ރާއްޖޭގައި މިއަދު ފެށި ސައުތު އޭޝިޔަން ޖޫނިއަރ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕްގައި ރާއްޖޭގެ އަންހެން ޖޫނިއަރ ޓީމު ކުޅުނު މެޗު ކާމިޔާބުކޮށްފިއެވެ.

ރާއްޖޭގެ އަންހެން ޖޫނިއަރ ޓީމު ފުރަތަމަ މެޗުގައި ވާދަކުރީ ޕާކިސްތާނާއެވެ. މި މެޗު ރާއްޖެ ޓީމުން ކާމިޔާބުކުރީ 3-1 ގޭމުންނެވެ. ފުރަތަމަ ގޭމުގައި ޕާކިސްތާނުގެ ހައިކާއާ ދެކޮޅަށް ނިކުމެ ރާއްޖޭގެ އައިޝަތު ރަފާ ނާޒިމް ގޭމް ކާމިޔާބުކުރީ ސީދާ ތިން ސެޓުންނެވެ. ރަފާ ސެޓުތައް ކާމިޔާބުކުރީ 11-9، 11-8 އަދި 11-9ންނެވެ.

ދެވަނަ ގޭމުގައި ރާއްޖޭގެ ފާތިމަތު ދީމާ އަލީ ބައްދަލުކުރީ ޕާކިސްތާނުގެ ޒަމާން ހާންއާއެވެ. މި ގޭމް ދީމާ ކާމިޔާބުކުރީ 11-5، 11-8 އަދި 11-1ން ސެޓުތައް ކާމިޔާބުކޮށްގެންނެވެ.

ތިންވަނަ ގޭމުގައި ރާއްޖޭގެ މިސްކާ އިބްރާހިމް ބައްދަލުކުރީ ޕާކިސްތާނުގެ ކުލްސުމްއާއެވެ. މި ގޭމު ޕާކިސްތާނުން ކާމިޔާބުކުރީ ރާއްޖެއިން ދެސެޓު ހޯދާފައި ވަނިކޮށް ފަހަތުން އަރައެވެ. ހަތަރުވަނަ ގޭމުގައި ދީމާ ވަނީ އަލުން ކުޅެން ނިކުމެ މެޗު ކާމިޔާބުކޮށްފައެވެ. ޕާކިސްތާނުގެ ހައިކާއާ ވާދަކޮށް ދީމާ ގޭމު ކާމިޔާބުކުރީ ސީދާ ތިން ސެޓުންނެވެ. ސެޓުތައް ކާމިޔާބުކުރީ 11-7، 11-5 އަދި 11-3ންނެވެ.