން ޤަބޫލު ކުރައްވާކަމަށްވެސް މިނިސްޓަރު ވިދާޅުވިއެވެ.
