ފަނޑިޔާރުންނަށް އަމާޒުކޮށް މަދަނީ އިޖުރާޢަތުގެ ޤާނޫނުގެ ތަމްރީން ޕްރޮގްރާމް ފަށައިފިއެވެ.
ހޮނިހިރު ދުވަހު ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ބޭއްވި ޚާއްސަ ރަސްމިއްޔާތެއްގައި މި ޕްރޮގްރާމް އިފްތިތާޙު ކޮށްދެއްވީ ދިވެހި ރާއްޖޭގެ އުއްތަމަ ފަނޑިޔާރު، އަލްއުސްތާޛު އަޙްމަދު މުޢުތަޞިމް ޢަދުނާން އެވެ.
މި ރަސްމިއްޔާތުގައި އުއްތަމަ ފަނޑިޔާރު ދެއްކެވި ވާހަކަފުޅުގައި، ޤާނޫނު ދެނެގަނެ އެ ޤާނޫނު އޭގެ އެންމެ ފުރިހަމަ ގޮތުގައި ނެގެހެއްޓުމުގެ މުހިންމުކަމުގެ މައްޗަށް އަލި އަޅުއްވާލައްވާފައިވެއެވެ. އަދި ޤާނޫނުގެ ޙުކޫމަތު ނެގެހެއްޓުމަކީ ޙުކުމަކުން ޤާނޫނު ނެގެހެއްޓުން ނޫންކަމާއި، އޭގެބަދަލުގަ އެއީ ޤާނޫނުގައި އޮތް ގޮތަށް ޙުކުމްތައް ބިނާކުރުންކަމަށް އެމަނިކުފާނު ވިދާޅުވިއެވެ.
އޭގެ އިތުރުން، އެންމެ ފުރިހަމަ ގޮތުގައި ޤާނޫނޫ ތަންފީޒު ކުރެވޭނީ ޙިކުމަތްތެރިކަމާއެކު ވިސްނާ ފިކުރު ކޮށްގެން ކަމަށާއި، ބޭރުގެ ނުފޫޒުތަކުން އެއްކިބާވެގެންކަމަށް އެމަނިކުފާނު ވިދާޅުވިއެވެ.
އުއްތަމަފަނޑިޔާރު ވަނީ ކޮވިޑް-19 ގެ ބަލިމަޑުކަމުގެ ތެރޭގައި އަމަލުކުރަން ފެށުނު އިލެކްޓްރޯނިކް ވަސީލަތްތައް މެދުވެރިކޮށް މައްސަލަތައް ހިންގުމުގެ ބޭނުންތެރިކަމަށްވެސް އަލިއަޅުވާލައްވާފައެވެ.
ޑީޖޭއޭއިން މައުލޫމާތު ދޭ ގޮތުގައި މި ފެށުނު މަދަނީ އިޖުރާޢަތުގެ ޤާނޫނުގެ ތަމްރީން ޕްރޮގްރާމްއަކީ މި ޕްރޮގްރާމްގެ ފުރަތަމަ ބުރެވެ. އެގޮތުން މި ބުރުގައި މާލޭގެ ކޯޓުތަކުގެ 22 ފަނޑިޔާރުން ބައިވެރިވެ ވަޑައިގަންނަވާފައިވެއެވެ.
މި ޕްރޮގްރާމް ގައި ބައިވެރިންނަށް އިރުޝާދާއި ތަމްރީން ދެއްވާނީ ސުޕްރީމް ކޯޓުގެ ފަނޑިޔާރު، އަލްއުސްތާޛު ޙުސްނުއް ސުޢޫދު، ސުޕްރީމް ކޯޓުގެ ފަނޑިޔާރު ޑރ. މުޙައްމަދު އިބްރާހީމް، ސިވިލް ކޯޓުގެ ޤާޟީ އަލްއުސްތާޛު ޒުބައިރު މުޙައްމަދު އަދި ސިވިލް ކޯޓުގެ ޤާޟީ އަލްއުސްތާޛު އަޙްމަދު ޢަބްދުލްމަތީން އެވެ.
ޑީޖޭއޭއިން މައުލުމާތު ދޭ ގޮތުގައި މި ޕްރޮގްރާމްގެ ދެވަނަ ބުރު 15 މެއި 2022 ގައި ކުރިއަށް ގެންދެވޭނެއެވެ. އެގޮތުން އެއީ މެޖިސްޓްރޭޓުންނަށް އަމާޒުކޮށް، ކުރިއަށް ގެންދިޔުމަށް ހަމަޖެހިފައިވާ ތަމްރީން ބުރެއް ކަމަށް އެ އިދާރާއިން ބުނެއެވެ.
މަދަނީ އިޖުރާއަތުގެ ޤާނޫނުގެ މަޤްސަދަކީ ޝަރީޢަތަށް ހުށަހެޅޭ މަދަނީ މައްސަލަތައް ޢަދުލުވެރިކަމާއި ހާމަކަމާއެކު، އަދި އެކަށީގެންވާ އަވަސް މިނެއްގައި ބަލައި، ގޮތެއް ނިންމުމަށް މަގުފަހި ކުރުވުމެވެ. މި ޤާނޫނަށް އަމަލުކުރަން ފަށާނީ 16 ޖޫން 2022 ގައެވެ.
