ކްރިމިނަލް ކޯޓަކީ ކީއްކުރާ ތަނެއްހޭ ބުނި މީހަކު 15 ދުވަހަށް ޖަލަށް
ޖިނާއީ އިޖުރާއަތުގެ ޤާނޫނުގައި އޮންނަނީ 15 ދުވަހަށްވުރެ ދިގުނޫން މުއްދަތަކަށް ޖަލަށް ލުން
ކްރިމިނަލް ކޯޓް- ޙުކުމް ކުރެއްވީ ކްރިމިނަލް ކޯޓުގެ ގާޒީ އަލީ ނަދީމް
ކްރިމިނަލް ކޯޓަކީ ކީއްކުރާ ތަނެއްހޭ ބުނެ، ކޯޓުގެ ޙުރުމަތް ކެނޑި މީހަކު 15 ދުވަހަށް ޖަލަށް ލުމަށް ކްރިމިނަލް ކޯޓުން ޙުކުމްކޮށްފިއެވެ.
މެއި މަހުގެ 9 ވަނަ ދުވަހު ކްރިމިނަލް ކޯޓުގެ ގާޒީ އަލީ ނަދީމް ކުރެއްވި މި ޙުކުމަކީ، ދައުލަތުން ދަޢުވާ ކޮށްފައިވާ ރޭޕްކުރުމުގެ ކުށުގެ ދަޢުވާއަކާއި ގުޅިގެން 2022 މެއި 09 ވަނަ ދުވަހު ބޭއްވުނު އަޑުއެހުމުގައި ހިނގި ކަމަކާއި ގުޅިގެން ކުރެއްވި ޙުކުމެކެވެ.
އެކަން ހިނގާފައިވާ ގޮތަށް ބަލާއިރު، ޖަލުގައި ބަންދު ކޮށްފައި ތިބޭ މީހުންގެ ބޭސްފަރުވާއާއި ގުޅޭ ކަންކަމުގައި ކްރިމިނަލް ކޯޓަށް ހޯދައިދެވޭނެ ޙައްލެއް ނެތްކަމާއި، އެ ކަމުގައި ޤާނޫނީ ގޮތުން ފަހިވެފައިވާ މަގަކީ އެ ފަދަ ހުށަހެޅުމެއް ސިވިލް ކޯޓަށް ހުށަހެޅުން ކަމަށް ޝަރީއަތުން ވަނީ ދައުވާލިބޭ މީހާއަށް އަންގާފައެވެ.
އެހިސާބުން، "ތީ ކީއްކުރާތަނެއް؟" ހޭ އެމީހާ ވަނީ ޝަރީއަތުގައި ބުނެފައެވެ. މިއީ ކޯޓުގެ ޙުރުމަތް ކެނޑުމުގެ އަމަލެއްކަމަށް ގާޒީ ނިންމެވިއެވެ.
އޭނާ ކޯޓު ޙުރުމަތް ކަނޑާފައިވާތީ، ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 170ވަނަ މާއްދާގެ (ހ) ގެ ދަށުން، 15 ދުވަހުގެ މުއްދަތަށް ޖަލަށްލުމަށް ގާޒީ ވަނީ ޙުކުމް ކުރައްވާފައެވެ.
ކޯޓުގެ ޙުރުމަތް ކެނޑުމާއި ގުޅޭ ކުށްތަކަށް ޖިނާއީ އިޖުރާއަތުގެ ޤާނޫނުގައި އޮންނަނީ 15 ދުވަހަށްވުރެ ދިގުނޫން މުއްދަތަކަށް ޖަލަށް ލުމެވެ.
