ތަކަންދޫގެ ބަނދަރު ތަރައްގީ ކުރުމާއި ގޮނޑުދޮށް ހިމާޔަތް ކުރުމުގެ މަސައްކަތް އެމްޓީސީސީއާ ހަވާލުކޮށްފި
އެމްޓީސީސީއާ މި މަޝްރޫއު ހަވާލު ކުރީ 22.4 މިލިއަން ރުފިޔާއަށް
ތަކަންދޫ ބަނދަރު ތަރައްގީ ކުރުމުގެ މަސައްކަތް އެމްޓީސީސީއާ ހަވާލު ކުރުމަށްބޭއްވި ރަސްމިއްޔާތުގެ ތެރެއިން
ހއ. ތަކަންދޫގެ ބަނދަރު ތަރައްގީ ކުރުމާއި ގޮނޑުދޮށް ހިމާޔަތް ކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްފިއެވެ.
ޕްލޭނިން މިނިސްޓްރީގައި ހޯމަ ދުވަހު ބޭއްވި ރަސްމިއްޔާތެއްގައި އެ މަޝްރޫއުގެ އެއްބަސްވުމުގައި އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ އާދަމް އާޒިމެވެ. އަދި މިނިސްޓްރީގެ ފަރާތުން ސޮއި ކުރެއްވީ ޕާމަނަންޓް ސެކެޓްރީ ޒީނިޔާ އަހުމަދު ހަމީދެވެ. އެ ރަސްމިއްޔާތުގައި ރައްޔިތުންގެ މަޖިލީޙުގެ ބާރަށު ދާއިރާގެ މެމްބަރު އަހުމަދު އަބްދުﷲ ވެސް ބައިވެރިވެވަޑައިގެންނެވިއެވެ.
އެ މަސައްކަތް ޕްލޭނިން މިނިސްޓްރީން އެމްޓީސީސީއާ ހަވާލު ކޮށްފައިވަނީ 22.4 މިލިއަން ރުފިޔާއަށެވެ.
މި މަޝްރޫއުގެ ދަށުން ތަކަންދޫ ބަނދަރު ފުން ކުރުމާއި ނެރު ފުން ކުރުމާއި ބޭރުތޮށި ލުމާއި ރިވެޓްމަންޓް ޖެހުމާއި ގްރޮއިންސް ޖެހުމުގެ މަސައްކަތް ކުރާނެއެވެ. އަދި އީއައިއޭގެ މަސައްކަތާއި ނެރުބައްތި އާއި މަގުބައްތި ހަރުކުރުމާއި ޕޭވްމަންޓް ހެދުމުގެ މަސައްކަތް އެމްޓީސީސީ އިން ކުރާނެއެވެ.
އެމްޓީސީސީ އިން ބުނީ ތަކަންދޫގެ ބަނދަރަށް ވަދެ ނުކުންނަން ދަތިވުމުގެ ސަބަބުން އެ ރަށުގެ ރައްޔިތުން ތިބީ އަމާން ބަނދަރެއް ލިބޭނެ ދުވަހެއްގެ އިންތިޒާރުގައި ކަމަށެވެ. އަދި ރަށް ގިރުމަކީ ވެސް އެ ރަށަށް ދިމާވެފައިވާ މައްސަލައެއް ކަމަށާއި އެ މައްސަލައަށް ވެސް މި މަޝްރޫއުގެ ސަބަބުން ހައްލު ލިބިގެންދާނެ ކަމަށް އެ ކުންފުނިން ބުނެއެވެ.
