2023ގެ ރިޔާސީ ޓިކެޓް ރައީސް ސާލިހަށް ދިނުމަށް ފައްޔާޒު ތާއީދު، އިންތި ވިދާޅުވީ ޕްރައިމަރީއެއް އޮންނާނެ ކަމަށް
އެމްޑީޕީގެ އެތެރެއިން އިތުރު ޕާޓީއެއް އުފެދިގެން ނުދާނެ
ޗެއަރޕާސަން ބަހުސް 2022ގައި
ދެވަނަ ދައުރަކަށް ރައީސް ސާލިހަށް ރިޔާސީ ޓިކެޓް ދިނުމަށް "ގަދަޔަށް" ތާއީދު ކުރައްވާކަމަށް އެމްޑީޕީގެ ޗެއަރޕާސަންގެ މަގާމަށް ވާދަކުރައްވާ އިކޮނޮމިކް މިނިސްޓަރ ފައްޔާޒު އިސްމާއީލް ވިދާޅުވެއްޖެއެވެ.
ރާއްޖެޓީވީއިން ކުރިއަށްގެންދިޔަ "ޗެއަރޕާސަން ބަހުސް 2022"ގައި، ރައީސް ސާލިޙް އަށް ދެވަނަ ދައުރެއްގެ ޓިކެޓް ދިނުމަށް ތާއީދު ކުރައްވަންތޯ ކުރި ސުވާލަށް ޖަވާބު ދެއްވަމުން ފައްޔާޒު ވިދާޅުވީ، ރައީސް ސާލިޙަށް ޓިކެޓް ދިނުމަށް ގަދަޔަށް ތާއީދު ކުރައްވާ ކަމަށެވެ. ޗެއަރޕާސަންގެ މަގާމަށް ވާދަކުރައްވާ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވީ، ރިޔާސީ ޓިކެޓް ދިނުމަށް ޕްރައިމަރީއެއް އޮންނާނެ ކަމަށެވެ. އާނއެކޭ ނުވަތަ ނޫނެކޭ ބުނެ ޖަވާބު ދެއްވުމަށް ތަކުރާރުކޮށް ހޮސްޓް އެދުމުންވެސް އިންތި ވިދާޅުވީ، ޕްރައިމަރީއެއް އޮންނާނެ ކަމަށެވެ.
ޗެއަރޕާސަންގެ އިންތިޚާބަށްފަހު އެމްޑީޕީގެ އެތެރެއިން އިތުރު ޕާޓީއެއް އުފެދިގެން ނުދާނެ ކަމަށް ދެ ކެންޑިޑޭޓުންވެސް ވިދާޅުވިއެވެ.
ފައްޔާޒު ވިދާޅުވީ، އެމްޑީޕީން އެކަނި ނުކުމެ 2023ގެ އިންތިޚާބު ކާމިޔާބު ކުރެވޭވަރަށް އަދި ތައްޔާރު ނޫންކަމަށެވެ. އެހެންނަމަވެސް އިންތި ވިދާޅުވީ، އެމްޑީޕީން އެކަނި ނިކުމެވެސް އިންތިޚާބު ކާމިޔާބު ކުރެވޭނެ ކަމަށެވެ.
ބަރުލަމާނީ ނިޒާމަށް ތާއީދުކުރާ ކަމަށް އިންތި ވިދާޅުވިއެވެ. ފައްޔާޒު ވިދާޅުވީ، ބަރުލަމާނީ ނިޒާމަށް ތައީދު ކުރައްވާ ކަމަށާއި، ނަމަވެސް ރާއްޖެއަށް އެ ނިޒާމު ގެނައުމަށް ތާއީދު ނުކުރައްވާކަމަށެވެ.
ފައްޔާޒު ވިދާޅުވީ، ޗެއާޕަރސަންގެ އިންތިޚާބަކީ 2018ގެ ފަހުން ބޭއްވޭ، އެމްޑީޕީއަށް އެންމެ މުހިންމު އިންތިޚާބު ކަމަށެވެ. އަދި މިހާރު އޮތް ސަރުކާރު ދިފާއުކޮށް ސަރުކާރަށް އެއްބާރުލުން ދީގެން ނޫނިީ 2023 ކާމިޔާބު ނުކުރެވޭނެ ކަމަށެވެ. އެހެންކަމުން އެމްޑީޕީގެ ޗެއަރޕާސަންގެ މަގާމަށް ގެންނަން ޖެހޭނީ ސަރުކާރަށް ތާއީދުކޮށް ސަރުކާރަށް އެއްބާރުލުންދޭ މީހެއް ކަމަށެވެ.
އިންތި ވިދާޅުވީ، މިއީ ޕާޓީ ސަލާމަތް ކުރަން ލިބޭ ފުރުސަތެއް ކަމަށެވެ. އެމަނިކުފާނު އިސް ކުރައްވާނީ، ނަޒާހަތްތެރިކަމާ ތެދުވެރިކަން ކަމަށާއި، އާންމު ރައްޔތިން ވީ ހާލެއްގައި މި ވޭތުވެދިޔަ ސަތާރަ އަހަރުވެސް ވެފައިވާނެ ކަމަށެވެ. ޕާޓީގެ އަސާސްތައް އެއީ ޕާޓީގެ އެންމެ މައި ތަނބު ކަމަށާއި، އެ ފުނޑާނުލާނެ މީހަކީ އެމަނިކުފާނު ކަމަށް އިންތި ވިދާޅުވިއެވެ.
